សេដ្ឋកិច្ច
ព្រលានយន្តហោះភ្នំពេញ មានកំណើនអ្នកដំណើរលឿនជាងគេក្នុងពិភពលោក នៅឆ្នាំ២០១៨
ក្នុងចំណោមព្រលានយន្តហោះចំនួន២០ ដែលមានកំណើនអ្នកដំណើរលឿនជាងគេក្នុងពិភព លោក គឺមាន ១៥ហើយស្ថិតក្នុងតំបន់អាស៊ី។ ក្នុងនោះព្រលានយន្តហោះអន្តរជាតិភ្នំពេញ របស់កម្ពុជា គឺមានកំណើនខ្ពស់ជាងគេបំផុត។ នេះបើតាមការចុះផ្សាយរបស់ Reuters កាលពីពេលថ្មីៗនេះ ដែលដកស្រង់ចេញពីរបាយការណ៍ស្រាវជ្រាវរបស់ Routesonline។
តាមរបាយការណ៍នេះបង្ហាញថា នៅឆ្នាំ២០១៨ ព្រលានយន្តហោះភ្នំពេញ ទទួលបានអ្នកដំណើរចំនួន ៦ ២៥២ ៥៦៨នាក់ (ជាង ៦,២៥លាននាក់) ខណៈឆ្នាំ២០១៧ ទទួលបាន ៤ ៥១៨ ០៨៦នាក់ (ជាង ៤,៥លាននាក់) ស្មើនឹងកំណើន ៣៨,៤% គឺជាកំណើនលឿនជាងគេបង្អស់ស្ថិតក្នុងលំដាប់ទី១។ តាមពីក្រោយដោយព្រលានយន្តហោះ Jinjiang ប្រទេសចិន ដែលមានកំណើនអ្នកដំណើរ ៣១,៩% និងទី៣ បានទៅលើព្រលានយន្តហោះ Semarang ប្រទសឥណ្ឌូណេស៊ី ដែលមានកំណើនអ្នកដំណើរ ២៩,៦%។
សូមជម្រាបថា ការស្រាវជ្រាវចំនួនអ្នកដំណើរនេះ គឺគ្របដណ្តប់ព្រលានយន្តហោះទាំងអស់គិតចាប់ពីខែមករា ដល់ខែធ្នូ ឆ្នាំ២០១៨ ដោយប្រើទិន្នន័យបឋមដែលផ្តល់ដោយ Sabre Market Intelligence ហើយធ្វើការប្រៀបធៀបជាមួយទិន្នន័យក្នុងរយៈពេលដូចគ្នាកាលពីឆ្នាំ២០១៧។
គួរកត់សម្គាល់ដែរថា អាកាសយានដ្ឋានអន្តរជាតិទាំង៣របស់កម្ពុជា (ភ្នំពេញ សៀមរាប ព្រះសីហនុ) បានជាប់កំណត់ត្រាខ្ពស់ដំបូងបំផុត ដោយទទួលបានអ្នកដំណើរ ១០លាននាក់ ក្នុងឆ្នាំ២០១៨ ខណៈឆ្នាំ២០១៧ ទទួលបាន ៨,៨លាននាក់។
តួលេខរបស់ក្រុមហ៊ុន Cambodia Airports បានឲ្យដឹងថា ចំនួនការធ្វើចរាចរណ៍យន្តហោះសរុប ពោលគឺចំនួនយន្តហោះចេញដំណើរ និងចុះចត នៅក្នុងព្រលានយន្តហោះទាំង ៣ រួមគ្នាមានចំនួន ១០៤ ៨០៥ កាលពីឆ្នាំ ២០១៨។ នៅក្នុងចំណោមនោះ ព្រលានយន្តហោះភ្នំពេញទទួលបានការធ្វើចរាចរណ៍ ៥២ ២១៧ សៀមរាបមានចំនួន ៤៤ ៣១៤ ខណៈដែលក្រុងព្រះសីហនុ មានចំនួន ៨ ២៧៤។ នេះបើតាមការដកស្រង់របាយការណ៍ដោយភ្នំពេញប៉ុស្តិ៍។
ក្រុមហ៊ុនបារាំង SCA បាននឹងកំពុងរៀបចំចំណតយន្តហោះ និងពង្រីកបន្ថែមផ្លូវរត់យន្តហោះ នៅអាកាសយានដ្ឋានអន្តរជាតិរបស់កម្ពុជា ដើម្បីត្រៀមទទួលយន្តហោះរបស់គណៈប្រតិភូដែលនឹងអញ្ជើញមកចូលរួមកិច្ចប្រជុំកំពូលអាស៊ី-អឺរ៉ុប និងកិច្ចប្រជុំកំពូលអាស៊ាន ដែលកម្ពុជាធ្វើជាម្ចាស់ផ្ទះនាពេលបន្តបន្ទាប់ និងដើម្បីបង្កើនភ្ញៀវទេសចរផងដែរ៕