ព័ត៌មានជាតិ
បើជនជាតិចិននៅតែអាចប្រើអាវុធខុសច្បាប់បាន តើសន្តិសុខក្នុងសង្គមកម្ពុជានឹងទៅជាយ៉ាងណា?
ជាងមួយឆ្នាំកន្លងទៅនេះ ជនជាតិចិនត្រូវគេអះអាងថា បានបោះទុន វិនិយោគច្រើនជាងគេនៅកម្ពុជា ហើយទន្ទឹមនោះដែរលំហូរនៃជនជាតិ ចិនចូលមកកម្ពុជាដើម្បីបម្រើការងារផ្សេងៗ ក្នុងមួយឆ្នាំៗរាប់មុឺននាក់ និងកំពុងជាប់ចំណាត់ថ្នាក់នាំមុខគេ ខាងបង្កអសន្តិសុខក្នុងប្រទេស កម្ពុជាផងដែរ។
ជាក់ស្តែង កាលពីរសៀលថ្ងៃទី០៦ ខែឧសភា ឆ្នាំ២០១៩ មានហេតុការណ៍ចិនបាញ់សម្លាប់ចិនគ្នាឯង នៅក្នុងឡាន Highlander ពណ៌ខ្មៅ ស្លាកលេខ ភ្នំពេញ 2X-3970 ហើយរុញទម្លាក់សពនៅកណ្តាលផ្លូវដោយគ្មានរអែងច្បាប់ ខណៈដែលចរាចរណ៍កំពុងចង្អៀតណែន នាកណ្តាលថ្ងៃត្រង់តែម្តង។ ហេតុការណ៍នោះបានកើតឡើង នៅមុខសណ្ឋាគារខ្សាច់ស ក្នុងសង្កាត់លេខ៤ ក្រុងព្រះសីហនុ ខេត្តព្រះសីហនុ។
ក្រោយហេតុការណ៍ភ្លាមៗ ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានប្រាប់កាសែតក្នុងស្រុកថា បុរសជនសង្ស័យចំនួន ២នាក់ ជាជនជាតិចិន ត្រូវបានឃាត់ខ្លួន ហើយសមត្ថកិច្ច កំពុងតាមរកអ្នកពាក់ព័ន្ធមួយចំនួនទៀត។ ប៉ុន្តែចំពោះមូលហេតុនៃការបាញ់សម្លាប់បុរសជនជាតិចិននោះ សមត្ថកិច្ចមិនទាន់ប្រកាសឲ្យដឹងនៅឡើយទេ។
ករណីជនជាតិចិនមានកាំភ្លើងបាញ់សម្លាប់គ្នា និងបង្កអំពើហិង្សានៅកម្ពុជា ពិសេសនៅខេត្តព្រះសីហនុ ដែលចិនចូលមករកស៊ី និងរស់នៅច្រើននោះ គឺបានកើតឡើងជាញយដងរួចមកហើយ។ ករណីនេះ នាំឲ្យមានការចោទសួរថា តើចិនទាំងនោះ បានកាំភ្លើងមកពីណា? ហើយអង្គភាពណាផ្តល់ឲ្យ? តើមានលិខិតអនុញ្ញាតឬអត់? ឬជាអាវុធខុសច្បាប់? ករណីនេះគប្បីត្រូវស្រាវជ្រាវឲ្យបានល្អិតល្អន់។
យ៉ាងណាក៏ដោយ គឺជារឿងមិនត្រឹមត្រូវទាល់តែសោះ ដែលសមត្ថកិច្ច ហាក់បណ្តែតបណ្តោយឲ្យអ្នកទេសចរ ឬអ្នករកស៊ីជាជនបរទេស ពិសេសចិនមានកាំភ្លើង ហើយបើទោះបីជាអង្គភាពកងកម្លាំងប្រដាប់អាវុធណាក៏ដោយ ដែលចេញលិខិតអនុញ្ញាតច្បាប់ ឲ្យចិនមានសិទ្ធិកាន់កាំភ្លើងនោះ គួរតែមានស្មារតីសន្តិសុខនិយម ជាតិនិយម ឬកម្ពុជានិយមផង។
ដូច្នេះអង្គភាពកងកម្លាំងប្រដាប់អាវុធយើង គួរត្រូវគិតវែងឆ្ងាយ មិនគួរមានបុគ្គលណាមួយ ហ៊ានឲ្យអាជ្ញាប័ណ្ណប្រើប្រាស់កាំភ្លើង ទៅទៅឲ្យជនជាតិចិនទាំងអស់នោះទេ ពីព្រោះជនជាតិចិន ជាទូទៅមានចរិត ឆេវឆាវកោងកាចណាស់ ហើយនៅពេលមានបញ្ហាដូចនេះ នាំឲ្យខូចមុខមាត់ប្រទេសជាតិ ហើយបង្កជាសំណួរមួយនៅក្នុងចំណោមប្រជាជនកម្ពុជាថា ម៉េចបានជាវាទៅអីចឹង? ហេតុអ្វីបានជាចិន នៅកំពង់សោម មានកាំភ្លើងប្រើប្រាស់?
ចាប់ពីពេលតទៅ កងកម្លាំងប្រដាប់អាវុធ ពិសេសស្នងការនគរបាលខេត្តព្រះសីហនុ ដឹកនាំដោយលោកឧត្តមសេនីយ៍ទោ ជួន ណារិន្ទ ច្បាស់ជាត្រូវធ្វើការងារធ្ងន់ជាងមុន ដោយសហការជាមួយក្រុមការងារពិសេសរបស់ក្រសួងមហាផ្ទៃ ដែលបញ្ជូនទៅពីភ្នំពេញ ដើម្បីអនុវត្តច្បាប់តឹងរឹងជាងមុន ពិសេសលើជនជាតិចិន។
ករណីចិនមានកាំភ្លើង បាញ់សម្លាប់មនុស្ស និងបង្កជម្លោះក្នុងចំណោមជនជាតិចិនគ្នាឯងគឺជាអាទិភាព មុននឹងឈានដល់ការបង្កើនកិច្ចការពារសន្តិសុខ ពិសេសបង្កាករណីចាប់ជម្រិត ដែលនឹងអាចកើតមានជាយហេតុរវាងចិន និងចិនផង ឬក៏អាចជនជាតិចិនខិល ខូចមួយចំនួនទៅថ្ងៃខាងមុខ ដែលពួគេមានកាំភ្លើង អាចនឹងធ្វើសកម្មភាព បង្កអសន្តិសុខណាមួយដល់ពលរដ្ឋខ្មែរក៏អាចថាបាន បើសិនជាអាជ្ញាធរសមត្ថកិច្ច នៅតែបណ្តែតបណ្តោយបែបនេះ ឬដោយសារតែចង់បានលុយចិនខ្លាំងពេកនោះ? ៕
