ព័ត៌មានជាតិ
លោក យឹម សុជាតិ និងលោក ម៉ៅ រង្សី ប្រឹងច្របាច់កឈ្មួញដឹកទំនិញចូលក្រុងភ្នំពេញ យកទៅណា?
ទំនាក់ទំនងការផ្សាយៈ 071 78 88 345
ភ្នំពេញ៖ ថ្មីៗនេះ លោក យឹម សុជាតិ នាយ ការិយាល័យនគរបាលប្រឆាំងបទល្មើសសេដ្ឋ កិច្ច និងលោក ម៉ៅ រង្សី ជំនួយការផ្ទាល់ស្នងការដ្ឋាននគរបាលរាជធានីភ្នំពេញ ទទួលផែនសេដ្ឋ កិច្ចដែលទើបទទួលបានការតែងតាំង បានរងការរិះគន់យ៉ាងខ្លាំងពី សំណាក់ក្រុមឈ្មួញរកស៊ីដឹកទំនិញ ពីព្រំដែនប្រទេសវៀតណាមនិងប្រទេសថៃ ថាបានប្រើអំណាចលោកស្នងការថ្មី គាបបង្ខំឲ្យបង់ប្រាក់ទ្វេរគុណលើសមុនទៅ ទៀត។
ក្រុមឈ្មួញដឹកទំនិញបានរាយការណ៍ឲ្យដឹងថា បន្ទាប់ពីលោក ស ថេត ចូលមកកាន់តំណែងជាស្នង ការរាជធានីភ្នំពេញលោក យឹម សុជាតិ ដែលជានាយការិយាល័យនគរបាលប្រឆាំងបទល្មើសសេដ្ឋកិច្ច ហាក់បានមានអំណាចកាន់តែខ្លាំង ដោយបង្ខំឲ្យពួកគាត់បង់លុយក្រោមតុកាន់តែច្រេីនជាមុន(ថ្លៃបាយទឹក មិនមែនបង់ចូលរដ្ឋទេ)ដែលកាលពីមុនបង់ត្រឹម២០០ទៅ៣០០ ដុល្លារប៉ុណ្ណោះ។ហើយថ្មីៗនេះ លោក ស ថេត ក៍បានតែងតាំងលោក ម៉ៅ រង្សី ដែលជាមនុស្ស ជំនិតរបស់ខ្លួនតាំងពីនៅខេត្តបាត់ដំបង ជាជំនួយការផ្ទាល់ទទួលផែនសេដ្ឋកិច្ច ដោយសារបុគ្គលរូបនេះមានជំនាញច្បាស់លាស់ខាងប្រ មូលលុយកខ្វក់ ហើយស្មោះត្រង់មេកើយផងដែរឲ្យជួយលើកិច្ចការនេះ។
ជាក់ស្តែងដូចលោក ស ថេត ស្នងការរាជធានីភ្នំពេញបានលើកឡើងកាលពីពេលថ្មីៗនេះថា ទំនិញមិនប្រក្រតីក្នុងមួយថ្ងៃៗរាប់រយរថយន្ត ត្រូវបានក្រុមឈ្មួញនិងក្រុមហ៊ុននានាសម្រុកដឹកចូលមកក្នុងក្រុងភ្នំពេញ និងបានសំណូមពរកុំឲ្យអ្នកមានអំណាចប្រដាប់អាវុធលូកដៃ ដើម្បីងាយស្រួលក្នុងការអនុវត្តច្បាប់ ប្រមូលលុយចូលជាតិ( sic )។ តែការលើកឡើងបែបនេះ ត្រូវបានក្រុមឈ្មួញរកស៊ីដឹកទំនិញថា ជាការគោះទឹកបង្អើលត្រី ឲ្យរត់ចូលទ្រូទៅវិញទេីបត្រូវ ព្រោះទង្វើរបស់លោក យឹម សុជាតិ និងលោក ម៉ៅ រង្សី ជាកូនចៅជំនិតរបស់គាត់បានបង្ហាញយ៉ាងច្បាស់ក្រឡែត។
