អន្តរជាតិ
ចិនថ្កោលទោសសេចក្តីសម្រេចរបស់រដ្ឋសភាបារាំង ស្តីពីអំពើប្រល័យពូជសាសន៍លើជនជាតិអ៊ុយហ្គួរ
ប៉ុន្មានម៉ោងក្រោយ រដ្ឋសភាបារាំងបោះឆ្នោតលើសេចក្តីសម្រេច ចោទប្រកាន់រដ្ឋអំណាចចិនថា បានប្រព្រឹត្តអំពើប្រល័យពូជសាសន៍ទៅលើជនជាតិអ៊ុយហ្គួរ នៅខេត្តស៊ីនជាំង ក្រសួងការបរទេសចិន តាមរយៈ អ្នកនាំពាក្យ បានចេញមុខប្រឆាំងដាច់ខាត និងបានវាយបកបារាំងនៅថ្ងៃសុក្រទី ២១មករាថា កំពុងលូកដៃចូលកិច្ចការផ្ទៃក្នុងរបស់ចិន។ សេចក្តីសម្រេចរបស់រដ្ឋសភាបារាំងដែលត្រូវបានបោះឆ្នោត កាលពីល្ងាចថ្ងៃព្រហស្បតិ៍ គ្មានអំណាចចាប់បង្ខំ ប៉ុន្តែ បានទាមទារឲ្យរដ្ឋាភិបាលបារាំង ចាត់វិធានការដូចគ្នានេះដែរ។
ដោយបោះឆ្នោតអនុម័តសេចក្តីសម្រេចដែលទទួលស្គាល់ថា ការប្រព្រឹត្តអំពើហិង្សារបស់អាជ្ញាធរចិនទៅលើប្រជាជនអ៊ុយហ្គួរនៅខេត្តស៊ីនជាំង គឺជាបទឧក្រិដ្ឋកម្មប្រឆាំងមនុស្សជាតិ និងជាអំពើប្រល័យពូជសាសន៍ រដ្ឋសភាបារាំងបានចូលរួមជាមួយ សភាកាណាដា ប៊ែលហ្សិក អង់គ្លេស និងហូឡង់ ដែលធ្លាប់បានចេញសេចក្តីសម្រេចដូចគ្នានេះ ថ្កោលទោស រដ្ឋអំណាចចិន នៅក្នុងសំណុំរឿងជនជាតិអ៊ុយហ្គួរ។
ប៉ុន្តែ ប៉េកាំង តាមរយៈ អ្នកនាំពាក្យរបស់ក្រសួងការបរទេសបាននិយាយទាត់ចោលការចោទប្រកាន់ និងបានវាយបករិះគន់ខ្លាំងៗវិញថា សេចក្តីសម្រេចរបស់រដ្ឋសភាបារាំង ស្តីពីស៊ីនជាំងធ្វើឡើងដោយឈរលើការមិនដឹងការពិត ការគ្មានចំណេះដឹងផ្នែកច្បាប់ និងបានរំលោភចូលកិច្ចការផ្ទៃក្នុងរបស់ប្រទេសចិន។ ចិនប្រឆាំងដាច់ខាត នឹងសេចក្តីសម្រេចរបស់រដ្ឋសភាបារាំង។
ដោយលើកបង្ហាញ តួលេខប្រជាសាស្រ្ត នៅក្នុងសន្និសីទកាសែត អ្នកនាំពាក្យក្រសួងការបរទេសចោទជាសំណួរថា បើសិនមានអំពើប្រល័យពូជសាសន៍ នៅស៊ីនជាំងតើ គេអាចពន្យល់បានយ៉ាងម៉េចពីកំណើនប្រជាជននៅស៊ីនជាំង។ សម្រាប់អ្នកនាំពាក្យខាងលើ ពាក្យកុហកភូតភររបស់អ្នកនយោបាយបរទេស មិនសក្តិសមនឹងទទួលបានការយកចិត្តទុកដាក់ស្តាប់នោះទេ។
កន្លងមក អង្គការការពារសិទ្ធិមនុស្ស និងការសិក្សារបស់ប្រទេសលោកខាងលិច មួយចំនួនដែលពឹងផ្អែកលើតួលេខ ឯកសាររបស់មន្រ្តីចិន ធ្លាប់បានចោទប្រកាន់ប៉េកាំងថាបានបង្កើតមន្ទីរឃុំឃាំង ដាក់មនុស្សជាង១លាននាក់នៅ ខេត្តស៊ីនជាំង ដែលនៅក្នុងនោះ ភាគច្រើនជាប្រជាជនអ៊ុយហ្គួរ។ សាក្សីរួចរស់ជីវិតមួយចំនួន ដែលបានរត់គេចចេញទៅបរទេស ធ្លាប់បាននិយាយពីលក្ខខណ្ឌជីវិតដ៏អាក្រក់នៅក្នុងជំរំ ដូចជា ការធ្វើទារុណកម្ម ការចាប់បង្ខំឲ្យធ្វើការ ការរំលោភផ្លូវភេទ និងការចាប់បង្ខំ វះយកសរីរាង្គជាដើម។
ដំបូងឡើយ ប៉េកាំងធ្លាប់បានបដិសេធថា គ្មានជំរំដាក់មនុស្សជាង១លាននាក់នោះទេ។ ប៉ុន្តែ ក្រោយមក ក៏បែរមកទទួលស្គាល់វិញ ពិតជាបានបង្កើតមណ្ឌលអប់រំនៅខេត្តស៊ីនជាំង សម្រាប់បណ្តុះបណ្តាលវិជ្ជាជីវៈ ក្នុងគោលដៅអូសទាញប្រជាជនអ៊ុយហ្គួរ កាន់សាសនាអ៊ីស្លាម ឲ្យចាកឆ្ងាយចេញពី អន្ទាក់របស់ក្រុមអ៊ីស្លាមជ្រុលនិយម។ ថ្មីៗនេះ អាជ្ញាធរចិនបានអះអាងថា គេនឹងបិទមណ្ឌលអប់រំនៅស៊ីនជាំង ព្រោះថាសិស្សទាំងអស់បានបញ្ចប់ការបណ្តុះបណ្តាលរបស់ខ្លួន៕ប្រភពពីrfi