សេដ្ឋកិច្ច
កម្ពុជា-ជប៉ុន រៀបចំកិច្ចព្រមព្រៀងសហប្រតិបត្តិការថ្មី លើការបញ្ជូនពលករជំនាញ
រដ្ឋមន្រ្តីក្រសួងការងារងបណ្តុះបណ្តាលវិជ្ជាជីវៈកម្ពុជា កំពុងតែបំពេញទស្សនកិច្ចការងារនៅក្នុងទីក្រុងតូក្យូ ប្រទេសជប៉ុន ក្នុងនោះ នាព្រឹកថ្ងៃទី២៥ ខែមីនានេះ លោកបណ្ឌិត អ៊ិត សំហេង បានជួបពិភាក្សាការងារជាមួយអង្គការ JITCO ។
ជំនួបនោះ បានពិភាក្សាលើកិច្ចសហប្រតិបត្តិការនាពេលកន្លងមក ទាក់ទងកម្មសិក្សាការីខ្មែរដែលកំពុងបំពេញកម្មសិក្សា និងធ្វើការនៅប្រទេសជប៉ុន ព្រមទាំងទាក់ទងទៅនឹងច្បាប់ស្តីពី ”ពលករជំនាញ” ដែលទៅធ្វើការនៅប្រទេសជប៉ុន តាមរយៈការផ្សព្វផ្សាយអំពីច្បាប់ និងនីតិវិធីដល់ភ្នាក់ងារទាំងនៅជប៉ុន និងកម្ពុជា ។ ជាមួយគ្នានេះ ភាគីទាំងពីរ ក៏បានឯកភាពគ្នារៀបចំកិច្ចព្រមព្រៀងសហប្រតិបត្តិការថ្មី ស្របតាមច្បាប់ថ្មីនេះ ដើម្បីធ្វើយ៉ាងណាឲ្យការគ្រប់គ្រង និងការការពារផលប្រយោជន៍ពលករកម្ពុជា ស្របតាមច្បាប់ នៃប្រទេសទាំងពីរ ។
គួររម្លឹកថា ប្រទេសជប៉ុន បានបើកភ្លើងខៀវដល់កម្ពុជា ក្នុងការបញ្ជូនពលករជំនាញ ទៅធ្វើការងារផ្លូវការ នៅប្រទេសជប៉ុន ចាប់ពីខែមេសា ឆ្នាំ ២០១៩ តទៅ ។ រដ្ឋាភិបាលជប៉ុន បានបើកឱកាសចំពោះពលករកម្ពុជាដែលមានជំនាញខ្ពស់ ដើម្បីទៅធ្វើការងារនៅប្រទេសជប៉ុននេះ គឺ បន្ទាប់ពីជប៉ុន បានបង្កើតច្បាប់ថ្មីមួយទាក់ទងទៅនឹងការជ្រើសរើស បណ្ដុះបណ្ដាល និងទទួលយកពលករបរទេស ទៅធ្វើការ ។
លោក រដ្ឋមន្រ្តីការងារ បានចាត់ទុកថា វាជាឱកាសការងារថ្មីមួយ សម្រាប់ប្រជាពលរដ្ឋកម្ពុជា តាមរយៈការបញ្ជូនពលករពេញសិទ្ធិ និង មានជំនាញទៅធ្វើការនៅប្រទេស ជប៉ុន ដោយសារពួកគេអាចស្វែងរកការងារដែលមានជំនាញខ្ពស់ និងទទួលបាន ប្រាក់ខែខ្ពស់។ ការបញ្ជូនពលករនេះ វានឹងបំពេញតម្រូវការការខ្វះខាតកម្លាំងពលកម្មរបស់ប្រទេសជប៉ុន ហើយនិងលើកកម្ពស់កិច្ចសហប្រតិបត្តិការរវាងកម្ពុជា-ជប៉ុន ។
សូមបញ្ជាក់ថា កន្លងមកប្រទេសកម្ពុជា បានបញ្ជូនតែកម្មសិក្សាការី គឺ អ្នកដែលទៅសិក្សាផងនិងទៅធ្វើការផងតែប៉ុណ្ណោះ ឲ្យទៅប្រទេសជប៉ុន ដែល បច្ចុប្បន្ននេះ មានកម្មសិក្សាការី ដែលកំពុងសិក្សា និងធ្វើការនៅជប៉ុន មានប្រមាណជាង ៩ ពាន់នាក់៕
