សេដ្ឋកិច្ច
ជប៉ុនផ្តល់ជំនួយដល់កម្ពុជាជិត៤ពាន់លានដុល្លារអាមេរិក ក្នុងរយៈពេល៣០ឆ្នាំចុងក្រោយ
ភ្នំពេញ៖ គិតត្រឹមឆ្នាំ២០១៨ រាជរដ្ឋាភិបាលរបស់ជប៉ុន បានផ្តល់ថវិកាជិត៤ពាន់លានដុល្លារអាមេរិក ដល់កម្ពុជា នេះបើតាមការឱ្យដឹងពី លោក ហូរីណូអ៊ុជិ ហ៊ីដេហ៊ីសា ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំកម្ពុជា ក្នុងឱកាសអញ្ជើញបើកកម្មវិធីទស្សនកិច្ចអ្នកសារព័ត៌មាន ស្ស្ដីអំពីជំនួយជប៉ុន ODA (Official development assistance) នៅថ្ងៃទី២៦ ខែមីនា ឆ្នាំ២០១៩ ។
លោកឯកអគ្គរាជទូតជប៉ុន បានបញ្ជាក់យ៉ាងដូច្នេះថា «ក្នុងរយៈពេល ៣០ឆ្នាំចុងក្រោយនេះ យើងបាននិងកំពុងគាំទ្រដល់កម្ពុជា ចាប់ពីដំណើរការសន្តិភាពដំបូង តាមរយៈការកសាងឡើងវិញជាបន្តបន្ទាប់ និងរហូតដល់ការអភិវឌ្ឍសេដ្ឋកិច្ច ។ រដ្ឋាភិបាលជប៉ុន បានផ្តល់ថវិកាប្រមាណ ៣ពាន់៩រយលានដុល្លារអាមេរិក ក្រោមជំនួយ ODA គិតត្រឹមឆ្នាំសារពើពន្ធ ២០១៨» ។
លោកឯកអគ្គរាជទូត បានគូសបញ្ជាក់ទៀតថា ប្រទេសជប៉ុន គាំទ្រដល់ការពង្រឹងបន្ថែមនូវគ្រឹះសេដ្ឋកិច្ចសង្គម ដើម្បីជួយឱ្យកម្ពុជា សម្រេចបាននូវឋានៈជាប្រទេស ដែលមានចំណូលមធ្យមកម្រិតខ្ពស់ត្រឹមឆ្នាំ២០៣០ ដោយផ្តោតលើវិស័យអាទិភាពចំនួន ៣គឺ៖ ១៖ ការអភិវឌ្ឍឧស្សាហកម្ម, ២៖ ការផ្តល់នូវគុណភាពនៃជីវភាពរស់នៅប្រសើរជាងមុន និង៣៖ ការជំរុញឱ្យមានសង្គមប្រកបដោយនិរន្តភាព តាមរយៈការពង្រឹងអភិបាលកិច្ច។ជប៉ុន ក៏បាននឹងកំពុងធ្វើការរួមគ្នាជាមួយប្រទេសកម្ពុជា ក្នុងវិស័យជាច្រើន។ កិច្ចការទាំងនេះរួមមាន ការកសាងហេដ្ឋារចនាសម្ព័ន្ធសេដ្ឋកិច្ចសង្គម ដូចជាផ្លូវថ្នល់ កំពង់ផែ មន្ទីរពេទ្យ សាលារៀន ធនធានមនុស្ស និងប្រព័ន្ធផ្គត់ផ្គង់ទឹក ការលុបបំបាត់គ្រាប់មីន និងយុទ្ធភណ្ឌមិនទាន់ផ្ទុះ និងការជំរុញការវិនិយោគជាដើម។
បើតាមលោក កាតាណា ប្រធានគ្រប់គ្រង ODA របស់ជប៉ុនប្រចាំកម្ពុជា បានរំលឹកថា ជប៉ុនបានអនុវត្តន៍ជំនួយយ៉ាងសកម្មនៅកម្ពុជា តាំងពីឆ្នាំ១៩៩១។ លោកថាទឹកប្រាក់សរុបនៃជំនួយ ODA ដល់កម្ពុជាគិតត្រឹមឆ្នាំ២០១៧ (ដោយគិតអត្រា ១ដុល្លារ/ ១១០យ៉េន) មានចំនួនប្រមាណ ១២៧៥លានដុល្លារអាមេរិក ជាកម្ចីសម្បទាន, ប្រហែល ១៨៣១លានដុល្លារអាមេរិក ជាជំនួយឥតសំណង និងប្រហែល ៧៨៤លានដុល្លារអាមេរិក ជាកិច្ចសហប្រតិបត្តិការបច្ចេកទេស ៕
