សេដ្ឋកិច្ច
ក្រុមហ៊ុន អិលប៊ីអិន គ្រុបឯក យកដុល្លារបាំងមេឃ នាំចូលកាកសំណល់ខុសច្បាប់តាមច្រកទ្វេភាគីដូនរ័ត្ន
ខេត្តត្បូងឃ្មុំ៖ យ៉ាងតិចមានកាកសំណល់ប្រមាណជាង ១០០តោន ស្មើនឹង៣ឡានយីឌុប ត្រូវបានឈ្មួញនាំពីប្រទេសវៀតណាមចូលតាមច្រកទ្វេភាគីដូនរ័ត្ន ស្ថិតក្នុងស្រុកមេមត់ ខេត្តត្បូងឃ្មុំកាលពីយប់ថ្ងៃទី១៨ ខែវិច្ឆិកា ឆ្នាំ២០១៨ ដោយឈ្មួញវៀតណាម និងឈ្មួញខ្មែរយកឡានទៅផ្ទេរកាក សំណល់នេះ នៅមាត់ច្រកតែម្តង ។
លោកបណ្ឌិត គុណ ញឹម អគ្គនាយក អគ្គនាយកដ្ឋានគយ និងរដ្ឋាករកម្ពុជា ធ្លាប់ជម្រាបជូន លោក លោកស្រី ប្រធាននាយកដ្ឋាន ប្រធានសាខា ប្រធានការិយាល័យគយ និងរដ្ឋាកររួចមកហើយ កាលពីថ្ងៃទី១០ ខែកក្កដា ឆ្នាំ២០១៨ លើការពង្រឹង ការត្រួតពិនិត្យ និងការទប់ស្កាត់ការនាំចូលសំណល់បាស្ទីក និងកាកសំណល់ផ្សេងៗគ្រប់ប្រភេទ ។ ផ្ទុយទៅវិញ មួយរយៈនេះ ត្រូវបានគេរាយការណ៍ថា ក្រុមហ៊ុន អិលប៊ីអិន គ្រុប ឯក បានលួចនាំចូលកាកសំណល់ហាមឃាត់នេះ តាមច្រកដូនរ័ត្ន យ៉ាងអនាធិបតេយ្យ ។ ពេលខ្លះក្នុងមួយយប់ មានពីរ ទៅ៣រថយន្តយីឌុប ។ លោក នូ ស៊ីថា ប្រធានសាខាគយ និងរដ្ឋាករខេត្តត្បូងឃ្មុំ បានអះអាងថា ក្រុមហ៊ុន អិលប៊ិអិន គ្រុប ឯក ទោះបីមាន ច្បាប់អនុញ្ញាត ឲ្យនាំចូលសំបកកំប៉ុងគ្រីប ចំនួន ៣២០០ តោនក៏ដោយ , ប៉ុន្តែក្រុមហ៊ុននេះ មិនអាចអនុញ្ញាតឲ្យនាំចូលសំបកកំប៉ុកកាកសំណល់នេះបាននៅឡើយទេ ដោយសារតែក្រុមហ៊ុនមិនទាន់ មានលិខិត និងកិច្ចសន្យាស្របច្បាប់ បញ្ជាទិញពីប្រទេសថៃនៅឡើយ ។
ប៉ុន្តែយ៉ាងណាក៍ដោយ នៅយប់ថ្ងៃទី១៨ ខែវិច្ឆិកា ឆ្នាំ២០១៨ ស្របពេលដែលឈ្មួញវៀតណាម និងឈ្មួញខ្មែរផ្ទេរកាកសំណល់នៅច្រកដូនរ័ត្ន ប្រធានសាខាគយរូបនេះបានប្រាប់តាមទូរស័ព្ទថា លោកបានបញ្ជាឲ្យក្រុមមន្ត្រីដឹកនាំដោយឈ្មោះ សិទ្ធ ចុះទៅបង្ក្រាប ។ ប៉ុន្តែជាលទ្ធផលការបញ្ជារបស់លោកនូ ស៊ីថា បានត្រឹមតែឲ្យមន្ត្រីគយទាំងនោះ ទៅមើល និងបើកផ្លូវឲ្យឈ្មួញដឹកជញ្ជូនកាកសំណល់បានយ៉ាងរលូនតែប៉ុណ្ណោះ ។
