កម្សាន្ត
បាតុភូតដ៏មហស្ចារ្យ!ព្រះអាទិត្យនឹងរះចំកំពូលកណ្តាលនៃប្រាង្គប្រាសាទអង្គរវត្ត នាព្រឹកថ្ងៃទី២១មីនា ខាងមុខនេះ
ព្រឹត្តិការណ៍សមរាត្រីឆ្នាំ ២០១៩ បានមកដល់ទៀតហើយកូនខ្មែរយើងទាំងអស់គ្នា។ អាជ្ញាធរជាតិអប្សរា បានឱ្យដឹងនៅថ្ងៃទី១៨មីនានេះថា ព្រះអាទិត្យ នឹងរះឡើងចំកំពូលកណ្តាលនៃប្រាង្គប្រាសាទអង្គរវត្ត នាព្រឹកថ្ងៃទី២១ ខែមីនា ឆ្នាំ២០១៩ខាងមុខនេះ។
តាមការសិក្សារបស់អ្នកស្រាវជ្រាវរបស់មជ្ឈមណ្ឌលស្រាវជ្រាវ និងតម្កល់ឯកសារអង្គរ នៃអាជ្ញាធរជាតិអប្សរាឱ្យដឹងថា សមរាត្រីនារដូវប្រាំងនៅតំបន់អាស៊ីអាគ្នេយ៍ឆ្នាំ២០១៩នេះ នឹងត្រូវចំថ្ងៃទី២០ ខែមីនាខាងមុខ។
សមរាត្រី ជាវេលាដែលថ្ងៃនិងយប់មានរយៈពេលស្ទើរតែស្មើគ្នា។ ក្រៅពីនេះ ខែខ្លះ ថ្ងៃមានរយៈពេលវែងជាងយប់ ហើយខ្លះទៀត យប់មានរយៈពេលវែងជាងថ្ងៃវិញ។
ករណីពិសេសនៅអង្គរវត្តវិញ នាវេលាថ្ងៃ និងយប់ មានរយៈពេលស្មើគ្នានេះ ហៅសមរាត្រីព្រះអាទិត្យនឹងរះទ្បើងចំកំពូលកណ្តាលនៃអង្គរវត្តនាព្រឹកព្រលឹមស្រាងៗ ដែលគេអាចមើលឃើញពីក្លោងទ្វារកណ្តាលនៃគុកតារាជ (ក្លោងទ្វារធំខាងលិច) ចាប់ពីម៉ោង៥ និង៥០នាទីដល់ម៉ោងប្រហែល៧ព្រឹក នៅថ្ងៃព្រហស្បតិ៍ ទី២១ ខែមីនា ឆ្នាំ២០១៩។
អាជ្ញាធរជាតិអប្សរាបានអះអាងថា នេះជាអច្ឆិរយការណ៍របស់អង្គរវត្ត ដែលបានស្ថាបនាទ្បើងដោយមានការសិក្សាគន់គូរយ៉ាងល្អិតល្អន់របស់អ្នកប្រាជ្ញបណ្ឌិតសម័យអង្គរ រួមផ្សំគ្នារវាងទ្រឹស្តីគណិតសាស្រ្តវិស្វ កម្ម និងតារាសាស្រ្ត។ នេះគឺជាហេតុផលវិទ្យាសាស្រ្តមួយ ដែលបំពេញចម្លើយចំពោះសំណួរដែលសួរមិនចេះចប់ថា ហេតុដូចម្តេចបានជាអង្គរវត្តត្រូវបែមុខទៅទិសខាងលិច?។
ព្រឹត្តការណ៍បាតុភូតដ៏មហស្ចារ្យនេះ ចាត់ទុកជាការជូនដំណឹងដល់កូនខ្មែរទាំងអស់ ដើម្បីទៅចូលរួមទស្សនាទាំអស់គ្នា ព្រោះថាក្នុងមួយឆ្នាំបាតុភូតបែបនេះ មានតែម្តងប៉ុណ្ណោះ៕
