ព័ត៌មានជាតិ
ឈើ និងធ្យូងខុសច្បាប់សម្រុកដឹកឆ្លងដែនតាមច្រកជ័យឃ្លាំងទៅវៀតណាម ស្ទើរកិនក្បាលមន្ត្រីច្រកទ្វារព្រំដែន!!!
ទំនាក់ទំនងការផ្សាយ 071 861 2222
ខេត្តក្រចេះ៖ ក្រុមប្រជាពលរដ្ឋបានឱ្យដឹងថា លោក អាម សុខលីម មេប៉ុស្តិ៍ច្រកទ្វារព្រំដែនទ្វេភាគីជ័យឃ្លាំង”ហៅជ្រោះជ្រៅ” កំពុងមានការឃុបឃិតគ្នាជាមួយឈ្មួញឈើ និងឈ្មួញធ្យូងឆ្លងដែនខុសច្បាប់ដ៏ល្បីល្បាញប្រចាំខេត្តក្រចេះ ឈ្មោះ ចែមុំ និងបក្ខពួកឈ្មួញជាច្រើននាក់ទៀត ដោយបើកឲ្យមានការដឹកឈើនិងធ្យូងខុសច្បាប់ ចូលទៅលក់នៅប្រទេសវៀតណាមយ៉ាងគំហុក ដោយគ្មានការទប់ស្កាត់ ឬបង្ក្រាបពីស្ថាប័នជំនាញពាក់ព័ន្ធ ជាពិសេសអាជ្ញាធររដ្ឋបាលស្រុកស្នួលឡើយ។
ជាក់ស្តែង គិតចប់ពីថ្ងៃទី១១ខែសីហា រហូតដល់ថ្ងៃទីទី១៤ខែសីហាឆ្នាំ២០២៣នេះ ចែ មុំ ឈ្មួញឈើនិងធ្យូង រួមទាំងក្រុមឈ្មួញមានមុខរបរដូចគ្នានេះជាច្រើននាក់ទៀត បាននិងកំពុងសម្រុកដឹកជញ្ជូនឆ្លងដែនចូលទៅវៀតណាមស្ទើរតែកិនក្បាលមន្ត្រីនគរបាលប្រចាំការនៅច្រកជ័យឃ្លាំងយ៉ាងអនាធិបតេយ្យបំផុត។
ការដឹកផលអនុផលព្រៃឈើឆ្លងដែនយ៉ាងគគ្រឹកគគ្រេងបែបនេះ គេពុំឃើញមានអាជ្ញាធរ រឺសមត្ថកិច្ចពាក់ព័ន្ធស្រុកស្នួលនិង កម្លាំងអាវុធហត្ថខេត្តក្រក្រចេះ ចេញមុខធ្វើការទប់ស្កាត់ឡើយ ដោយគេឃើញមានតែសមត្ថកិច្ចមួយចំនួនបន្លំខ្លួនពាក់អាវស៊ីវិលចងអង្រឹងដេកចាំរាប់ក្បាលឡានដឹកឈើ និងធ្យូង យកលុយ តាមបណ្តោយផ្លូវK3 និងផ្លូវក្រវ៉ាត់ព្រំដែនចេញផ្លូវ88 ក្បែរផ្ទះលោកឧកញ៉ា គង់ ក្រុង ហើយចេញទៅវៀតណាមតាមច្រកទ្វារទ្វេភាគីជ័យឃ្លាំងតែប៉ុណ្ណោះ។
ឈ្មួញឈើនិងធ្យូងខុសច្បាប់ឈ្មោះស្រីមុំ (ហៅចែមុំ)និងបក្ខពួក អាចធ្វើសកម្មភាពដឹកបទល្មើសធ្យូងនិងឈើខុសច្បាប់ជារៀងរាល់យប់តាមផ្លូវk3 និងមួយផ្នែកទៀត តាមក្រវ៉ាត់ព្ព្រំដែនផ្លូវ88 បានដោយរលូន គឺដោយសារមានការ បើកដៃពីគ្រប់សមត្ថកិច្ចពាក់ព័ន្ធ ជាថ្នូរការបែងចែកផលប្រយោជន៍ខុសច្បាប់។
លោក អ៊ាម សុខលីម មេប៉ុស្តិ៍នគរបាលច្រកជ័យឃ្លាំង បានទទួលស្គាល់ថា ច្រកព្រំដែនដែលលោកកំពុងគ្រប់គ្រងនេះពិតជាមានបទល្មើសព្រៃឈើទាំងនេះពិតប្រាកដមែន។ ដោយលោកបានអះអាងថាឈ្មូញដែលរកស៊ីបទល្មើសព្រៃឈើឆ្លងដែនទាំងនេះ មានពេលខ្លះពួកគេមិនចេះដោះស្រាយឲ្យសមត្ថកិច្ចមួយចំនួននៅតាមផ្លូវ ទើបបានរកស៊ី មិនចេះបានសុខ។
ជាក់ស្តែង ចែមុំ មានឡានដឹកធ្យូងបង្កប់ឈើខុសច្បាប់ឆ្លងដែនទៅលក់នៅប្រទេសវៀតណាមចំនួន៣គ្រឿង និងមានរថយន្តម៉ាកព្រុសពណ៌ស ពាក់ស្លាកលេខ 2B-2232 មួយគ្រឿងទៀត សម្រាប់តាមកាង រឺហៅថា បិទគូថនិងរត់ការបិទមាត់គ្រប់សមត្ថកិច្ចពាក់ព័ន្ធដែលឈរជើងតាមដងផ្លូវ។
ពាក់ព័ន្ធករណីខាងលើនេះ លោក សាន្ត ប៊ុនថាន មេបញ្ជាការកងរាជអាវុធហត្ថខេខេត្តក្រចេះបានតបសារតាម Telegram ជាមួយអ្នកយកព័ត៌មានហាកដូចគ្មានការទទួល ខុសត្រូវក្នុងតួនាទី និងសាចទឹកដាក់នគរបាលការពារព្រំដែនថា នៅច្រកទ្វារទ្វេភាគីកម្ពុជា-វៀតណាមជ័យឃ្លាំងនេះ មានបារ៉ាស់ដែកដ៏រឹងមាំហើយ ហេតុអ្វីក៏មានឈ្មួញដឹកបទល្មើសព្រៃឈើ និងឡានដឹកធ្យូង អាចបើកឆ្លងដែនចូលទឹកដីវៀតណាមបាន?sic!។
ទោះយ៉ាងណា ក្រុមអ្នកឃ្លាំមើលបទល្មើសព្រៃឈើ បានសំណូមពរដល់លោក សាន្ត ប៊ុន ថា មេបញ្ជាការអាវុធហត្ថខេត្ត និងលោក វ៉ា ថន អភិបាលខេត្តក្រចេះ មិនគួរមើលរំលងបទល្មើសព្រៃឈើនៅចំណុចច្រកទ្វារព្រំដែន ជ័យឃ្លាំង”ហៅជ្រោះជ្រៅ”នេះទេ គួរតែអនុវត្តន៍តាមបទបញ្ជារបស់រាជរដ្ឋាភិបាល ទប់ស្កាត់និងបង្ក្រាបបទល្មើសធនធានធម្មជាតិកុំឲ្យមានការជួញដូរឆ្លងដែនខុសច្បាប់៕