មន្ត្រីនគរបាលមួយរូបសុំមិនបញ្ចេញឈ្មោះបាននិយាយបែបលែបខាយថា លោក យឹម សុជាតិ នាយការិយាល័យនគរបាលប្រឆាំងបទ ល្មើសសេដ្ឋកិច្ច ពិតជាពូកែខាងរកសេដ្ឋកិច្ចមែនហើយទើបថ្នាក់លើតែងតាំងគាត់ តែត្រង់ ថាគាត់ពូកែប្រមូលុយយកទៅណា?យកចូលរដ្ឋប៉ុន្មានភាគរយ? យកធ្វើមានបានខ្លួនឯងប៉ុន្មាន?យកឲ្យលោក ស ថេត ប៉ុន្មានក្នុងមួយ ខែៗ? សំណួរនេះ សួរលោក យឹម សុជាតិ ទៅដឹងហើយ(sic)។មន្ត្រីនគរបាលរូបនេះបន្ថែមឲ្យដឹងថា បទល្មើសសេដ្ឋកិច្ចក្នុងក្រុងភ្នំពេញរាប់មិនអស់ ទំនិញគ្រប់ប្រភេទដែលហូរចូលមកពីក្រៅប្រទេសភាគច្រើនមិនប្រក្រតី បង់ពន្ធមិនគ្រប់ ទំនិញគេចពន្ធ ត្រូវបានក្រុមហ៊ុនបុគ្គលឈ្មួញមានអំណាច នាំចូលតាមរថយន្តធំៗ និងរថយន្តក្រុងរាប់រយឡានក្នុងមួយថ្ងៃៗ ជាឆ្នាំងបាយយ៉ាងសំខាន់។ហើយឃ្លាំងស្តុកទំនិញទាំងនេះរាប់រយកន្លែង ឃ្លាំងស្តុកឈើខុសច្បាប់រាប់សិបកន្លែង ទីតាំងផលិត ផលិត ផលខុសស្តង់ដារ គ្មានច្បាប់រាប់រយទីតាំង សុទ្ធ តែត្រូវបានបង់លុយជាកញ្ចប់ប្រចាំខែទើបអាចរកសុីបាន។ បើមានលុយ ទំនិញមិនប្រក្រតីទាំងនោះគឺមានច្បាប់ លុយគឺជាច្បាប់ បើគ្មានលុយបង់ គេចាប់ផ្យាយតាមទូរទស្សន៍យកល្បីឈ្មោះតាអញ្ចឹង ដូចមហាជនបានឃើញស្រាប់។
ក្រុមឈ្មួញរកស៊ីបានលើកឡើងថា ការប្រើអំ ណាចជាប្រធានការិយាល័យនគរបាលប្រឆាំងបទល្មើសសេដ្ឋកិច្ចរបស់លោក យឹម សុជាតិ និងលោក ម៉ៅ រង្សី ដែលជាបុគ្គលមានជំនាញខាងប្រមូលលុយកខ្វក់បែបនេះ វាទាល់តែមានការបើកដៃពីលោក ស ថេត ស្នងការរាជធានីភ្នំពេញទើបធ្វើទៅបាន ដែលគេហៅថាខំស្រង់ដើមថ្លៃសូកយកតំណែង។
មតិជាច្រើននិយាយថា នាយឧត្តមសេនីយ៍ នេត សាវឿន អគ្គស្នងការនគបាលជាតិ មិនគួរមើលរំលងបញ្ហានេះទេ ព្រោះលោក ស ថេត កំពុងពង្រឹងបណ្តាញប្រមូលលុយតាមគ្រប់រូបភាព ជាពិសេសតាមរយៈក្រុមមន្រ្តីនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលរាជធានីភ្នំពេញ។
ទាក់ទងនឹងការចោទប្រកាន់ខាងលើនេះ នៅមិនទាន់អាចស្វែងរកការបកស្រាយបំភ្លឺពីលោក យឹម សុជាតិ និងលោកម៉ៅ រង្សី បាននៅឡើយទេ ដោយសារទូរស័ព្ទចូលគ្មានអ្នកលើក៕