សេដ្ឋកិច្ច
ដើមឆ្នាំ២០២១ចំណូលពន្ធគយធ្លាក់ចុះ១៥% ធៀបនឹងដើមឆ្នាំ២០២០
រយៈពេលមួយត្រីមាសនៃឆ្នាំ២០២១ ការប្រមូលចំណូលពន្ធគយនៅអំឡុងពេលនៃវិបត្តិកូវីដ-១៩ បានចំនួន៦១៤លានដុល្លារអាមេរិក។ នេះបើតាមការប្រកាសនៅលើគេហទំព័ររបស់អគ្គនាយកដ្ឋានគយ និងរដ្ឋាករកម្ពុជា។ ចំណូលពន្ធគយ នៅដើមឆ្នាំ២០២១នេះ មានការធ្លាក់ចុះប្រមាណ១៥.២% បើធៀបនឹងចំណូលពន្ធគយដែលប្រមូលបាននៅរយៈពេលមួយត្រីមាសដូចគ្នានៃឆ្នាំ២០២០ ដែលមានចំណូលប្រមាណ៧២៣លានដុល្លារអាមេរិក។
ក៏ប៉ុន្តែសម្រាប់ការនាំចេញផលិតផលអេឡិចត្រូនិច និងកសិផលវិញ កម្ពុជាមានការកើនឡើងគួរឲ្យកត់សម្គាល់។ ក្នុងនោះទំនិញអេឡិចត្រូនិច មាន កង់ គ្រឿងបន្លាស់រថយន្ត អំពូលលម្អ និងផលិតផលឧស្សាហកម្ម បានចំនួន៨៨៧លានដុល្លារអាមេរិក កើនឡើង៥២.១៨%។ សម្រាប់ដំណាំកសិផល មានជាអាទិ៍ ស្រូវ អង្ករ កៅស៊ូ កម្ពុជានាំចេញបានក្នុងចំនួន១០១៤លានដុល្លារអាមេរិក កើនឡើង៧០.៣៦%។
ជាមួយគ្នានេះ សម្រាប់តែខែមីនាឆ្នាំ២០២១ កម្ពុជាប្រមូលចំណូលពន្ធគយបាន២១១លានដុល្លារអេមរិក។ ចំណូលនេះក៏មានការធ្លាក់ចុះដូចគ្នា ក្នុងរង្វង់៤.៧% បើធៀបទៅនឹងខែមីនាដូចគ្នានៅឆ្នាំ២០២០។ ទោះជាយ៉ាងនេះក្តី អគ្គនាយកដ្ឋានគយនិងរដ្ឋាករកម្ពុជា បានឲ្យដឹងថា ចំណូលពន្ធគយ៦១៤លានដុល្លារអាមេរិកនៅត្រីមាសទី១នេះ ជាការសម្រេចបានជាចំណែក២៦%នៃផែនការប្រចាំឆ្នាំ ក្នុងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២១។
គួរបញ្ជាក់ថា កាលពីឆ្នាំ២០២០កន្លងទៅ កម្ពុជាប្រមូលចំណូលពន្ធគយសរុបបានប្រមាណ២៤១៩លានដុល្លារអាមេរិក ខណៈចំណូលពន្ធគយសរុបនៅឆ្នាំ២០១៩ មានចំនួន៣២០០លានដុល្លារអាមេរិក៕
