សេដ្ឋកិច្ច
កម្លាំងគយចល័តចាប់ទូរស័ព្ទម៉ាកVivo V15 ជិត៤០០គ្រឿងលួចលោតឆ័ត្រចូលស្រុកខ្មែរ
បាត់ដំបង ៖ ទូរស័ព្ទទំនើបៗ ជិត៤០០គ្រឿង ត្រូវបានកម្លាំងគយចល័ត ដែលមានកិច្ចសហការពីកម្លាំងសមត្ថកិច្ចផង ធ្វើការស្ទាក់ចាប់តាមរយៈរថយន្តមួយគ្រឿង បន្ទាប់ពីទូរស័ព្ទដៃទាំងនេះ ត្រូវបានគេលួចនាំចូលដោយមិនស្របច្បាប់។
ការស្ទាក់ចាប់ទូរស័ព្ទបានជិត៤០០គ្រឿងនេះ គឺបានប្រព្រឹត្តឡើង កាលពីរសៀលថ្ងៃទី២៧ ខែមីនា ឆ្នាំ២០១៩ នៅលើកំណាត់ផ្លូវជាតិលេខ៥ ត្រង់ចំណុចភូមិអូរតាគី ឃុំអូរតាគី ស្រុកថ្មគោល ខេត្តបាត់ដំបង។
តាមប្រភពពីសមត្ថកិច្ចបានឲ្យដឹងថា ទូរស័ព្ទដែលត្រូវកម្លាំងគយចល័ត ដែលឈរជើងត្រង់ចំណុច ( ហុង ឡុង ) ស្ទាក់ចាប់បាននោះម៉ាកVivo V15 ដែលមានចំនួនរហូតដល់៣៧០គ្រឿង ដែលជនទុច្ចរិតលួចនាំចូលពីប្រទេសជិតខាងគេចវេះមិនបង់ពន្ធ តាមការកំណត់។
បច្ចុប្បន្ន គេនៅមិនទាន់ទទួលបានរបាយការណ៍ជាក់លាក់អំពីកិច្ចប្រតិបត្តិការនេះទេ ហើយក៏មិនទាន់ស្គាល់អំពីអត្តសញ្ញាណ នៃម្ចាស់ទូរស័ព្ទគេចពន្ធនេះដែរ ស្របពេលដែលមន្ត្រីគយកំពុងធ្វើការសួរនាំ ដោយវត្ថុតាងទាំងនេះ ត្រូវបាននាំយកទៅរក្សាទុកនៅទីស្នាក់ការគយចល័តដែលមានទីតាំងនៅតាមបណ្ដោយផ្លូវជាតិលេខ៥ ស្ថិតក្នុងឃុំអូរតាគី ស្រុកថ្មគោល ខេត្តបាត់ដំបង ដើម្បីរៀបចំសំណុំរឿងចាត់ការតាមនីតិវិធីច្បាប់ ដោយជុំវិញបញ្ហានេះយើងមិនអាចទាក់ទងទៅខាងក្រុមហ៊ុនដើម្បីចង់ដឹងពាក់ព័ន្ធនឹងទូរស័ព្ទនេះបានទេ៕
