ពីនេះពីនោះ
៤ឆ្នាំមុន វៀតណាមសរសើរខ្មែរថាចេះផលិតរថយន្ត តែឥឡូវនៅតែខ្យល់ ឯវៀតណាមឡើងទីផ្សារបាត់
កាលពីឆ្នាំ ២០១៤ សារព័ត៌មានវៀតណាម Thanhniennews បានចុះផ្សាយពីទេពកោសល្យដែលខ្មែរអាចចេះផលិតរថយន្តដ៏ទំនើប ហើយក៏ឆ្លៀតឌឺដងបង្អាប់ឧស្សាហកម្មរបស់ខ្លួនមិនដើរទៅមុខសោះ។
សារព័ត៌មាននេះ បានស្រង់សម្តីមន្រ្តីជាន់ខ្ពស់វៀតណាមនៅពេលនោះ ដែលធ្វើការនៅផ្នែកឧស្សាហកម្មរថយន្តរបស់ប្រទេសវៀតណាម និយាយថា៖ «បើទោះបីវៀតណាមមានធនធានមនុស្សជំនាញៗជាច្រើន និងមានឧស្សាហកម្មរថយន្តដើរមុនប្រទេសកម្ពុជា ប៉ុន្តែវៀតណាមអាចនិយាយបានថា នៅដើរពីក្រោយប្រទេសកម្ពុជា សម្រាប់សមត្ថភាពក្នុងការផលិតរថយន្តដ៏ទំនើប»។
យ៉ាងណាមិញ នៅឆ្នាំ ២០១៨នេះ វៀតណាមចាប់ផ្តើមអភិវឌ្ឍឧស្សាហកម្មយានយន្តរបស់ខ្លួន រហូតផលិតចេញរថយន្តក្នុងស្រុកលើកដំបូង ហើយគ្រោងយកទៅបង្ហាញនៅលើទីផ្សារអន្តរជាតិទៀតផង។
វៀតណាមបានធ្វើឲ្យកក្រើកវិស័យឧស្សាហកម្មផលិតរថយន្ត ដោយបានបញ្ចេញរថយន្តកំពូលពីរគ្រឿងដំបូងគេ ដែលរថយន្តមួយជាប្រភេទ Sedan និងមួយទៀតជាប្រភេទ SUV គ្រោងនឹងបង្ហាញខ្លួនជាលើកដំបូងនៅក្នុងកម្មវិធីតាំងបង្ហាញរថយន្ត Paris Motor Show ប្រទេសបារាំង។
រថយន្តដំបូងគេរបស់វៀតណាមស្ថិតនៅក្រោមការផលិតក្រុមហ៊ុន VinFast។ រថយន្តនេះ នឹងត្រូវដាក់បង្ហាញនៅប្រទេសវៀតណាមនៅចុងឆ្នាំនេះ និងចេញលក់លើទីផ្សារនាខែកញ្ញា ឆ្នាំ ២០១៩។
ត្បិតថាជាម៉ាករថយន្តរបស់វៀតណាមមែន ប៉ុន្តែរូបរាងវាត្រូវបានរចនាឡើងដោយក្រុមហ៊ុនអ៊ីតាលីល្បីៗដូចជា Pininfarina និង Italdesign Giugiaro ជាដើម។ បន្ថែមពីនេះ ក្រុមហ៊ុន VinFast ក៏បានជួលបុគ្គលិកមកពីសហគ្រាសយានយន្តធំផងដែរ។
VinFast គឺជាក្រុមហ៊ុនស្ថិតនៅក្រោមសម្ព័ន្ធ Vingroup ជាសម្ព័ន្ធឯកជនដ៏ធំមួយរបស់វៀតណាម។ គោលបំណងនៃក្រុមហ៊ុននេះគឺបង្កើតនូវម៉ាកយានយន្តដែលជារបស់វៀតណាម និងជាយានយន្តដែលអាចនាំចេញលក់លើទីផ្សារអន្តរជាតិបាន។
ក្រឡេកមើលរថយន្តអង្គររបស់ខ្មែរទោះបីចំណាយពេលរាប់ឆ្នាំអភិវឌ្ឍ និងមានការបុកគ្រឹះសាងសង់រោងចក្រផលិត តែរហូតមកដល់ពេលនេះ គម្រោងនេះមិនដំណើរការទៅមុខ អាចនិយាយថានៅតែខ្យល់តែប៉ុណ្ណោះ។
លោក ញាន ផល្លឹក បានខិតខំប្រឹងប្រែង បង្កើតចេញជារូបរាងរថយន្តប្រកបដោយបច្ចេកវិទ្យាទំនើប ដើរដោយថាមពលអគ្គិសនី មិនចាញ់រថយន្តក្រុមហ៊ុនល្បីៗលើពិភពលោក ខណៈដែលអំឡុងឆ្នាំ កម្ពុជាមិនទាន់ទាំងមានរោងចក្រដំឡើងរថយន្តនៅឡើយ។ ការចេញម៉ូតរថយន្តអង្គរជាច្រើនជំនាន់ បានធ្វើឲ្យកម្ពុជាលេចត្រដែតឡើងល្បីរន្ទឺពេញឆាកអន្តរជាតិ ក្នុងវិស័យឧស្សាហកម្មផលិតរថយន្ត សូម្បីតែប្រទេសវៀតណាមដែលជាប្រទេសភូមិផងរបងជាមួយ ក៏ភ្ញាក់ផ្អើលមិនតិចដែរ ដែលដឹងថាកូនខ្មែរអាចមានសមត្ថភាពផលិតរថយន្តដ៏ទំនើបបានដោយខ្លួនឯង៕
