អន្តរជាតិ
លោកស្រី Theresa May ប្រកាសលាលែងពីដំណែងនាយករដ្ឋមន្រ្តីអង់គ្លេស
លោកស្រី Theresa May នៅថ្ងៃសុក្រនេះ បានប្រកាសលាលែងពីដំណែងជានាយករដ្ឋមន្រ្តីអង់គ្លេស ដើម្បីទុកឱកាសឲ្យមេដឹកនាំក្រោយធ្វើការដោះស្រាយបញ្ហាទាក់ទងនឹងការចាកចេញរបស់ប្រទេសនេះពីសហភាពអឺរ៉ុបឲ្យបានឆាប់។
តាមការចុះផ្សាយរបស់ទីភ្នាក់ងារសារព័ត៌មានរ៉យទ័រ លោកស្រី Theresa May នឹងលាលែងដំណែងជាប្រធានបក្សអភិរក្សនិយម នៅថ្ងៃទី៧ ខែមិថុនា ដើម្បីឲ្យក្រុមមេដឹកនាំមកពីគណបក្សអ្នកស្រីអាចប្រកួតប្រជែងគ្នាក្នុងបក្ស ដើម្បីទទួលបានដំណែងជានាយករដ្ឋមន្រ្តី។ ទោះយ៉ាងណាក៏ដោយ លោកស្រី Theresa May នឹងនៅកាន់ដំណែងជានាយរដ្ឋមន្រ្តីចាំផ្ទះរហូតជ្រើសរើសនាយករដ្ឋមន្រ្តីថ្មីបាន។
លោកស្រី Theresa May បានឡើងកាន់ដំណែងជានាយករដ្ឋមន្រ្តីអង់គ្លេសកាលពីខែកក្កដា ឆ្នាំ២០១៦ បន្ទាប់ពីលោក David Cameroon បានលាលែង។ ការចុះចេញពីដំណែងរបស់លោក David Cameroon នាពេលនោះ ធ្វើឡើងក្រោយពីរដ្ឋាភិបាលរបស់លោកបានធ្វើការស្ទង់មតិមួយថា តើអង់គ្លេសគួរតែនៅក្នុងសហភាពអឺរ៉ុបទៀតឬទេ។ ជាលទ្ធផល ពលរដ្ឋប្រទេសនេះដល់ទៅ ៥២ភាគរយ សម្រេចចិត្តចាកចេញពីសហភាពអឺរ៉ុប៕
