ព័ត៌មានជាតិ
លោកថង សាវុន និងលោក គឹម រស្មី ហ៊ានផ្គើនបទបញ្ជាសម្តេចក្រឡាហោម បន្តឲ្យឈ្មួញកាប់ឈើខុសច្បាប់ក្នុងព្រៃសហគមន៏
ថ្មីៗនេះសម្តេចក្រឡាហោម ស ខេង បានធ្វើការព្រមានធ្ងន់ៗទាក់ទងនឹងការកាប់បំផ្លាញ
ទំនាក់ទំនងការផ្សាយៈ ០៧១ ៨៦១ ២២២២
ថ្មីៗនេះសម្តេចក្រឡាហោម ស ខេង បានធ្វើការព្រមានធ្ងន់ៗទាក់ទងនឹងការកាប់បំផ្លាញព្រៃឈើយ៉ាងរង្គាលនៅក្នុងខេត្តភាគឦសាន តែផ្ទុយទៅវិញលោក ថង សាវុន អភិបាលខេត្តរតនគិរី ទំនងញៀនញ៉ាមនឹងការប្រព្រឹត្តពុក រលួយ បានបណ្តោយឲ្យមេឈ្មួញល្បីឈ្មោះប្រចាំខេត្តនេះ បន្តកាប់បំផ្លាញព្រៃសហគមន៍ជនជាតិភាគតិចជាប់នឹងព្រំដែនស្ទើវិនាស អន្ត រាយ ដោយគ្មានរអែងថ្នាក់ដឹកនាំជាតិឡើយ។
តាមសេចក្តីរាយការណ៍ពីប្រជាសហគមន៍ភូមិប៉ាដលបានឲ្យដឹងថា សកម្មភាពកាប់បំផ្លាញព្រៃឈើពីក្រុមឈ្មួញមានអំណាចបានធ្វើឡើង នៅចំណុចភូមិមាលូ ភូមិភិ ឃុំញ៉ាង ស្រុកអណ្តូងមាស និងភូមិប៉ាដល ឃុំសេសាន ស្រុកអូរយ៉ាដាវ ខេត្តរតនគិរី។ សេចក្តីរាយការណ៍បន្តថាមេឈ្មួញឈើល្បីឈ្មោះ ណុប វណ្ណះ និងឈ្មោះ ហូ ជីវ៉ៃ ជាមន្រ្តីអាវុធហត្ថ ដែលទំនងមានការបើកដៃពីសំណាក់លោក ថង សាវុន អភិបាលខេត្តនិងលោក គឹម រស្មី មេបញ្ជាការអាវុធហត្ថខេត្ត បានចំណាយលុយជាង៣០០០ ដុល្លារក្នុងមួយរថយន្តប្រកុងទៅឲ្យស្ថានប័នជំនាញពាក់ព័ន្ធចំនួន១៩ ដែលអង្គុយចាំរាប់ក្បាលឡានយកលុយ ជាថ្នូរការមិនបង្ក្រាបមុខជំនួញឈើខុសច្បាប់ដឹកទៅលក់នៅព្រំដែនយួននេះ។
ប្រភពខាងលើបានបន្តទៀតថា មេឈ្មួញឈើដ៏មានអំណាចទាំងពីរនាក់ខាងលើ បានឲ្យមេ ការរបស់ខ្លួនម្នាក់ឈ្មោះ សុី នឿន មើលការ ខុសត្រូវលើកម្មករកាប់ឈើដែលជាជនជាតិយួនប្រដាប់ដោយម៉ាសុីនត្រង់សុីន័ររាប់រយគ្រឿងនិងគ្រឿងចក្រជិត១០០គ្រឿង ធ្វើការកាប់បំផ្លាញព្រៃសហគមន៍ទាំងបីភូមិខាងលើយ៉ាងវិនាសកម្ម។ ឈើមូលប្រភេទ ស្រឡៅ ផ្ចឹក សុក្រំ គគី ត្រូវគេកាប់និងដឹកចេញទៅលក់នៅព្រំដែនវៀតណាមតាមផ្លូវភូមិភិ ចំណុចបង្គោល ព្រំដែនលេខ២៥ តាមប៉ុស្តិ៍ហ្វាតាំ ក្នុងមួយថ្ងៃៗមិនតិចជាង៥០រថយន្តប្រកុងឡើយ។
ជនជាតិដើមភាគតិចចារ៉ាយ រស់នៅភូមិប៉ាដល់ ឃុំសេសាន លោក រមាស់ ស្វិត ឲ្យដឹងថា ព្រៃសហគមន៍ភូមិប៉ាដល់ សំបូរដោយដើមឈើធំៗ មានមានតម្លៃរាប់រយហិកតា ដែលជនជាតិដើមភាគតិចចារ៉ាយគោរពបូជាច្រើនជំនាន់ហើយនោះ កំពុងទទួលរងការអាររំលំយកឈើមានតម្លៃធ្វើអាជីវកម្ម ដោយគ្មានការអនុវត្តច្បាប់។ ជនជាតិដើមរូបនេះបន្តថាមេឈ្មួញរក
សុីឈើដ៏មានអំណាចបានគំរាមបង្ខំប្រជាសហ គមន៍ឲ្យទទួលយកលុយក្នុងមួយគ្រួសារពី៥០ មឺុនរៀលដល់ ១លានរៀលជាថ្នូរក្នុងការកាប់យកឈើ ហើយថាបើពួកគាត់មិនយកក៏គេនៅតែកាប់ឈើយកទៅលក់ដដែលជាដដែល បើអាជ្ញាធរមានសមត្ថកិច្ចមិនអើពើផងនោះ។
មេឃុំសេសានលោក សេវ ស្វែង ទទួលស្គាល់ ថា អ្នកភូមិជាង ១រយគ្រួសារ ពិតជាបានទទួលប្រាក់ពីឈ្មួញ ជាថ្នូរអនុញ្ញាតឲ្យគេកាប់ឈើក្នុងព្រៃសហគមន៍ភូមិប៉ាដល់។ យ៉ាងណាអាជ្ញាធរឃុំ មិនគាំទ្រចំពោះការលក់ព្រៃឈើនោះទេ តែមិនអាចហាមឃាត់សហគមន៍បាន ហើយលោកបានផ្តល់ដំណឹងរឿងនេះទៅថ្នាក់លើដែរ។
មន្រ្តីអាវុធហត្ថខេត្តរតនគិរីមួយរូបសុំមិនបញ្ចេញឈ្មោះបានខ្សិបប្រាប់អង្គភាពពន្លឺខ្មែរថា ទោះបីកន្លងមកមានអង្គភាពសារព័ត៌មាន ទាំងក្នុងស្រុកនិងក្រៅស្រុកធ្វើការចុះផ្សាយពីសកម្ម ភាពរកសុីឈើខុសច្បាប់ របស់មេឈ្មួញល្បី ឈ្មោះទាំងពីរនាក់ខាងលើក្តី តែហាក់គ្មានសញ្ញាណណាមួយថា ចៅហ្វាយខេត្តលោក ថង សាវុន និងលោក គឹម រស្មី យកវិធានការច្បាប់ទៅអនុវត្តន៍លើបុគ្គលទាំងពីររូបនេះឡើយ ។ បែបនេះបានបង្កឲ្យមានការមន្ទិលសង្ស័យថាលោក ថង សាវុន និង លោក គឹម រស្មី អាចជាម្ចាស់ភាគហ៊ុនមួយដ៏ធំក្នុងជំនួញឈើខុស ច្បាប់ក្នុងខេត្តរតនគិរី៕ ដោយ ខេមរា!
