អន្តរជាតិ
ហេតុអ្វីបានជាលោកត្រាំអវត្តមាននៅក្នុងពិធីបុណ្យសពលោក John McCain?
សារព័ត៌មាន news York times បានផ្សាយថា ប្រធានាធិបតីអាមេរិកលោក Donald Trump មិនត្រូវបានអញ្ជើញឱ្យចូលរួមពិធីបុណ្យសពរបស់សមាជិកព្រឹទ្ធសភាចចម៉ាក់ខេនដែលធ្វើឡើងនៅវិហារជាតិនៅរដ្ឋធានីវ៉ាស៊ីនតោន។
ជាយូណាសមកហើយ លោកត្រាំនិងលោកម៉ាក់ខេនមានទំនាក់ទំនងមិនល្អនឹងគ្នា។អតីតសមាជិកព្រឹទ្ធសភាអាមេរិករូបនេះ តែងតែរិះគន់ពីគោលនយោបាយអន្តោប្រវេសន៍របស់លោកប្រធានាធិបតី Trump ដូចជាការចោទប្រកាន់ដែលថារុស្ស៊ីបានជ្រៀតជ្រែកក្នុងការបោះឆ្នោតប្រធានាធិបតីអាមេរិកឆ្នាំ 2016 ។
លោក ម៉ាក់ខេន ក៏បានវាយប្រហារជាសាធារណៈលើ លោក Trump នៅក្នុងកិច្ចប្រជុំកំពូល Helsinki ជាមួយប្រធានាធិបតីរុស្ស៊ីលោកវ្ល៉ាឌីមៀរពូទីនព្រមទាំងកិច្ចប្រជុំកំពូលរបស់អង្គការណាតូ នាពេលថ្មីៗនេះ។
នៅពេលនេះ បញ្ចីឈ្មោះផ្ញៀវ អញ្ជើញទៅចូលរួមពិធីបុណ្យសពលោក McCain មានអតីតប្រធានាធិបតីអាមេរិក ពីររូប គឺ លោកអូបាម៉ា និង លោក ប៊ូស ។ ចំណែកអនុប្រធានាធិបតីអាមេរិក លោក Mike Pence ក៏បានទៅចូលរួមផងដែរ ។
សមាជិកព្រឹទ្ធសភាអាមេរិក លោក John McCain បានស្លាប់នៅរសៀលថ្ងៃទី២៥ខែសីហា ក្នុងជន្មាយុ៨១ឆ្នាមដោយសារតែជម្ងឺមហារីកខួរក្បាល។ នៅក្នុងពិធីបុណ្យសពមានមន្ត្រីជាន់ខ្ពស់ជាច្រើនបានទៅចូលរួម លើកលេងតែ ប្រធានាធិបតីដូណាលត្រាំ ដោយសារតែ មុនពេល លោក McCain ស្លាប់ បានផ្ដាំមិនឱ្យលោក ដូណាល់ ត្រាំ ចូលរួមក្នុងពិធីបុណ្យសពរបស់លោកឡើយ។
ប៉ុន្តែបើគេនៅចាំមិនភ្លេចទេ កាលពីខែឧសភាកន្លងទៅ លោក McCain ធ្លាប់បានបង្ហើបពីគោលបំណងចុងក្រោយរបស់ខ្លួន នោះគឺ ថាលោកមិនចង់ឱ្យប្រធានាធិបតីអាមេរិក លោក ដូណាល់ ត្រាំ ចូលរួមក្នុងពិធីបុណ្យសពរបស់លោកឡើយ។ លោក ដូណាល់ ត្រាំ និងលោក McCain ដែលសុទ្ធតែជាអ្នកនយោបាយមកពីគណបក្សសាធារណរដ្ឋបានបង្ហាញពីការមិនពេញចិត្តដាក់គ្នា និងខ្វែង គំនិតគ្នាជាច្រើន។
ជាពិសេស នៅពេលដែលលោក ត្រាំ ត្រូវបានតែងតាំងជាបេក្ខជនប្រធានាធិបតីអាមេរិក កាលពីឆ្នាំ២០១៥ និងនៅក្រោយ ប្រធានាធិបតីអាមេរិកបច្ចុប្បន្នរូបនេះ និយាយថាជនអន្តោប្រវេសន៍មិចស៊ីកូមួយចំនួនគឺជាឧក្រិដ្ឋជន។ លោក McCain នៅពេល នោះ ក៏បានថ្កោលទោសយ៉ាងខ្លាំងលើលោកត្រាំផងដែរ ថាបានប្រើភាសាឆ្កួតលាលី។
ចំណែកឯ លោកត្រាំ វិញក៏មិនបានបង្អង់យូរដែរ ដោយលោកហៅលោក McCain ថាជាមនុស្សល្ងង់ដែលសឹងតែមិនអាចបញ្ចប់ ការសិក្សាពីបណ្ឌិតសភាកងទ័ពជើងទឹកអាមេរិក។ ចាប់ពីពេលនោះមក អ្នកទាំងពីរនៅតែបន្តខ្វែងគំនិតគ្នាជាបន្តបន្ទាប់ រហូតដល់ ប្រភពស្និទនឹងលោក McCain បានប្រាប់ប្រព័ន្ធផ្សព្វផ្សាយអាមេរិកថា លោកបានដាក់លោក ត្រាំ នៅក្នុងបញ្ជីខ្មៅដែលលោកផ្ទាល់ មិនចង់ឱ្យចូលរួមក្នុងពិធីបុណ្យសពរបស់លោក។
គួរបញ្ជាក់ថា លោក McCain បានទទួលមរណភាព នៅថ្ងៃអាទិត្យនេះ (ត្រូវនឹងថ្ងៃសៅរ៍ម៉ោងនៅសហរដ្ឋអាមេរិក)។ លោក McCain ត្រូវបានគ្រូពេទ្យធ្វើរោគវិនិច្ឆ័យរកឃើញថា មានជំងឺដុះដុំសាច់ក្នុងខួរក្បាលកាលពីឆ្នាំ២០១៧។ ដោយឡែក គ្រួសាររបស់លោកវិញ ក៏បានឱ្យដឹងផងដែរថា សមាជិកព្រឹទ្ធសភារូបនេះដែលបានចាកចេញពីទីក្រុងវ៉ាស៊ីនតោន កាលពីខែធ្នូកន្លងទៅ បានសម្រេចបញ្ឈប់ការព្យាបាល កាលពីថ្ងៃសុក្រ៕