ព័ត៌មានជាតិ
ក្រសួងអភិវឌ្ឍន៍ជនបទថា សីតុណ្ហភាពនឹងកើនកំដៅពី៤០-៥០អង្សានៅខែមេសានិងឧសភាឆ្នាំនេះ
រដ្ឋមន្រ្តីក្រសួងអភិវឌ្ឍន៍ជនបទ កាលពីដើមសប្តាហ៍នេះ បានចេញសេចក្តីណែនាំមួយទៅ ដល់ប្រធានមន្ទីររាជធានីខេត្តទាំងអស់ ត្រូវចុះពិនិត្យអណ្តូង ស្រះទឹក និងណែនាំដល់ប្រជា ពលរដ្ឋដែលរស់នៅតាមតំបន់ដែលងាយរង គ្រោះដោយសារការខ្វះទឹកឲ្យបង្កើនការយកចិត្តទុកដាក់ក្នុងការថែរក្សាប្រភពទឹកប្រើប្រាស់ប្រចាំថ្ងៃ និងប្រើប្រាស់ទឹកដោយលក្ខណៈសន្សំសំចៃ។
ការចេញសេចក្តីណែនាំនេះ គឺដោយយោងទៅលើសារាចរណែនាំលេខ០២ របស់រាជរដ្ឋា ភិបាលស្តីពីការចាត់វិធានការថែរក្សាទឹកទុក ដែលបានបង្ហាញថា កម្ពុជានឹងទទួលរងដោយ ប្រយោលពីឥទ្ធិពលបាតុភូតអែលនី ដោយបង្កឲ្យធាតុអាកាសនៅព្រះរាជាណាចក្រកម្ពុជានា រដូវប្រាំងនេះ ពិសេសនៅក្នុងខែមេសា និងខែ ឧសភា មានសភាពក្តៅហួតហែង ដោយសីតុណ្ហភាពអតិបរមានៅពេលខ្លះអាច ហក់ឡើងដល់ ៤០ ទៅ៥០អង្សាសេ។
ជាមួយគ្នានេះដែរ រដ្ឋមន្រ្តីក្រសួងអភិវឌ្ឍន៍ជន បទ ក៏ស្នើដល់ប្រធានមន្ទីររាជធានីខេត្ត ត្រូវទំនាក់ទំនងជាមួយអាជ្ញាធរមូលដ្ឋាន ដៃគូរអភិវឌ្ឍន៍នានា អង្គការជាតិ និងអន្តរជាតិ ដើម្បីឆ្លើយតបភ្លាមៗដល់ប្រជាពលរដ្ឋដែលកំពុងខ្វះខាតទឹកប្រើប្រាស់ ព្រមទាំងធ្វើរបាយកាណ៍ និងរាយការណ៍ជាប្រចាំមកក្រសួង ដើម្បីមានវិធានការបន្ទាន់៕
