អន្តរជាតិ
អផ្សុក ! គូបដិបក្ខក្នុងនយោបាយកម្ពុជា បង្កើតល្បែងភ្នាល់រឿងដោះ ឬ មិនដោះលែងលោក កឹម សុខា
ភ្នំពេញ៖ទំនងជាការចង់អបអរសាទរចំពោះទិវាបុណ្យឯករាជ្យជាតិ ទើបថ្ងៃទី០៩ វិច្ឆិកា នេះ ដែលជាខួបលើកទី៦៥ នៃទិវាបុណ្យឯករាជ្យជាតិកម្ពុជា អ្នកនយោបាយដែលជាគូបដិបក្ខនោះគឺលោក សម រង្ស៊ី និងលោក ហ៊ុន សែន បានបបួលគ្នាភ្នាល់ រឿងដោះលែង ឬមិនដោះលែងលោក កឹម សុខា ប្រធានគណបក្សសង្គ្រោះជាតិ ដែលកំពុងជាប់ឃុំនៅក្នុងផ្ទះឯខណ្ឌទួលគោក ។
លោក កឹម សុខា មេដឹកនាំគណបក្សសង្គ្រោះជាតិ ដែលមានសម្លេងគាំទ្រក្នុងការបោះឆ្នោតស្ទើរប្រហែលគ្នា នឹងគណបក្សប្រជាជនកម្ពុជាដែលកាន់អំណាច ត្រូវបានតុលាការ នៃបក្សកាន់អំណាចចោទប្រកាន់ពីបទឃុបឃិតជាមួយបរទេសដើម្បីផ្ដួលរំលំរដ្ឋាភិបាល ហើយបានសម្រេចឃុំខ្លួនដាក់ពន្ធនាគារត្រពាំងផ្លុង ក្នុងខេត្តកំពង់ចាមកាលពីថ្ងៃទី០៣ កញ្ញា ឆ្នាំ ២០១៧ ។ ការឃុំខ្លួនមេដឹកនាំបក្សប្រឆាំងរូបនេះ បានបើកដៃឲ្យបក្សកាន់អំណាចឈានទៅឆក់ប្រមូលយកអាសនៈមេឃុំ និងក្រុមប្រឹក្សាឃុំ ស្រុក ខេត្ត ដែលបក្សប្រឆាំងទទួលបានយ៉ាងលើសលប់គ្មានសល់ ។ ហើយនៅចុងបញ្ចប់បានបិទផ្លូវគណបក្សនេះមិនឲ្យចូលរួមក្នុងការបោះឆ្នោតអាណត្តិទី៦ ដែលជាការផ្ដល់ឱកាសឲ្យបក្សប្រជាជនកម្ពុជាជិះសេះលែងដៃ ដែលបើទោះបីជាមានការិះគន់ពីប្រជាពលរដ្ឋ ក៍ដូចជាសហគមន៍អន្តរជាតិយ៉ាងចម្រូងចម្រាសក្ដី ។ នៅទីបំផុតការតវ៉ា បានក្លាយទៅជាផ្នែកមួយដែលនាំឲ្យមានការដោះលែងលោក កឹម សុខា ពីពន្ធនាគារត្រពាំងផ្លុង កាលពីថ្ងៃទី១០ កញ្ញា ឆ្នាំ ២០១៨ ដោយយកមកឃុំខ្លួននៅក្នុងផ្ទះវិញ ។
ពេលនេះលោក សម រង្ស៊ី អតីតមេដឹកនាំគណបក្សសង្គ្រោះជាតិ ដែលគេស្គាល់ថា ក៍ជាអ្នកវិភាគទីផ្សារភាគហ៊ុន ដ៍ខ្លាំងម្នាក់នៅអឺរ៉ុបដែរនោះ បានលើកឡើងនៅលើទំព័រហ្វេសប៊ុក ផ្ទាល់ខ្លួនថា ក្រោមសម្ពាធអន្តរជាតិ លោក ហ៊ុន សែន នឹងត្រូវបង្ខំចិត្តដោះលែងលោក កឹម សុខា ក្នុងពេលឆាប់ៗខាងមុខនេះ ។ អាចថ្ងៃទី២៩ ធ្នូ ឆ្នាំ ២០១៨ ឬ ក៍យ៉ាងយូរបំផុតថ្ងៃទី០៣ ខែ មិនា ឆ្នាំ ២០១៩ ។ ដោយអតីតមេដឹកនាំបក្សប្រឆាំងរូបនេះ បានបបួលលោក ហ៊ុន សែន ភ្នាល់ , បើស្ថានភាពកើតឡើងដូចការអះអាងរបស់គាត់ គាត់សុំឲ្យលោក ហ៊ុន សែន ចុះចេញពីអំណាច តែបើពុំដូច្នោះទេ គាត់នឹងដើរមកឲ្យរដ្ឋាភិបាលក្រុងភ្នំពេញចាប់ខ្លួនតែម្ដង ។
ភ្លាមៗជាការឆ្លើយតមលោកនាយករដ្ឋមន្ត្រី ហ៊ុន សែន បានប្រកាសប្រាប់ប្រព័ន្ធផ្សព្វដែលស្និទ្ធនឹងលោកថា « ខ្ញុំហ៊ានភ្នាល់ជាមួយលោក សម រង្ស៊ី បើសិនមានការដោះលែង កឹម សុខា មែន ។ ខ្ញុំ ហ៊ុន សែន សុខចិត្តចុះចេញពីតំណែងតាមការបបួលភ្នាល់របស់ សម រង្ស៊ី ។ ប៉ុន្តែបើលោក កឹម សុខា មិនត្រូវបានដោះលែងវិញនោះ នៅចន្លោះពីថ្ងៃទី២៩ ខែធ្នូ ឆ្នាំ២០១៨ រហូតដល់ថ្ងៃទី០៣ ខែមីនា ឆ្នាំ២០១៩ទេ , លោក សម រង្ស៊ី ត្រូវហ៊ានចុះចាញ់ទទួលស្គាល់ការភ្នាល់របស់ខ្លួន ដោយចូលមកឲ្យចាប់ខ្លួនភ្លាមៗបន្ទាប់ពីបញ្ចប់ការភ្នាល់ »។
ក្នុងស្ថានភាពបែបនេះត្រូវបានគេមើលឃើញថា រឿងរ៉ាវនយោបាយដ៍ភ្លូកទឹកភ្លូកដីរវាងបក្សប្រឆាំង និងបក្សកាន់អំណាចនៅកម្ពុជា ទីបំផុតទៅមានជម្រៅចង់យ៉ាប់ជាងក្ដិតប៉ាន់តែ ៕ ដោយ៖ កែវ វិទូរ្យ