មិនទាន់បាត់ស្នាមជេីងនាយឧត្តមសេនីយ៍ហ៊ូ សាគុណផង ចៅហ្វាយខេត្តមណ្ឌលគិរីបើកដៃឲ្យមេឈ្មួញល្បីឈ្មោះ ដឹកឈើតាមច្រកប៉ុស្តិ៍ប្រាំពីររញ្ជួយដី
មណ្ឌលគិរីៈឈើខុសច្បាប់រាប់រយម៉ែត្រគូបត្រូវបានមេឈ្មួញល្បីឈ្មោះម្នាក់ បានចេញមុខយ៉ាងចំហយកទៅលក់នៅស្រុកយួនតាមប៉ុស្តិ៍ប្រាំពីរនៅយប់ថ្ងៃទី១២ខែធ្នូនេះ ក្រោមការបើក ភ្លើងខៀវពីលោក ស្វាយ សំអ៊ាង អភិបាលខេត្តមណ្ឌលគិរីនិងសមត្ថកិច្ចជំនាញពាក់ព័ន្ធ នេះបើតាមសេចក្តីរាយការណ៍ពីប្រជាសហគមន៍ ដែលរស់នៅក្នុងស្រុកពេជ្រាដា។ ជាក់ស្តែង កាលពីសប្តាហ៍ទី១ ដើមខែធ្នូនេះ នាយឧត្តមសេនីយ៍ ហ៊ូ សាគុណ អគ្គស្នងការរងនគរបាលជាតិនិងជាប្រធាននាយកដ្ឋាននគរបាលការពារព្រំដែនគោក បានចុះទៅត្រួតពិនិត្យបទល្មើសឆ្លងដែននៅចំណុចប៉ុស្តិ៍ប្រាំពីរនេះនិងបានចេញរបាយការណ៍មួយតាមរយៈគេហទំព័រអគ្គស្នងការនគរបាលជាតិថា គ្មានបទល្មើសឈើខុសច្បាប់ឆ្លងដែនទេ តែបានរកឃើញឈើខុសច្បាប់ចំនួនពីគំនរ ដែលក្រុមឈ្មួញដឹកមកលាក់ទុក និងបានរឹបអូសប្រគល់ជូនជំនាញ។បើតាមរបាយការណ៍នេះស្តែងឲ្យឃើញយ៉ាងច្បាស់ថា ការកាប់បំផ្លាញព្រៃឈើនៅក្នុងតំបន់អភិរក្សភ្នំណាំលៀនៅតែកើតមាន ហើយការដឹកជញ្ជូនឈើខុសច្បាប់ចេញទៅលក់នៅស្រុកយួនតាមច្រកប៉ុស្តិ៍ប្រាំពីរនៅតែមានសកម្មភាពយ៉ាងសស្រាក់សស្រាំគ្មានថយចុះឡើយ ដូចអ្វីដែលរបាយការណ៍ថាបានរកឃើញឈើខុសច្បាប់ចំនួនពីរគំនរនៅក្បែរៗចំណុចព្រំដែនមួយនេះ។ ក្រុមអង្គការសង្គមសុីវិលដែលធ្វើការងារពាក់ ព័ន្ធនឹងព្រៃឈើបានលើកឡើងថា របាយ ការណ៍របស់លោកនាយឧត្តមសេនីយ៍ ហ៊ូ សាគុណ ជារបាយការណ៍ភូតកុហករាជរដ្ឋាភិបាលសុទ្ធសាធ ដែលជាទម្លាប់អាក្រក់ដដែលៗរបស់មន្ត្រីខ្មែរ។ក្រុមអង្គសង្គមសុីវិលខាងលើបន្ថែមថា អង្គភាពនគរបាលការពារព្រំដែនគោកវរៈលេខ៣០៣ មានលោក សំរឹទ្ធ ណយ ជាមេ បញ្ជាការ និងលោក ឡោ សុខា ស្នងការខេត្ត មណ្ឌលគិរី ជាមន្ត្រីក្រោមឱវាទ អាចជាប្រភពចំណូលរបស់លោកនាយឧត្តមសេនីយ៍ហ៊ូ សាគុណ និងទំនងមានការសម្រុះសម្រួលជាមួយ លោក ស្វាយ សំអ៊ាង ដើម្បីចែកប្រយោជន៍ផងនោះ ទើបគេហ៊ានចេញរបាយការណ៍កុហកលោក នេត សាវឿន អគ្គស្នងការនគរបាលជាតិបែបនេះ។ ប្រជាសហគមន៍បានរាយការណ៍មកថា