ព័ត៌មានជាតិ
កន្លែងចាក់សំរាមថ្មីនៅក្រុងព្រះសីហនុ ជាគំរូក្នុងការគ្រប់គ្រងសំរាម
ទីតាំងចាក់សំរាមដែលទើបសាងសង់ថ្មីនៅខេត្តព្រះសីហនុត្រូវបានគេចាត់ទុកថាជាទីតាំងស្ដង់ដារខ្ពស់ដែលអាចយកធ្វើជាគំរូបាន សម្រាប់ការគ្រប់គ្រងសំរាមនៅទូទាំងប្រទេសកម្ពុជា។
នេះបើតាមលោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន ពេលទទួលក្រុមអ្នកកាសែតទៅមើលការចាក់សំរាមនៅឆ្នេរសមុទ្រ។
យោងតាមរដ្ឋលេខាធិការ ទីលានចាក់សំរាមថ្មីនេះ មានផ្ទៃដីទំហំ៥ ហិកតា ជាមួយនឹងរណ្តៅចំនួន ៤ ដែលអាចផ្ទុកសំរាមបានជិតមួយលានតោន ហើយត្រូវបានរៀបចំឡើងជាមួយនឹងដំណើរការគ្រប់គ្រងកាកសំណល់តាមស្តង់ដារ។
ទីលានចាក់សំរាម គឺជាគម្រោងរបស់រាជរដ្ឋាភិបាលកម្ពុជា ដែលអនុវត្តដោយក្រសួងសាធារណការ និងដឹកជញ្ជូន ហើយបានប្រគល់ជូនក្រសួងបរិស្ថាន បន្ទាប់ពីបញ្ចប់ការសាងសង់កាលពីថ្ងៃទី៥ ខែវិច្ឆិកា។
ប្រទេសកម្ពុជាត្រូវបានគេរំពឹងថានឹងមានកន្លែងចាក់សំរាមចំនួនប្រាំមួយបន្ថែមទៀតនៅក្នុងខេត្តកែប កំពង់ឆ្នាំង ពោធិ៍សាត់ បាត់ដំបង និងកំពតនៅឆ្នាំ២០២២ ដោយសារការគាំទ្រពីដៃគូអភិវឌ្ឍន៍ដូចជាធនាគារអភិវឌ្ឍន៍អាស៊ី និងធនាគារពិភពលោក។
ខេត្តផ្សេងទៀតរួមមានខេត្តសៀមរាប និងបន្ទាយមានជ័យ ក៏នឹងមានទីតាំងចាក់សំរាមមួយក្នុងពេលឆាប់ៗខាងមុខនេះដែរ។
លោក ហុក សុផាន់ណារ៉ូ នាយកទីលានចាក់សំរាមក្រុងព្រះសីហនុបានចែករំលែកអោយដឹងថា ជាមធ្យមក្នុងមួយថ្ងៃមានសំរាមប្រហែល ៤០០ តោនត្រូវបានបោះចោលនៅទីតាំងនេះចាប់តាំងពីដំណើរការ។
កម្ពុជាបង្កើតបានជាង ១ ម៉ឺនតោនក្នុងមួយថ្ងៃ ឬ ៤ លានតោនក្នុងមួយឆ្នាំនៃសំរាម ៦៥ ភាគរយជាកាកសំណល់សរីរាង្គ ២០ ភាគរយជាប្លាស្ទិក ហើយនៅសល់ពីនោះជាសំណល់រឹង។ ហើយចំនួននេះត្រូវបានគេព្យាករណ៍ថានឹងកើនឡើងចន្លោះពី ១០ ទៅ២០ ភាគរយជារៀងរាល់ឆ្នាំ។
ទន្ទឹមនឹងការយកចិត្តទុកដាក់លើការកែលម្អកន្លែងចាក់សំរាម ក្រសួងបរិស្ថានក៏កំពុងជំរុញការចាត់ថ្នាក់សំរាមផងដែរ ដើម្បីឱ្យវាមានលទ្ធភាពសេដ្ឋកិច្ច៕