អន្តរជាតិ
នាយករដ្ឋមន្ត្រីបញ្ជាក់ថា សាច់ញាតិរបស់លោកមិនមែនសុទ្ធតែអ្នកធំទេ
ភ្នំពេញ៖បើទោះបីលោកស្ថិតនៅក្នុងតួនាទីជានាយករដ្ឋមន្ត្រីក្ដី ប៉ុន្តែសាច់ញាតិលោកទាំងអស់មិនមែនសុទ្ធតែមានតួនាទីធំៗនោះទេ ។ នេះបើតាមការបញ្ជាក់របស់លោកនាយករដ្ឋមន្ត្រី ហ៊ុន សែន នៅក្នុងពិធីសំណេះសំណាលជាមួយសិស្សជាប់និទ្ទេស A នាព្រឹកថ្ងៃទី០៨ វិច្ឆិកា នេះ ឯវិមានសន្តិភាព ។
លោក ហ៊ុន សែន បានថ្លែងថា មិនមែនសុទ្ធតែយកសាច់ញាតិមកធ្វើជាមន្ត្រីនោះទេ ។ ដោយនាយករដ្ឋមន្ត្រីរូបនេះបានរៀបរាប់ថា បងប្រុសរបស់លោកម្នាក់មិនមានតួនាទីអ្វីទាំងអស់ ហើយប្អូនរបស់លោក ក៏មិនមានតំណែងដែរ , ចំណែកប្អូនជីដូនមួយម្នាក់កំពុងធ្វើកម្មកររោងចក្រ។
សេចក្ដីថ្លែងបែបនេះ របស់នាយករដ្ឋមន្ត្រីកម្ពុជា គឺក្រោយពីមានការរិះគន់យ៉ាងចម្រូងចម្រាសដែលថា ក្រសួងរដ្ឋមួយចំនួននៃ រដ្ឋាភិបាលលោក ហ៊ុន សែន បានក្លាយជាក្រសួងគ្រួសារ ជាប់រយីងរយោងដោយសែបក្ខពួក ដែលវាត្រូវបានគេលើកឧទាហរណ៍ភ្ជាប់ ដូចជាកូនលោក រដ្ឋមន្ត្រីក្រសួងរ៉ែ និងថាមពល ឈ្មោះ ស៊ុយ ឌីម៉ង់ ត្រូវបានតែងតាំងជារដ្ឋលេខាធិការ ខណៈ ឪជារដ្ឋមន្ត្រី ក្នុងរសួងតែមួយនោះ ។ ដែលរបៀបគ្នានេះក៍កើតមាននៅក្រសួងដទៃៗទៀតដែរ ។
យ៉ាងណាក៍ដោយលោកនាយករដ្ឋមន្ត្រីចាស់វស្សារូបនេះបានលើកលេសសម្រន់ភាពអៀនខ្មាស់ថា កូនៗរបស់លោកសុទ្ធតែជាមនុស្ស ជាពលរដ្ឋខ្មែរ ហើយសុទ្ធតែបញ្ចប់ការសិក្សាថ្នាក់បណ្ឌិត អនុបណ្ឌិត តើមិនឲ្យគេធ្វើការទេអី ? កូនមន្ត្រីខ្លះ ក៏បញ្ចប់ការសិក្សាខ្ពស់ដែរ តើមិនឲ្យគេធ្វើការទេអី? ។ ប៉ុន្តែបើទោះជាដូច្នេះក្ដីមជ្ឈដ្ឋានខ្លះបានលើកឡើងថា មានមន្ត្រីមួយចំនួនធំមានសមត្ថភាព មានអតីតភាព តែពួកគេគ្មានវាសនាមានតួនាទីធំឡើយ ដែលខុសពីកូនពួកអស់លោក កើតប៉េកឡើងធ្វើធំតែម្ដង ៕ សិលាពល