ព័ត៌មានជាតិ
កម្ពុជា មានសត្វត្មាត៣ប្រភេទ ដែលកំពុងរងគ្រោះជិតផុតពូជក្នុងពិភពលោក
នៅប្រទេសកម្ពុជា មានសត្វត្មាតចំនួន៣ប្រភេទ ដែលជាប្រភេទកំពុងរងគ្រោះជិតផុតពូជក្នុងពិភពលោក គឺ ត្មាតភ្លើង ត្មាតផេះ និងត្មាតត្នោត។ នេះបើតាមការឱ្យដឹងពីអង្គការមូលនិធិសកលសម្រាប់អភិរក្សធនធានធម្មជាតិ (WWF-Cambdoia) នៅថ្ងៃទី២៣ ខែសីហានេះ។
អង្គការនេះ បានលើកឡើងថា សត្វត្មាតជួយសម្អាតបរិស្ថាន ដោយស៊ីសាកសពសត្វដែលងាប់ស្អុយរលួយក្នុងព្រៃ ឬក្បែរសហគមន៍។ ពេលសត្វត្មាតស៊ីសាកសពសត្វអស់ វាជួយការពារមិនឱ្យមានក្លិនស្អុយ និងជំងឺនានា ឆ្លងដល់អ្នកភូមិ និងសត្វពាហនៈ ក្នុងសហគមន៍បានឡើយ។
អង្គការ WWF បានសរសេរនៅលើបណ្តាញសង្គមហ្វេសប៊ុកយ៉ាងដូច្នេះថា៖ «សត្វត្មាតការពារសហគមន៍ និងប្រជាពលរដ្ឋ។ សត្វត្មាតនាំសំណាង! រួមគ្នាការពារសត្វត្មាត ដោយមិនបរិភោគសាច់សត្វព្រៃ និងមិនប្រើប្រាស់ថ្នាំបំពុលសត្វព្រៃ»។
បើតាមរបាយការណ៍របស់អង្គការ WCS Cambodia បង្ហាញថា ចំនួនសត្វត្មាតនៅកម្ពុជា ក្នុងឆ្នាំ២០១៧ គឺមានតែ ១២១ក្បាលតែប៉ុណ្ណោះ ដែលជាចំនួនដ៏ទាបបំផុតនៅក្នុងកំណត់ត្រាចាប់តាំងពីឆ្នាំ២០០៣មក។ អង្គការនេះបញ្ជាក់ថា សត្វត្មាតនៅកម្ពុជា ក៏កំពុងតែទទួលការគំរាមកំហែងដោយសារ ការបាត់បង់ទីជម្រក និងកង្វះខាតចំណីអាហារដោយសារការធ្លាក់ចុះនៃចំនួនសត្វក្រចកជើង២ និងហ្វូងគោសាទិសស្រុក។ ចំណែកការបំពុល ក៏ប្រហែលជាការគំរាមកំហែងដ៏ខ្លាំងបំផុត ចំពោះហ្វូងសត្វតា្មតនៅកម្ពុជាផងដែរ៕
