ព័ត៌មានជាតិ
មនុស្សរាប់រយនាក់ស្លាប់និងដួលសន្លប់ដោយ សារអាកាសធាតុក្តៅខ្លាំងដល់៤២អង្សាសេ
ប៉ាគីស្ថានៈ មនុស្សរាប់រយនាក់បានស្លាប់នៅក្នុងទីក្រុង Karachi ប្រទេសប៉ាគីស្ថាន នៅសប្ដាហ៍នេះ ដោយសារតែអាកាសធាតុបានកើនឡើងរហូតដល់ទៅ ៤២អង្សាសេ។
លោក Faisal Edhi ប្រធានអង្គការសុខុមាលភាពសង្គម ដែលគ្រប់គ្រងគម្រោងសុខភាពសាធារណៈ រួមទាំងកន្លែងដាក់សព និងសេវាសង្គ្រោះបន្ទាប់ បានឲ្យដឹងថា «យើងទទួលបានសាកសពចំនួន ១៨០នាក់ ក្នុងរយៈពេលត្រឹម ៤ថ្ងៃ ដែលវាជាចំនួនទ្វេដង នៃចំនួនទទួលបានធម្មតា។ សាកសពភាគច្រើនបានស្លាប់ភា្លមៗ ដោយសារតែរលកកម្ដៅ»។
គួរបញ្ជាក់ថា រលកកម្ដៅនេះបានកើតឡើងស្របពេលជាមួយនឹង ការចាប់ផ្ដើមនៃពិធីបុណ្យរ៉ាម៉ាដាន (Ramadan) ដែលប្រជាជនប៉ាគីស្ថានរាប់លាននាក់ ត្រូវហាមមិនឲ្យផឹកទឹក និងទទួលទានអាហារចាប់ពីពេលថ្ងៃរះ រហូតដល់ថ្ងៃលិច។
ជាមួយគ្នានេះ នាយកដ្ឋានឧត្តុនិយមរបស់ប្រទេសប៉ាគីស្ថាន បានព្រមានថា អាកាសធាតុនៅទីក្រុង Karachi ទំនងជានឹងក្ដៅខ្លាំង ក្នុងអំឡុងពេល ២-៣ថ្ងៃខាងមុខ ខណៈគេព្យាករណ៍ថាអាចឡើងរហូតដល់ ៤៤អង្សាសេ៕
