ព័ត៌មានជាតិ
កម្ពុជា៖ មរណភាពលោក កូហ្វី អាណាន់ ជាការបាត់បង់តួអង្គសន្តិភាពដ៏សំខាន់នៅលើពិភពលោក
មរណភាពរបស់លោក កូហ្វី អាណាន់ អគ្គលេខាធិការទី៧របស់អង្គការសហប្រជាជាតិកាលពីថ្ងៃទី១៨ ខែសីហា ជាការបាត់បង់តួអង្គដ៏សំខាន់របស់ពិភពលោកសម្រាប់សន្តិភាព និងការអភិវឌ្ឍន៍ប្រកបដោយចីរភាព។ នេះបើតាមសារលិខិតរបស់រដ្ឋមន្ត្រីការបរទេសកម្ពុជា លោក ប្រាក់ សុខុន ផ្ញើទៅកាន់លោក Antonio Guterres អគ្គលេខាធិការ UN ។
ក្នុងលិខិតចុះថ្ងៃទី២១ ខែសីហា ប្រមុខការទូតកម្ពុជា បានកត់សម្គាល់ពីតួនាទីដ៏សំខាន់របស់លោក កូហ្វី អាណាន់ នៅពេលលោកកាន់តំណែងជាអគ្គលេខាធិការ UN ដែលនាំឲ្យលោកទទួលបានពានរង្វាន់ណូបែលសន្តិភាព។
«ស្មារតី និងសមិទ្ធផលដ៏ឧត្តុង្គឧត្តមរបស់លោក កូហ្វី អាណាន់ ស្ថិតក្នុងដួងចិត្តរបស់យើងជានិច្ច និងបន្តជំរុញឲ្យពិភពលោកកាន់តែល្អប្រសើរសម្រាប់ទាំងអស់គ្នា»។ នេះជាការលើកឡើងរបស់លោក ប្រាក់ សុខុន៕