កីឡា
អ្នកគាំទ្រ Man Utd ជួលយន្តហោះបំពាក់បដា សុំបណ្ដេញថ្នាក់ដឹកនាំរបស់ក្លឹប
អ្នកគាំទ្រក្លឹបបាល់ទាត់ Manchester United បានជួលយន្តហោះ១គ្រឿង ដើម្បីបំពាក់បដា សរសេរការស្នើសុំឲ្យម្ចាស់ក្លឹបធ្វើការបណ្ដេញលោក Ed Woodward នាយកប្រតិបត្តិរង ចេញពីតំណេង។
ប្រតិកម្មនេះ គឺបន្ទាប់ពីលោក Jose Mourinho អ្នកចាត់ការក្លឹប មិនអាចសម្រេចបំណងដើម្បីទិញយកការពារកណ្ដាលបន្ថែម មកពង្រឹងក្រុម មុនការបិទទីផ្សាដោះដូរ កាលពីពេលថ្មីៗកន្លងទៅ។ ជាងនេះទៅទៀត Man Utd បានទទួលបរាជ័យក្នុងការប្រកួតសប្ដាហ៍ទី២ ក្រោមថ្មីជើងក្លឹប Brighton ដើមរដូវកាល២០១៨-១៩ នេះ។
លោក Ed Woodward មានតួនាទីមួយក្នុងការចាត់ចែងចំពោះការដោះដូរកីឡាកររបស់ក្លឹបបិសាចក្រហម។
បើតាមវេបសាយ The Sun បានឲ្យដឹងថា ដើមឡើយ យន្តហោះបំពាក់បរានោះ ត្រូវហោះពីលើកីឡដ្ឋាន Old Trafford របស់ Man Utd ដើម្បីបង្ហាញប្រាប់ម្ចាស់ក្លឹប គ្រួសារ Glazer ក្នុងការប្រកួតសប្ដាហ៍ទី៣ ទល់នឹង Tottenham Hotspur ។ ក៏ប៉ុន្តែ ការតវ៉ានេះ អាចនឹងត្រូវពន្យារពេលដល់សប្ដាហ៍ទី៤ ពេល Man Utd ជួប Burnley នៅកីឡដ្ឋាន Turf Moor ។
បដានោះ ត្រូវបានសរសេរថា “ED OUT – LUHG” (Love United Hate Glazer) ។
គួររំឭកថា អ្នកគាំទ្រ Man Utd ធ្លាប់ធ្វើដូច្នេះម្ដងរួចទៅហើយ កាលពីឆ្នាំ២០១៤ ដើម្បីសុំឲ្យម្ចាស់ក្លឹបបណ្ដាញលោក David Moyes អតីតអ្នកចាត់ការទូទៅក្រុមបិសាចក្រហម៕
