ព័ត៌មានជាតិ
ចង់ឃើញសត្វព្រៃពិតៗ! សូមអញ្ជើញទៅទស្សនា សួនអភិរក្សអំបូរសត្វព្រៃ នៅខេត្តមណ្ឌលគិរី
មណ្ឌលគិរី ៖ បើទោះបីជាខេត្តមណ្ឌលគិរី សម្បូរសត្វព្រៃគ្រប់ប្រភេទរស់នៅច្រើនយ៉ាងណាក្តី ថ្មីៗនេះវិស័យ ឯកជនបាន បង្កើតសួនសត្វ ដើម្បីចិញ្ចឹមអំបូរសត្វព្រៃមួយចំនួនបន្ថែមទៀត ដើម្បីងាយស្រួលក្នុងការទស្សនា ក៏ដូចជាចូលរួមអភិរក្សអំបូរ សត្វព្រៃ ដែលខ្លះមាននៅសល់តិចតួចក្នុងដែនព្រៃការពារនោះ។
សួនសត្វមួយកន្លែងដែលមានទំហំផ្ទៃដីប្រមាណ១០ហិកតា និងបានចិញ្ចឹមសត្វព្រៃប្រមាណ៧ប្រភេទ ដែលមានចំនួនរាប់រយក្បាលក្រោមការជួយឧបត្ថម្ភ គាំពារពីមូលនិធិ មយូរ៉ា ការពារសត្វព្រៃ ដើម្បីចូលរួមអភិរក្ស និងការពារពូជសត្វព្រៃក្នុងខេត្តមណ្ឌលគិរី ដែលមានទីតាំងនៅក្នុងឃុំពូជ្រៃ ស្រុកពេជ្រាដា ខេត្ត មណ្ឌលគិរី។
អ្នកអ្នកមើលថែសួនសត្វព្រៃលោក សុខ ជាង បានឱ្យដឹងថា សួនសត្វនេះ បានបង្កើតឡើងជិតពីរឆ្នាំមកហើយ ដោយបានចិញ្ចឹមសត្វព្រៃចំនួន៧ប្រភេទ លើទំហំផ្ទៃដី១០ហិកតា ហើយមានអ្នកមើលថែចំនួន៤នាក់។ លោក បាន ឱ្យដឹងទៀតថា សួនសត្វនេះ បង្កើតឡើងដោយស្ថិតក្រោមការគ្រប់គ្រងរបស់ មូលនិធិ មយូរ៉ា ការពារសត្វព្រៃ ដើម្បីចូលរួមអភិរក្ស និងការពារពូជសត្វព្រៃ ដែលកំពុងរងការគំរាមកំហែងរាល់ថ្ងៃពីការ បាញ់សម្លាប់ ឬកត្តានានាដែល បណ្តាលឱ្យសត្វទាំងនេះឈានទៅរកភាពវិនាសផុតពូជ។
លលោកបន្តថា ការចិញ្ចឹមនេះ គឺសម្រាប់ទុកឱ្យប្រជាពលរដ្ឋបានស្គាល់ ជាពិសេសក្មេងៗជំនាន់ក្រោយ បានស្គាល់សត្វព្រៃដែលមានវត្តមាននៅប្រទេសកម្ពុជា។ ជាមួយគ្នានេះ សួនសត្វព្រៃខាងលើមានចិញ្ចឹម ប្រភេទសត្វខុសៗគ្នាដូចជា ៖ ប្រើសធំមានចំនួន១១ក្បាល ប្រើសផ្កាយចំនួន២៩ក្បាល ក្តាន់ចំនួន១២ក្បាល ឈ្លូលចំនួន២ក្បាល ជ្រូកព្រៃចំនួន ១៣៨ក្បាល ក្ងោកចំនួន៣ក្បាល ព្រមទាំងសត្វកាំប្រម៉ា ចំនួន៣ក្បាលផងដែរ។
ឯកឧត្តម ស្វាយ សំអ៊ាង អភិបាលខេត្តមណ្ឌលគិរី បានអោយដឹងដែរថា ការចិញ្ចឹមសត្វនេះវាមានសារៈសំខាន់ណាស់ ព្រោះវាជាការរួមចំណែក ក្នុងការអភិរក្សសត្វព្រៃនៅក្នុងខេត្ដ។ “តំបន់នេះជា តំបន់ទេសចរណ៍ ក្រៅពីការដើរលេងកម្សាន្តនៅតាមរមណីយដ្ឋានហើយនោះ វាអត់មានអីក្រៅពីទស្សនាមើលព្រៃ មើលសត្វនោះទេ។ ដូច្នេះ វាអាចធ្វើឱ្យ មានផលប្រយោជន៍ ដល់វិស័យទេសចរណ៍សម្រាប់ទាក់ទាញភ្ញៀវទេសចរក្នុងខេត្តមណ្ឌលគិរី។
ឯកឧត្តម បានបន្តទៀតថា តំបន់នៅក្នុងខេត្ដនេះ ជាតំបន់ដែនជម្រកសត្វព្រៃ ប៉ុន្តែអាជ្ញាធរ នៅមិនទាន់បានរៀបចំជាកន្លែង សួនសត្វណាដើម្បីឱ្យភ្ញៀវមើល ហើយអ្វីដែលជាការរៀបចំចិញ្ចឹមនូវសត្វគ្រប់ ប្រភេទកន្លងមកនេះ បាន ធ្វើឱ្យមានការចាប់អារម្មណ៍ដល់អ្នកទេសចរជាតិ អន្តរជាតិមួយចំនួនទៅកម្សាន្តជាប់ជាប្រចាំ។
ក្នុងការបង្កើតសួនសត្វនេះដែរ ប្រធានមន្ទីរបរិស្ថានខេត្ដ លោក កែវ សុភក៌ ក៏បានថ្លែងគាំទ្រលើដំណើរការនៃសួនសត្វនេះដែរ ដោយលោកលើកឡើងថា វាបានចូលរួមចំណែកក្នុងការគាំពារអំបូរសត្វព្រៃកម្រ និងក៏បានចូលរួមចំណែកទាក់ទាញភ្ញៀវទេសចរជាតិ និងអន្តរជាតិ ឱ្យទៅកម្សាន្តកាន់តែច្រើនឡើងជាលំដាប់៕
