ព័ត៌មានជាតិ
កម្ពុជាជាប់លេខ១០ នៃប្រទេសដែលប្រជាជនមានសុខភាពល្អជាងគេលើពិភពលោក
ពិតជាមោទកភាពណាស់ ដែលប្រទេសកម្ពុជាត្រូវបានចាត់បញ្ចូលទៅក្នុងបញ្ជីចំណាត់ថ្នាក់កំពូលទាំង ១០ នៃប្រទេសដែលប្រជាជនមានសុខភាពល្អជាងគេនៅលើពិភពលោក ខណៈប្រទេសមានសេដ្ឋកិច្ចធំៗដូចជាសហរដ្ឋអាមេរិកជាដើម បានធ្លាក់មកឈរនៅលេខរៀងទី ៣៧ ឯណោះ ។
តាមរបាយការណ៍ចុងក្រោយអង្គការអន្តរជាតិធំមួយគឺ Global Wellness ដែលដកស្រង់ចេញផ្សាយដោយសារព័ត៌មានសិង្ហបុរី Straistimes នៅព្រឹកថ្ងៃអង្គារទី ៥ ខែមីនា ឆ្នាំ ២០១៩ នេះ ប្រទេសដែលឈរនៅលេខរៀងទី ១ ក្នុងនាមជាប្រទេសមានប្រជាជនមានសុខភាពល្អជាងគេ ក្នុងចំណោមប្រទេសដែលត្រូវបានធ្វើការស្ទាបស្ទង់ចំនួន ១៥១ ប្រទេសនោះគឺប្រទេសកាណាដា ហើយលេខ ២ បានទៅលើប្រទេសអូម៉ង់ និង លេខ ៣ បានទៅប្រទេសអ៊ីស្លង់ ។
ប្រទេសនៅទ្វីបអាស៊ីភាគច្រើន ត្រូវបានគេមើលឃើញថា សុទ្ធតែបានជាប់ឈ្មោះក្នុងបញ្ជីកំពូលទាំង ១០ ដែលមានដូចជាប្រទេសហ្វីលីពីន ជាប់លេខ ៤, ម៉ាល់ឌីវ លេខ ៥, ហូឡង់ លេខ ៦, សិង្ហបុរី លេខ ៧, ឡាវ លេខ ៨, កូរ៉េខាងត្បូង លេខ ៩ និង ប្រទេសកម្ពុជាឈរនៅលេខរៀងទី ១០ ។
ការចេញផ្សាយរបាយការណ៍របស់អង្គការ The Global Wellness នៅក្នុងសប្ដាហ៍នេះ គឺធ្វើឡើងដោយផ្អែកលើមូលដ្ឋាននៃការដាក់ពិន្ទុលើ ១០ ធំៗក្នុងនោះមានដូចជាកត្តា សម្ពាធឈាម, ជាតិស្ករនៅក្នុងឈាម, ជាតិខ្លាញ់ ឬ ធាត់, ការបាក់ទឹកចិត្ត, សុភមង្គល, ការប្រើប្រាស់ជាតិស្រវឹង, ការប្រើប្រាស់ថ្នាំជក់, ការធ្វើលំហាត់ប្រាណ, អត្រាលទ្ធភាពសង្ឃឹមរស់ និង ការចំណាយរបស់រដ្ឋាភិបាលនៃប្រទេសនីមួយៗ ទៅលើវិស័យសុខាភិបាលជាដើម ៕