អន្តរជាតិ
យូណេស្កូសម្រេចបញ្ចូលល្ខោនខោល ក្នុងបញ្ជីបេតិកភណ្ឌពិភពលោក
ភ្នំពេញ៖ ប្រទេសកម្ពុជា នាថ្ងៃទី២៨ ខែវិច្ឆិកា ឆ្នាំ ២០១៨ នេះ បានប្រកាសការអបអសាទរ ចំពោះការដាក់បញ្ចូលល្ខោនខោល ទៅក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិរបស់អង្គការយូណេស្កូ ។ ជាការប្រកាសដែលចង់បញ្ជាក់ថា ចាប់តាំងពីពេលនេះទៅ ឈប់មានមន្ទិលទៀតហើយ ដែលថា ល្ខោនខោលជារបស់ថៃ ។ តែវាគឺជាសម្បត្តិវប្បធម៌របស់កម្ពុជាពិតៗ ។
ផ្អែកតាមសេចក្ដីប្រកាសព័ត៌មានរបស់ក្រសួងវប្បធម៌ និងវិចិត្រសិល្បៈឲ្យដឹងថា ការដាក់បញ្ចូលល្ខោនខោលទៅក្នុងបញ្ជីបេតិកភណ្ឌអរូបី នៃមនុស្សជាតិរបស់អង្គការយូណេស្កូនេះ ត្រូវបានធ្វើឡើងនៅក្នុងកិច្ចប្រជុំលើកទី១៣ នៃគណៈកម្មការអន្តររដ្ឋាភិបាល សម្រាប់ការការពារបេតិកភណ្ឌអរូបី របស់អង្គការយូណេស្កូ នៅទីក្រុងព័រល្វី សាធារណរដ្ឋម៉ូរីស ។
បើតាមក្រសួងវប្បធម៌ថា ជោគជ័យទាំងនេះគឺមិនអាចកាត់ផ្តាច់បានទេ ពីការចូលរួមយ៉ាងផុលផុស របស់សិល្បករ អង្គការសមាគម អង្គការសង្គមស៊ីវិល ក្នុងវិស័យសិល្បៈវប្បធម៌ និងការជួយគាំទ្រលើកទឹកចិត្តពីមហាជន ប្រជាជន និងស្រទាប់យុវជនកម្ពុជាទាំងមូល ៕ plk