ពីនេះពីនោះ
សង្គ្រាមមនសិការប្រឆាំងចិនចាប់ផ្ដើមផ្ទុះ បន្ទាប់ពីឃ្លីបវីដេអូ របស់ខ្ញុង
តាមពិតទៅភាពយូកូមបាតផ្សារ មធ្យោបាយរកស៊ីតាមបែបឧក្រិដ្ឋ និងជះលុយហួងហែងសេចក្ដីសុខរបស់ចិននៅខេត្តព្រះសីហនុ បានក្លាយទៅជាចំណុចរិះគន់របស់ពលរដ្ឋខ្មែរយូរហើយ ។ ប៉ុន្តែដោយគុណសម្បតិ្តរបស់មហាមិត្តចិនដ៍ពន់ប្រមាណមកលើរដ្ឋាភិបាលដែលពុំសូវមានសមត្ថកិច្ច ការិះគន់ទាំងនោះរបស់ពលរដ្ឋខ្មែរបានទុកត្រឹមតែនៅក្នុងពោះ ក្នុងចិត្ត ក្នុងបេះដូង ។ មិនហ៊ានខ្ជាក់ចេញមកក្រៅ ព្រោះខ្លាចខ្នោះ ខ្លាចគុក និងខ្លាចគេបាញ់ស្លាប់តាមចិញ្ចើមផ្លូវ ។
បញ្ហាទាំងអម្បាលមាណនេះរដ្ឋាភិបាល ពិសេសក្រសួងមហាផ្ទៃ បានដឹងច្បាស់ណាស់ ។ រហូតដល់ថ្នាក់បញ្ជូនមន្ត្រីគ្រាក់ៗថ្នាក់ផ្កាយជាច្រើនរូប ទៅទប់ទល់ស្ថានភាពអសន្តិសុខ ដែលបង្កឡើងដោយជនជាតិចិន នៅក្រុងព្រះសីហនុនេះទៀតផង ។ តែបើទោះបីជាបញ្ហាទាំងនេះ ត្រូវបានរដ្ឋាភិបាលបិទបាំងយ៉ាងមុតមាំក្ដី , ក៍ពេលនេះរំញោចអារម្មណ៍ដែលចេញពីបេះដូងរបស់អ្នកនាង ស្រេង សុកាន់ដា ដែលគេស្គាល់ថា នាង ខ្ញុង បានធ្វើឲ្យសង្គ្រាមមនសិការ ប្រឆាំងជនជាតិចិនផ្ទុះឡើង ។
នៅលើឃ្លីបវីដេអូប្រហែល៥នាទី របស់តារាកំប្លែងរូបនេះដែលត្រូវបានបង្ហោះកាលពីថ្ងៃអាទិត្យ ទី២៥ វិច្ឆិកា ឆ្នាំ ២០១៨ បានរៀបរាប់ពីចំនួនកើនឡើង នៃជនជាតិចិនស្ទើរលើសម្ចាស់ទឹកដី ហើយដែលជនជាតិនេះបានប្រើប្រាស់លុយជះទិញផ្ទះ ទិញដី សណ្ឋាគារ ។ ធ្វើឲ្យសណ្ឋាគារ និងផ្ទះសំណាក់ឡើងថ្លៃ ដែល នឹងបណ្ដាលឲ្យនាងរៀងចាលមិនហ៊ានមកកាន់ខេត្តទេសចរណ៍របស់ខ្មែរមួយនេះ នាពេលក្រោយៗទៀត ។
ដោយសារតែការហ៊ានលាតត្រដាងការពិត នៅក្នុងសង្គមមួយដែលមនុស្សរស់លាក់ការពិត បៀមទុកការពិត , ឃ្លីបវីដេអូរបស់នាងបានទាក់ទាញឲ្យមានការគាំទ្រយ៉ាងគគ្រឹកគគ្រេងពីអ្នកលេងបណ្ដាញសង្គម ។ ដែលវាជាផ្នែកមួយឆ្លុះបញ្ចាំងឲ្យឃើញយ៉ាងប្រត្យក្សថា ខ្មែរនៅស្គាល់ខុសស្គាល់ត្រូវ ស្គាល់ល្អស្គាល់អាក្រក់ ។ ខុសផ្ទុយពីមេដឹកនាំខ្មែរ នៃគណបក្សប្រជាជនកម្ពុជា ដែលបែរទៅក្រសោបនយោបាយចិន ខណៈដែលដែលប្រទេសមួយចំនួនដូចជា ភូមា វេណេហ្សូអេឡា ថ្មីៗនេះ …បានទាត់ចោល នយោបាយ និងការគ្រប់គ្រងដ៍កេងប្រវ័ញ្ញ និងពុតត្បុតរបស់ចិន ។ ហើយដែលពួកមេដឹកនាំបក្សប្រជាជនក៍មានប្រវត្តិស្រែកប្រាប់ពលរដ្ឋខ្មែរដែលថា ចិនជាប្រទេសអនុត្តរភាព ពាក់ព័ន្ធ នឹងការកាប់សម្លាប់ខ្មែរជិត៣លាននាក់ តែពេលនេះ បែរជាចាត់ទុកចិនជាខួរឆ្អឹងខ្នង មិនអាចកាត់ថ្លៃបានវិញនោះ ៕ ដោយ៖ កែវ វិទូរ្យ