ឈើឡាំងបួនជុងប្រភេទ ស្រឡៅ គគី សុក្រំ កកោះនិងប្រភេទឈើប្រណីត រាប់រយម៉ែត្រគូបត្រូវបានបុគ្គលមានអំណាចប្រដាប់ដោយអាវុធគៀងគរក្រុមអ្នកអារឈើរាប់សិបអ្នក ប្រើប្រាស់ម៉ាសុីនត្រង់សុុីន័រ ចូលទៅកាប់បំផ្លាញព្រៃឈើក្នុងតំបន់អភិរក្សភ្នំណាំលៀ ហើយដឹកជញ្ជូនមកដាក់ក្បែរៗផ្លូវតាមរថយន្តកែច្នៃ ហើយបន្តដឹកតាមរថយន្តឡង់គ្រីស័រច្នៃនិងរថយន្តសាំង យ៉ុងទៅលក់នៅព្រំដែនយួន តាមប៉ុស្តិ៍ប្រាំពីរនៅពេលយប់ ក្រោមក្រសែភ្នែកមន្រ្តីអនុរក្សបរិស្ថានដែលហាក់ទទួលបញ្ជាពីព្រះឥន្ទឲ្យចាំតែលូកដៃយកលុយតែប៉ុណ្ណោះ។ សេចក្តីរាយការណ៍បន្តថា មេឈ្មួញម្នាក់ដែលមានរហ័សនាមថាលោកក្របី ជាមេកាជំនិតម្នាក់របស់ឧត្តមសេនីយ៍ ហ៊ុន ជា ដ៏មាន អំណាចក្នុងអាណាចក្រខេត្តមណ្ឌលគិរីបានចេញមុខសារជាថ្មីក្នុងជំនួញឈើខុសច្បាប់នេះបន្ទាប់ពីបាត់មុខមួយរយៈ។ជាក់ស្តែងនៅយប់ថ្ងៃទី១២ធ្នូម្សិលមិញនេះ ឈើខុសច្បាប់គ្រប់ប្រភេទត្រូវមេឈ្មួញល្បីឈ្មោះខាងលើដឹក ជញ្ជូនតាមរថយន្តឡង់គ្រីស័រច្នៃនិងរថយន្តសាំយ៉ុងមិនតិចជាង៥០គ្រឿងចេញតាមច្រកប៉ុស្តិ៍ប្រាំពីរដោយគ្មានមន្ត្រីជំនាញណាមួយចេញមុខបង្ក្រាបឡើយ។សកម្មភាពដឹកជញ្ជូនឈើខុស ច្បាប់យ៉ាងភ្លូកទឹកភ្លូកដីឆ្លងដែនទៅស្រុកយួនបែបអនាធិបតេយ្យនេះ ត្រូវបានប្រជាពល រដ្ឋដែលរស់នៅតាមដងផ្លូវដាក់ការសង្ស័យថា លោកស្វាយ សំអ៊ាង ជាអ្នកបើកដៃទើបអាចធ្វើទៅបាន។ គួរបញ្ជាក់ដែរថា អភិបាលខេត្តមណ្ឌលគិរី លោក ស្វាយ សំអ៊ាង មានរឿងអាស្រូវជាច្រើនពាក់ព័ន្ធនឹងបទល្មើព្រៃឈើខុសច្បាប់ឆ្លងដែនទៅស្រុកយួន ត្រូវបានសម្តេចក្រឡាហោម ស ខេង ធ្វើការព្រមានចំឈ្មោះកាលពីថ្ងៃទី២២ ខែកញ្ញាឆ្នាំ២០១៨នេះ ហើយថ្មីៗនេះក៏មានការបែកធ្លាយឯកសារថាលោក ស្វាយ សំអ៊ាង បានចុះហត្ថលេខាជាមួយភាគីវៀតណាមខេត្តដាក់ណុង លើលិខិតលេខ៣៧១/QD-គមបជចុះថ្ងៃទី៣ ខែមីនា ២០១៧ អនុញ្ញាតិឲ្យមានសក ម្មភាពទិញដូរ នាំចូលទំនិញឈើពីខេត្តមណ្ឌល គិរី ទៅប្រទេសវៀតណាមតាច្រក៧៥១ដោយគ្មានរអែងច្បាប់ឡើយ។ ទាក់ទងនឹងការចោទប្រកាន់ខាងលើនេះ គេហទំព័រដំណឹងពេលថ្ងៃមិនអាចស្វែងរកការបកស្រាយពីលោកស្វាយ សំអ៊ាង អភិបាលខេត្តមណ្ឌគិរីបានឡើយ៕ (ទំនាក់ទំនងការផ្សាយលេខៈ០៧០ ២១៧ ១៩៥)
