អន្តរជាតិ
ប្រតិភូអឺរ៉ុបចាប់ផ្តើមពិភាក្សាបញ្ហា EBA ជាមួយកម្ពុជា នាព្រឹកនេះ ខណៈនាយករដ្ឋមន្រ្តីខ្មែរប្រាប់កម្មករកករកុំឲ្យខ្វល់!
គណៈប្រតិភូអឺរ៉ុបបានចាប់ផ្ដើមដំណើរទស្សន កិច្ចរយៈពេល២ថ្ងៃនៅកម្ពុជា ដោយនៅថ្ងៃពុធនេះនឹងមានជំនួបជាមួយរដ្ឋមន្ដ្រីក្រសួងមហា ផ្ទៃ រដ្ឋមន្ដ្រីការបរទេស និងរដ្ឋមន្ដ្រីក្រសួងពាណិជ្ជកម្ម ដើម្បីជជែកពីបញ្ហាប្រព័ន្ធអនុគ្រោះពន្ធ EBA។
អ្នកនាំពាក្យក្រសួងការបរទេស លោក កេត សោផាន់ បាននិយាយថា មន្ដ្រីសហភាពអឺរ៉ុបទាំងនោះនឹងជួបរដ្ឋមន្ដ្រីក្រសួងមហាផ្ទៃ លោក ស ខេង នៅព្រឹកថ្ងៃពុធ ខណៈដែលនឹងមានជំនួបជាមួយរដ្ឋមន្ដ្រីការបរទេស លោក ប្រាក់ សុខុន និងរដ្ឋមន្ដ្រីក្រសួងពាណិជ្ជកម្ម លោក ប៉ាន សូរស័ក្ដិ នាពេលរសៀលថ្ងៃដដែល។
លោក កេត សោផាន់ បាននិយាយដូច្នេះថា ខ្ញុំមិនអាចវិនិច្ឆ័យមុនអំពីលទ្ធផលបានទេ។ សូមមកចូលរួមកិច្ចប្រជុំ ខ្ញុំនឹងធ្វើសន្និសីទមួយខ្លីបន្ទាប់ពីកិច្ចប្រជុំជាមួយឧបនាយករដ្ឋមន្ត្រីការបរទេសនៅរសៀលនេះ។
បន្ទាប់ពីលើកឡើងពីការព្រួយបារម្ភអំពីលទ្ធិ ប្រជាធិបតេយ្យនិងសិទ្ធិមនុស្សនៅកម្ពុជា សហ ភាពអឺរ៉ុបបានប្រកាសកាលពីខែកុម្ភៈ ថា ខ្លួនចាប់ផ្តើមដំណើរការនីតិវិធីផ្អាកជាបណ្តោះអាសន្ននូវកម្មវិធីអនុគ្រោះពន្ធ EBA។
EBA គឺជាគំនិតផ្តួចផ្តើមរបស់សហគមន៍អឺរ៉ុបដើម្បីជួយបណ្តាប្រទេសក្រីក្រឲ្យនាំចូលទំនិញទៅទីផ្សារអឺរ៉ុបដោយមិនបាច់បង់ពន្ធ ហើយកម្ម វិធីអនុគ្រោះពន្ធនេះអាចត្រូវបានដកចេញវិញ ក្នុងករណីមានការរំលោភបំពានសិទ្ធិមនុស្សធ្ងន់ធ្ងរ។
យោងតាមតួលេខផ្លូវការ ទំនិញដល់ទៅ ៤០ភាគរយនៃទំនិញទាំងអស់ ដែលនាំចេញពីកម្ពុជាទៅទីផ្សារអន្តរជាតិ គឺបាននាំចេញទៅកាន់ទីផ្សារសហគមន៍អឺរ៉ុប។
អង្គការ សមាគម សហជីព សហគមន៍ធុរកិច្ច នៅក្នុងសេចក្តីថ្លែងការណ៍កាលពីពេលថ្មីៗកន្លងទៅ បានសម្ដែងការព្រួយបារម្ភយ៉ាងខ្លាំងអំពីនីតិវិធីរបស់សហភាពអឺរ៉ុបដើម្បីដក EBA ពីកម្ពុជា។ សេចក្តីថ្លែងការណ៍ដែលមានចុះហត្ថ លេខាពីអង្គការ សមាគម សហជីព និងសហ គមន៍ ចំនួន៦៨ បាននិយាយថា ៖ «យើងមានការព្រួយបារម្ភយ៉ាងខ្លាំងលើការព្យួរប្រព័ន្ធអនុ គ្រោះពន្ធ EBA ដែលនឹងជះផលអវិជ្ជមានដោយផ្ទាល់និងប្រយោលដល់ជីវភាពរស់នៅនិងសុខ មាលភាពរបស់ពលរដ្ឋ និងការអភិវឌ្ឍនៅកម្ពុជាទាំងមូល។»
អង្គការ សមាគម សហជីព សហគមន៍ទាំងនេះ បានសម្ដែងការជឿជាក់ថា ស្ថានភាពអាក្រក់នេះនឹងអាចបញ្ជៀសបាន បើសិនជារដ្ឋាភិបាលប្រឹងប្រឹងប្រែងបំពេញកាតព្វកិច្ចរបស់ខ្លួន ដើម្បីបម្រើផលប្រយោជន៍ពិតដល់ពលរដ្ឋខ្មែរទូទាំងប្រទេស៕