ក្រុមហ៊ុន អិលប៊ិអិន គ្រុប ឯក ក៏ត្រូវបានក្រសួងបរិស្ថាន ជាពិសេសនាយកដ្ឋានគ្រប់គ្រងសំណល់រឹង ហាមដាច់ខាតមិនឲ្យមានការនាំចូលកាកសំណល់ពីប្រទេសវៀតណាម ដោយសារតែក្រុមហ៊ុននេះ បានជំពាក់ឯកសារ លើលិខិតបញ្ជាទិញពីប្រទេសថៃ ។ ក្នុងនោះខាងក្រសួងបរិស្ថានថែមទាំងបានបញ្ជាក់ថា ប្រសិនបើក្រុមហ៊ុនមិនទាន់មានលិខិតបញ្ជាទិញពីប្រទេសថៃ ហើយហ៊ានលួចនាំចូលកាកសំណល់ ខាងក្រសួងបរិស្ថាន នឹងដកអាជ្ញាប័ណ្ណនេះជាបន្ទាន់ ។ ប៉ុន្តែធាតុពិត ក្រុមហ៊ុន អ៊ិលប៊ីអិនគ្រុប ឯក បាននាំចូលកាកសំណល់មិនតិចជាង២ពាន់តោននោះទេ មកទល់នឹងពេលនេះ ។
ពាក់ព័ន្ធការហូរចូលកាកសំណល់រឹងខាងលើនេះ លោកឧត្តមសេនីយ៍ទោ ប៉ែន រ័ត្ន ស្នងការនគរបាលខេត្តត្បូងឃ្មុំ បានប្រាប់សារព័តមានក្នុងស្រុកមួយ ថា ក្រុមហ៊ុននេះមាន ច្បាប់ នាំចូលសំបកកកំប៉ុងគីបចំនួន៣២០០តោន ។ ប៉ុន្តែលោកមិនបានដឹងថា ការនាំចូលនេះ គឺជាអំពើខុសច្បាប់ ឬយ៉ាងណា ខណៈមិនទាន់មានលិខិតបញ្ជាទិញពីប្រទេសថៃ ហើយកំពុងតែបំពានទៅលើការហាមឃាត់របស់ក្រសួងបរិស្ថាននោះ ។
ចំណែកលោក ជាម ច័ន្ទសោភ័ណ្ឌ អភិបាលនៃគណៈអភិបាលខេត្តត្បូងឃ្មុំ ដែលទើបឡើងកាន់តំណែងថ្មី ត្រូវគេកត់សម្គាល់ថា ហាក់មានភាពធូរលុង ខ្វះការទទួលខុសត្រូវ អនុញ្ញាតឲ្យឈ្មួញដឹកជញ្ជូនកាក សំណល់ឆ្លងកាត់តាមច្រកក្នុងដែនសមត្ថកិច្ចរបស់ខ្លួនយ៉ាងអនាធិបតេយ្យ បំពានទៅនឹងការហាមបប្រាមរបស់ក្រសួងបរិស្ថាន ក៏ដូចជាអគ្គនាយកដ្ឋានគយ និងរដ្ឋាករកម្ពុជាយ៉ាងធ្ងន់ធ្ងរបំផុតនោះ ។
បើទោះជាដូច្នេះក្ដីពេលនេះគេកំពុងតែរង់ចាំមើលថា តើក្រសួងបរិស្ថាន ហ៊ានដកហូតអាជ្ញាប័ណ្ណក្រុមហ៊ុន អិលប៊ិអិន គ្រុប ឯក ដែលថ្លើមធំកំពុងដឹកជញ្ជូនដោយគ្មានលិខិតបញ្ជាទិញពីប្រទេសថៃ តាមការ កំណត់របស់របស់ស្ថាប័នគយ និងក្រសួងដែរទេ ? ពិសេស អាជ្ញាធរខេត្ត ក៏ដូចជាអគ្គនាយកដ្ឋានគយ និងរដ្ឋាករកម្ពុជា គួរតែពិនិត្យទៅលើទិដ្ឋភាពច្បាប់ តើមន្ត្រីរបស់ខ្លួនមួយណា ? ដែលកំពុងពាក់ព័ន្ធនឹងផលប្រយោជន៍ ឈានដល់ការអនុញ្ញាតឲ្យនាំចូលកាកសំណល់តាមច្រកដូនរ័ត្ន ប្រកបដោយទ្រង់ទ្រាយធំយ៉ាងគឃ្លើនបែបនេះ ៕ PLK