ព័ត៌មានជាតិ
រដ្ឋមន្ត្រីក្រសួងទេសចរណ៍ អង្វរឲ្យពលរដ្ឋ ឈប់កាប់បំផ្លាញព្រៃឈើ ដោយងាកមកថែរក្សាទុកបម្រេីវិស័យទេសចរណ៍វិញ
ក្នងឱកាសជួបសំណេះសំណាលជាមួយប្រជាពលរដ្ឋ នៅសហគមន៍ទេសចរណ៍ទឹកធ្លាក់អន្លង់ស្វាយ ស្ថិតក្នុងភូមិក្បាលទឹក ឃុំក្បាលទឹក ស្រុកទឹកផុស ខេត្តកំពង់ឆ្នាំង ឯកឧត្តម ថោង ខុនរដ្ឋមន្ត្រីក្រសួងទេសចរណ៍ បានស្នើយ៉ាងទទូចដល់ប្រជាពលរដ្ឋ សូមបញ្ឈប់ការកាប់បំផ្លាញព្រៃឈើ បរបាញ់សត្វ ហើយងាកមកខិតខំរួមគ្នាថែរក្សាការពារធនធានធម្មជាតិទាំងនោះ ទុកសម្រាប់បម្រើដល់វិស័យទេសចរណ៍ ដែលទទួលបានប្រាក់ចំណូលច្រើនជាងការបំផ្លាញ។
ឯកឧត្តមរដ្ឋមន្ត្រីបានលើកឡើងថា រាជរដ្ឋាភិបាលបានយកចិត្តទុកដាក់ក្នុងការបង្កើត និងរៀបចំតំបន់អេកូទេសចរណ៍ តំបន់ទេសចរណ៍ធម្មជាតិ ពិសេសគឺវិស័យទេសចរណ៍សហគមន៍ព្រោះថាវិស័យទេសចរណ៍សហគមន៍នេះ គឺមានប្រយោជន៍សំខាន់ណាស់ក្នុងការជួយដល់ការការពារនូវធនធានធម្មជាតិ មានព្រៃឈើ សត្វព្រៃជាដើម។
ឯកឧត្តម បន្តថា ទាំងអង្គការទេសចរណ៍ពិភពលោក ទាំងអាស៊ាន និងរាជរដ្ឋាភិបាលកម្ពុជា បានខិតខំជំរុញវិស័យទេសចរណ៍សហគមន៍នេះយ៉ាងខ្លាំង ដោយមានការចងក្រងប្រជាពលរដ្ឋទៅជាសហគមន៍ទេសចរណ៍ ដើម្បីបង្វែរពីការកាប់បំផ្លាញព្រៃឈើ និងការបរបាញ់សត្វ មកជាការការពារធនធានធម្មជាតិទាំងនោះវិញ។
បើតាមរដ្ឋមន្ត្រីទេសចរណ៍ ការអភិវឌ្ឍសហគមន៍ទេសចរណ៍ ក៏ត្រូវការការចូលរួមពីភាគីពាក់ព័ន្ធចំនួន ៤ផ្នែក ដែលរួមមាន ផ្នែកសាធារណៈ គឺរដ្ឋាភិបាលថ្នាក់ជាតិ និងថ្នាក់ក្រោមជាតិ រួមជាមួយដៃគូរអភិវឌ្ឍជាតិ និងអន្តរជាតិ ផ្នែកឯកជន មានការីទេសចរណ៍ ទីភ្នាក់ងារទេសចរណ៍ និងធុរជនទេសចរណ៍ ព្រមទាំងប្រជាសហគមន៍ និងទេសចរណ៍ ព្រោះប្រជាសហគមន៍ជាបញ្ហាគន្លឹះ ដែលពួកគាត់ត្រូវឆ្លងកាត់ការអប់រំបណ្តុះបណ្តាល ដើម្បីឱ្យពួកគាត់យល់អំពីគុណតម្លៃ និងអត្ថប្រយោជន៍ជា ពិសេស ចំណូលថវិកា ដែលបានពីសកម្មភាពទេសចរណ៍ ជាជាងចំណូល ដែលបានមកពីការប្រមាញ់សត្វព្រៃ និងការកាប់បំផ្លាញ់ព្រៃឈើ៕