សេដ្ឋកិច្ច
ត្រីមាសទី១ឆ្នាំ២០១៩នេះ សាខាគយខេត្តព្រះសីហនុ ចាប់រថយន្តសេរីទំនើបអត់បង់ពន្ធ១៣គ្រឿងជាថ្មីទៀត
ខេត្តព្រះសីហនុ៖ ប្រធានសាខាគយ និងរដ្ឋាករខេត្តព្រះសីហនុ លោក ទុំ ណូ មានប្រសាសន៍ថា ស្ថាប័នខ្លួន បានសហការជាមួយសមត្ថកិច្ចស្ថាប័នដទៃទៀត ចុះស្រាវជ្រាវ និងចាប់រថយន្តសេរីទំនើបបានចំនួន១៣គ្រឿងជាថ្មីទៀតដែលជារថយន្តគេចពន្ធ ហើយបានធ្វើចរាចរណ៍នាមូលដ្ឋានខេត្តព្រះសីហនុ។
ថ្លែងប្រាប់ក្នុងសន្និសីទកាសែត កាលពីព្រឹកថ្ងៃទី២១ ខែមីនា នៅក្នុងបរិវេណសាខាគយ និងរដ្ឋាករខេត្តព្រះសីហនុ លោក ទុំ ណូ បញ្ជាក់ថា រថយន្តសេរីទំនើបៗទាំង ១៣គ្រឿងខាងលើនេះ គឺមានទាំងរថយន្តចង្កូតឆ្វេង និងចង្កូតស្តាំផង ហើយត្រូវមន្ត្រីគយ សហការជាមួយសមត្ថកិច្ចពាក់ព័ន្ធខេត្តព្រះសីហនុ ចុះចាប់ឃាត់យកមករក្សាទុក នៅត្រីមាសទី១ ដើមឆ្នាំ២០១៩នេះ ដោយបាននាំយកមករក្សាទុក នៅសាខាគយ និងរដ្ឋាករខេត្តព្រះសីហនុ ដើម្បីបន្តនិតិវិធីតាមផ្លូវច្បាប់។
លោក ទុំ ណូ បន្តថា សម្រាប់រថយន្តចង្កូតឆ្វេងបានទុកឱកាសដល់ម្ចាស់រថយន្តទាំងនោះ មកបំពេញបែបបទ សុំការបង់ពន្ធ និងផាកពិន័យបង់ពន្ធឲ្យស្របតាមច្បាប់។ ប៉ុន្តែចំពោះរថយន្តចង្កូតស្តាំងវិញ គឺមន្ត្រីជំនាញ ត្រូវដកយកទុកជាទ្រព្យសម្បត្តិរបស់រដ្ឋ ដោយមិនប្រគល់ឲ្យម្ចាស់វិញទេ។ លោកថា ចំពោះរថយន្តចង្កូតស្តាំ គឺត្រូវបានរាជរដ្ឋាភិបាល ហាមឃាត់មិនឲ្យនាំចូលបន្តទៀតទេចាប់តាំងពីឆ្នាំ២០១៦មកម្ល៉េះ។
លោក ទុំ ណូ បញ្ជាក់ថា សមត្ថកិច្ចគយ និងរដ្ឋាករ គឺមានភារៈកិច្ច ចុះបង្ក្រាបអំពើរត់គេចពន្ធទំនិញគ្រប់ប្រភេទ រួមមាន៖ ការបង្ក្រាបនៅដើមទី – ការបង្ក្រាបនៅពាក់កណ្តាលទី និងការបង្ក្រាបនៅចុងទី។ ហើយថា ចំពោះរថយន្តសេរីទំនើបអត់បង់ពន្ធទាំង ១៣គ្រឿង ដែលសាខាគយនិងរដ្ឋាករខេត្តព្រះសីហនុ ចាប់បាននៅពេលនេះគឺជាសកម្មភាពចុះបង្ក្រាបនៅចុងទី ពោលគឺរថយន្តទាំងនោះបានបើកធ្វើចរាចរណ៍ តាមផ្លូវសាធារណៈនាមូលដ្ឋានខេត្តព្រះសីហនុ។
ចំពោះរថយន្តគេចពន្ធ ដែលជំនាញគយរដ្ឋាករខេត្តព្រះសីហនុ ឃាត់ចាប់ខាងលើនេះ លោក ទំុ ណូ បញ្ជាក់ហេតុផលថា ទី១ ត្រូវឈ្មួញលួចនាំចូលតាមច្រករបៀងគេចពន្ធ ដោយគេចពីសមត្ថកិច្ច។ ទី២ ឈ្មួញបន្លំនាំចូលដាក់ថាជាគ្រឿងបន្លាស់ដោយយករថយន្តថ្មីៗទៅកាត់ជាកង់ៗ តាមរយៈការនាំចូលគ្រឿងបន្លាស់រថយន្តចាស់ៗ ឬរថយន្តកាត់ត បន្ទាប់មក បាននាំទៅតម្លើងតភ្ជាប់ នៅតាមយានដ្ឋានខុសច្បាប់មួយចំនួននៅរាជធានីភ្នំពេញ និងនៅតាមបណ្តាខេត្តមួយចំនួនទៀត។ លោកថា ករណីនេះ ត្រូវបានសមត្ថកិច្ចគយនិងរដ្ឋាករ បានបំបែកសំណុំរឿងនេះបានហើយៗ សមត្ថកិច្ចជំនាញគយនិងរដ្ឋាករ កំពុងបន្តចុះស្រាវជ្រាវបទល្មើសនេះជាបន្តទៀត។
ប្រធានសាខាគយ និងរដ្ឋាករខេត្តព្រះសីហនុ បានឲ្យដឹងថា គិតចាប់ពីចុងឆ្នាំ២០១៨ មកដល់ខែមីនា ឆ្នាំ២០១៩នេះ មន្ត្រីសាខាគយ និងរដ្ឋាករខេត្តនេះ ចាប់បានរថយន្តសេរីទំនើបគេចពន្ធសរុបចំនួន២៧គ្រឿង ដើម្បីផាកពិន័យ។
លោក ទុំ ណូ ប្តេជ្ញាថា ក្រោមការណែនាំផ្ទាល់ពីថ្នាក់ដឹកនាំអគ្គនាយកដ្ឋានគយ និងរដ្ឋាករកម្ពុជា និងគណៈបញ្ជាការឯកភាពខេត្តព្រះសីហនុ ស្តីពីការបង្ក្រាបអំពើរត់គេចពន្ធទំនិញគ្រប់ប្រភេទ ជាពិសេសការនាំចូលរថយន្តគេចពន្ធ គឺមន្ត្រីសាខាគយ និងរដ្ឋាករខេត្តព្រះសីហនុ នឹងបន្តចុះធ្វើសកម្មភាពនេះឲ្យមានប្រសិទ្ធ ដើម្បីឈានដល់ប្រមូលចំណូលថវិកាជាតិ ឲ្យបានច្រើនថែមទៀតនាបណ្តាឆ្នាំខាងមុខ៕
