កម្សាន្ត
ស្នាដៃថ្មីរបស់នាយគ្រឿនចេញហើយគឺរឿង “វិញ្ញាណទីងមោង”
ស្នាដៃថ្មីរបស់នាយគ្រឿនបានចេញជាផ្លូវការហើយគឺរឿង “វិញ្ញាណទីងមោង” ជារឿងទីបួនរបស់លោក ដែលសម្ពោធកាលពីថ្ងៃទី២២ ខែសីហា ឆ្នាំ២០១៨ នៅរោងភាពយន្តឡេជេន សាខាបឹងកក់។
រឿងថ្មីរបស់នាយ គ្រឿន លើកនេះបានដោយប្រជុំដោយតារាភាពយន្តមានទេពកោសល្យជាច្រើននាក់ចូលរួមសម្តែង សម្រាប់ផលិតកម្មអិលឌី នៃខ្សែភាពយន្តល្អភ័យរន្ធខ្លាចព្រឺរព្រួច។
នាយ គ្រឿង បាននិយាយថា លោកបានដឹកនាំរឿងបានចំនួន៣លើកមកហើយ ដោយនេះជាស្នាដៃទី៤ដែលរំលេចឡើង។ រឿង ”វិញ្ញាណទីងមោង” ជារឿងបែបកំប្លែងមានខ្មោចលងបែបសើចសប្បាយ និងចង់ឲ្យអ្នកទស្សនាបានសើចសប្បាយចិត្តកុំឲ្យធុញថប់ពេកក្នុងការងារ។ លោកនៅតែចងចាំកត់សម្គាល់ គឺតារារៀមច្បងទេព រិនដារ៉ូ ដែលនៅតែជាតួអង្គឆ្នើមសម្តែងបត់បែនបានគ្រប់សណ្ឋាន។ បើនិយាយពីការគោរពពេលវេលាថត លោកសូមនិយាយថា ពិតជាលេខ១ គាត់មកថតមុនម៉ោងមិនដែលឱ្យក្រុមការងារខ្វល់តេទូរស័ព្ទរកឡើយ។
អ្នកដឹកនាំរូបនេះ បានបន្តថា ឆ្លងកាត់ការធ្លាប់ដឹកនាំសម្តែងលោកចង់ឲ្យតួមួយចេះគោរពម៉ោងពេលកុំឲ្យខូចការរៀបចំ តែអាក់ខានមិនឲ្យដំណឹងនោះ ខូចការទាំងអស់គ្នា ខាតបង់ប្រយោជន៍រួមណាស់។ ដូចនេះយុវវ័យដែលស្នេហារាល់ស្នាដៃរឿងកន្លងមករបស់អិលឌី អាចមកទស្សនារឿងការចាក់បញ្ចាំងជាផ្លូវការរឿង “វិញ្ញាណទីងមោង” ចាប់ពីថ្ងៃទី២៣ខែសីហានេះតទៅ នៅគ្រប់រោងកុនលេជេនទាំងអស់។
ជាមួយគ្នានោះ លោក ព្រហ្ម បញ្ញាវ័ន្ត តំណាងរោងភាពយន្តលេជេនបានបញ្ជាក់ថា រឿង “វិញ្ញាណទីងមោង” ខាងរោងកុនបានទស្សនារួចហើយឃើញថា មានការទាក់ទាញលើចំណុចមួយចំនួន ដូចជាចំណងជើងក៏ល្អតួអង្គក៏មានឈ្មោះនិងជំនាញ។ រឿងប្លែក គឺមានចំនួនអ្នកគាំទ្រតាមបណ្តាញសង្គមឃើញថា ច្រើនហើយសុទ្ធតែចង់ចូលរួមមកទស្សនា។ រឿងនេះលោករំពឹងថា មានតួលេខអ្នកមកមើលពិតជាច្រើនដូចក្តីរំពឹងទុកមិនខាន។
លោក ទេព រិនដារ៉ូ ដែលមានវត្តមានក្នុងរឿងនេះប្រាប់ថា ស្នាដៃនាយគ្រឿនដែលផលិតរឿងមួយនេះ ធ្វើឲលោកពិបាកសម្តែងដោយសារតែចំណុចកំប្លែងមួយមុខ មិនមែនជាជំនាញបទពិសោធន៍ថ្មីមួយទៀតក្នុងសិល្បៈ។ លោកសរសើរដល់នាយគ្រឿន ដែលអាចដឹកនាំបានល្អ គាត់ពូកែធ្វើឲ្យយើងចាប់របៀបសម្តែងចំកំប្លែងបានធ្វើទៅរលូនទៅមុខ៕
