អន្តរជាតិ
មេទ័ព និងមេប៉ូលិសថៃ ប្រកាសធ្វើការជាមួយរដ្ឋាភិបាលថ្មី
ក្នុងសន្និសីទកាសែតកាលពីថ្ងៃទី២៨ ខែមីនា ឆ្នាំ២០១៩ មេទ័ព និងមេប៉ូលិសនៃប្រទេសថៃ បានប្រកាសគោលជំហរត្រៀមខ្លួនធ្វើការជាមួយរដ្ឋាភិបាលថ្មី ដោយមិនខ្វល់ថា ជាគណបក្សណាជាអ្នកកាន់អំណាច និងអ្នកណាជានាយករដ្ឋមន្រ្តីនោះឡើយ។
អគ្គមេបញ្ជាការកងទ័ពថៃ លោកនាយឧត្តមសេនីយ៍ Pornpipat Benyasri បាននិយាយថា៖ «យើងមិនអាចធ្វើឱ្យអ្នករាល់គ្នា ក្លាយជាមនុស្សល្អម្នាក់បានឡើយ ប៉ុន្តែយើងអាចជ្រើសរើសមនុស្សល្អ ដើម្បីដឹកនាំយើង។ អ្នករាល់គ្នា (រួមទាំងយោធា និងប៉ូលិស) កំពុងព្យាយាមធ្វើឱ្យល្អបំផុត ក្នុងការធ្វើតាមការណែនាំនេះ»។
យ៉ាងណាក៏ដោយ ពាក្យថា «មនុស្សល្អ» ដែលថ្លែងខាងលើនេះ ត្រូវបានគេសន្មតថា គឺសំដៅទៅលើលោកប្រាយុទ្ធ ចាន់អូចា។
គួរកត់សម្គាល់ថា ការលើកឡើងខាងលើនេះ ធ្វើឡើងក្រោយពេលដែលគណបក្សចំនួន ៧ រួមមាន៖ គណបក្ស Pheu Thai, គណបក្ស Future Forward, គណបក្ស Seri Ruam Thai, គណបក្ស Prachachart, គណបក្ស Puea Chart, គណបក្ស New Economics និងគណបក្ស Thai People Power បានប្រកាសបង្កើតរដ្ឋាភិបាលចម្រុះ កាលពីថ្ងៃទី២៧ ខែមីនា។ គណបក្សទាំងនេះ នឹងរួមបញ្ចូលគ្នា ដើម្បីឈានដល់ចំនួនអាសនៈលើសពី ២៥០អាសនៈក្នុងសភា អាចបង្កើតរដ្ឋាភិបាលចម្រុះមួយបាន៕
