ព័ត៌មានជាតិ
ឧកញ៉ា សឹង្ហ សំអុល បញ្ជាក់ថា ការដឹកជញ្ជូនឈើរបស់លោកស្របច្បាប់មិនដូចការចោទប្រកាន់កន្លងមកទេ
ដោយ៖ ខេមរា / ទំនាក់ទំនងការផ្សាយ ០៧១ ៨៦១ ២២២២
ប៉ុន្មានថ្ងៃកន្លងមកនេះ សារព័ត៌មានក្នុងស្រុកជាច្រើនបានចេញផ្សាយជាបន្តបន្ទាប់ ហើយធ្វើការចោទប្រកាន់ថា ក្រុមហ៊ុនម៉ាស្ទ័រខេសាន់របស់លោកឧកញ៉ា សឹង្ហ សំអុល ដឹកជញ្ជូនឈើចំនួន២០រថយន្តវេអងដោយគ្មានច្បាប់ដឹកជញ្ជូន(PC)ត្រឹមត្រូវ ដោយបានឃុបឃិតជាមួយមន្ត្រីជំនាញរដ្ឋបាលព្រៃឈើខេត្តមណ្ឌលគិរី។
ប៉ុន្តែការចោទប្រកាន់បែបនេះ ត្រូវបានច្រានចោលដោយ មន្ត្រីជំនាញរដ្ឋបាលព្រៃឈើនិងប្រធានមន្ទីរកសិកម្មរុក្ខប្រមាញ់និងនេសាទខេត្ត ថាជាព័ត៌មានមិនពិត ដោយបញ្ជាក់ថាការដឹកជញ្ជូនឈើចេញពីក្រុមហ៊ុន ម៉ាស្ទ័រខេសាន់ គឺធ្វើឡើងត្រឹមត្រូវស្របតាមច្បាប់កំណត់។
ទាក់ទងនឹងការចោទប្រកាន់ខាងឈើនេះ លោកឧកញ៉ា សឹង្ហ សំអុល បានបកស្រាយបំភ្លឺតាមទូរស័ព្ទថា ក្រុមហ៊ុនរបស់លោករកស៊ីត្រឹមត្រូវតាមច្បាប់កំណត់ទាំងអស់។ ក្រុមហ៊ុនម៉ាស្ទ័រខេសាន់ មានច្បាប់ឈូសឆាយត្រឹមត្រូវ ដោយបានបំពេញកតព្វកិច្ចបង់ពន្ធសារពើភណ្ឌគ្រប់ចំនួន មុននឹងធ្វើការឈូសឆាយ ហើយត្រូវបានពិនិត្យវាស់វែងយ៉ាងលំអិតជាក់លាក់ពីមន្ត្រីជំនាញក្រោយពេលឈូសឆាយទើបទទួលបាន(LP)ដឹកចូលរោងចក្រកែឆ្នៃ។
លោកបន្តថា ពេលអាច្រៀកកែឆ្នៃរួច មុនលើកឡើងរថយន្ត ត្រូវស្នើសុំមន្ត្រីជំនាញរដ្ឋបាលព្រៃឈើចុះមកពិនិត្យវាស់វែងម្តងទៀតមុនលើកដាក់រថយន្ត ទើបទទួលបានច្បាប់ដឹកជញ្ជូន(PC)ចេញពីក្រុមហ៊ុន យកទៅចែកចាយតាមដេប៉ូនានាក្នុងប្រទេសតាមការឈ្នើសុំ។ លោកឧកញ៉ាលើកឡើងថា កន្លងមកអង្គភាពសារព័ត៌មានក្នុងស្រុកជាច្រើនបានចុះផ្សាយព័ត៌មានចោទប្រកាន់ថា ក្រុមហ៊ុនម៉ាស្ទ័រខេសាន់លួចដឹកជញ្ជូនឈើចំនួន២០រថយន្តមិនស្របច្បាប់ទៅលក់នៅក្រៅប្រទេសនោះ ជាព័ត៌មានមិនពិតខ្វះការស្រាវជ្រាវស៊ើបអង្កេតឲ្យបានច្បាស់លាស់ និងបានធ្វើឲ្យប៉ះពាល់ដល់កិត្តិយសថ្នាក់ដឹកនាំខេត្ត ក៏ដូចជារាជរដ្ឋាភិបាល និងជាការបង្ខូចកេរ្ត៍ឈ្នោះ សេចក្តីថ្លៃថ្នូររបស់ក្រុមហ៊ុនលោកយ៉ាងធ្ងន់ធ្ងរ។ លោកថាក្រុមហ៊ុនរបស់លោកនឹងដឹកឈើចេញចំនួន២០រថយន្តមែន ប៉ុន្តែធ្វើម្តងមួយជំហ៊ានៗ ជាក់ស្តែងដូចថ្ងៃទី២៤កញ្ញាឆ្នាំ២០១៨នេះ ក្រុមហ៊ុនបានច្បាប់ដឹកជញ្ជូនចំនួន១០រថយន្ត គឺលោកមិនហ៊ានដឹកលើសពីច្បាប់កំណត់ទេ។ ទោះយ៉ាងនេះក្តីលោកក៏មិនបានខឹង និងស្អប់ខ្ពើមបងប្អនអ្នកសារព័ត៌មានឡើយ ដោយលោកសំណូមពរថាមុននឹងធ្វើការចុះផ្សាយ គួរតែធ្វើការចុះសិក្សាស្រាវជ្រាវឲ្យបានច្បាស់លាស់ផង ដើម្បីជៀស វាងការសរសេរព័ត៌មានមិនពិត ដែលធ្វើឲ្យប៉ះពាល់កិត្តិយសរបស់ថ្នាក់ដឹកនាំ ។
លោកឧកញ៉ារូបនេះនៅបានស្បថស្បែ ដល់ក្រុមអ្នកសារព័ត៌មានថា លោកមិនបានដឹកឈើយកទៅលក់នៅប្រទេសវៀតណាមតាមច្រកណា ផ្លូវណាទេ គឺដឹកទៅចែកចាយតាមដេប៉ូក្នុងនានាស្រុក សម្រាប់លក់ឲ្យប្រជាពលរដ្ឋែខ្មែរទិញយកទៅប្រើប្រាស់ប៉ុណ្ណោះ។
បើតាមលិខិតដឹកជញ្ជូនឈើ (PC) ច្បាប់ដើមចំនួន១០សន្លឹកចុះថ្ងៃទី២៤កញ្ញានេះ ដែលអង្គភាពគេហទំព័រពន្លឺខ្មែរទើបទទួលបាន គឺក្រុមហ៊ុនប៉ាវីភីអ អ៊ីមផត អ៊ិចផត ដែលទទួលសិទ្ធិពីក្រុមហ៊ុនម៉ាស្ទ័ខេសាន់ ត្រូវបានមន្ទីរកសិកម្មរក្ខាប្រមាញ់និងនេសាទខេត្តមណ្ឌលគិរី អនុញ្ញាតឲ្យធ្វើការដឹកជញ្ជូនឈើកែច្នៃប្រភេទលេខ១និងលេខ២ចំនួន១០រថយន្តចេញក្រុមហ៊ុនប៉ាវីភីអ អ៊ីមផត អិចផត ដែលមានទីតាំងស្ថិតនៅក្នុងឃុំស្រែសង្គម ក្នុងស្រុកកោះញែក ខេត្តមណ្ឌលគិរី ឆ្ពោះទៅកាន់ភូមិបោះអង្គុញ សង្កាត់ព្រែកឯង ខណ្ឌច្បារអំពៅ ក្រុងភ្នំពេញ និងមួយចំនួនទៀតឆ្ពោះទៅភូមិជ្រោយមេត្រី ឃុំឫស្សីជ្រោយ ស្រុកមុខកំពូល ខេត្តកណ្តាល។
នេះជាការសបញ្ជាក់ឲ្យឃើញថា លោកឧកញ៉ាសឹង្ហ សំអុល ពិតជាបានរកស៊ីដឹកជញ្ជូនឈើត្រឹមត្រូវស្របតាមគោលការណ៍នៃច្បាប់ដែលបានកំណត់មិនដូចការចោទប្រកាន់កន្លងមកឡើយ៕
