សេដ្ឋកិច្ច
អគ្គនាយកដ្ឋានពន្ធដារព្រមានចាត់វិធានការច្បាប់ លើម្ចាស់យានយន្តដែលមិនទៅបង់ពន្ធ
អគ្គនាយកដ្ឋានពន្ធដារព្រមានជាថ្មីទៀត ចាត់វិធានការច្បាប់លើម្ចាស់យានយន្ត និងសហគ្រាសដែលមិនទាន់យកយានយន្តទៅបង់ពន្ធទាំងអស់ ខណៈរថយន្តមួយចំនួនដែលមិនទាន់បានប្រកាសបង់ពន្ធ នៅតែធ្វើចរាចរណ៍នៅលើដងផ្លូវនៅឡើយ។
ក្នុងសេចក្តីប្រកាសព័ត៌មានរបស់អគ្គនាយកដ្ឋានពន្ធដារ ចុះផ្សាយកាលពីថ្ងៃទី២៦ ខែមីនា ម្សិលមិញ បានឲ្យដឹងថា បច្ចុប្បននេះ មានយានយន្តមួយចំនួនដែលមិនទាន់ប្រកាសបង់ពន្ធ ហើយនៅតែបន្តធ្វើចរាចរណ៍លើដងផ្លូវនៅឡើយ។ ករណីនេះ អគ្គនាយកដ្ឋានពន្ធដារ អំពាវនាវទៅម្ចាស់យានយន្ត និងម្ចាស់សហគ្រាសមួយចំនួន មិនទាន់បានប្រកាសបង់ពន្ធយានយន្តរបស់ខ្លួនត្រូវទៅបង់ពន្ធនៅតាមសាខាពន្ធដារខេត្ត-ខណ្ឌ ឬនៅសាខាធនាគារ ដើម្បីចៀសវាងនូវការឃាត់យានយន្តតាមដងផ្លូវ នាំឱ្យមានការកកស្ទះចរាចរណ៍ ខាតពេលវេលា និងអាចកើតមាននូវបាតុភាពអសកម្មដោយប្រការណាមួយជាយថាហេតុជាដើម។
សេចក្តីប្រកាសព័ត៌មានបញ្ជាក់ថា៖ «ក្រុមការងារចម្រុះនៃអគ្គនាយកដ្ឋានពន្ធដារនៅតែបន្តយុទ្ធនាការចុះត្រួតពិនិត្យលើយានយន្តណាដែលមិនទាន់បង់ពន្ធប្រភេទនេះតទៅទៀត ដើម្បីឱ្យច្បាស់ថា យានយន្តទាំងអស់បានបំពេញកាតព្វកិច្ចបង់ពន្ធដោយស្មើភាពគ្នាតាមការកំណត់ដោយច្បាប់»។
ក្នុងសេចក្តីប្រកាសព័ត៌មានបញ្ជាក់ថា រយៈពេលជិត២ខែ ពោលគឺគិតចាប់ពីថ្ងៃទី១ ខែកុម្ភៈ រហូតដល់ថ្ងៃទី២៤ ខែមីនា ឆ្នាំ២០១៩នេះ អគ្គនាយកដ្ឋានពន្ធដារ និងសមត្ថកិច្ចពាក់ព័ន្ធ បានធ្វើការផាកពិន័យរថយន្តចំនួន ៦ ៣២០ គ្រឿង ដែលមិនបានមកប្រកាសបង់ពន្ធបានទាន់ពេលវេលាស្របតាមការកំណត់ដោយច្បាប់។
អគ្គនាយក នៃអគ្គនាយកដ្ឋានពន្ធដារ លោក គង់ វិបុល បានថ្លែងកាលពីឆ្នាំមុនថា មានយានយន្តប្រមាណ ៥២ម៉ឺនគ្រឿង បានជាប់កាតព្វកិច្ចបង់ពន្ធលើមធ្យោបាយដឹកជញ្ជូនក្នុងឆ្នាំ២០១៧ ប៉ុន្តែ លោកថា ម្ចាស់យានយន្តដែលបានបង់ពន្ធរួចរាល់ក្នុងឆ្នាំ២០១៧នោះ មានចំនួន ៤៨២,០៣៨គ្រឿង ខណៈម្ចាស់យានយន្តចំនួនប្រមាណ ៤ម៉ឺនទៀត មិនបានបង់ពន្ធមធ្យោបាយដឹកជញ្ជូននោះទេ៕