កម្សាន្ត
ចច គ្លូនី ជាប់ជាតារាសម្តែងបុរសរកចំណូលបានខ្ពស់ជាងគេលើពិភពលោក ក្រោយរកបាន ២៣៩ លានដុល្លារក្នុងរយៈពេលត្រឹម ១២ ខែ
លោក ចច គ្លូនី គឺជាតារាសម្តែងស៊ីថ្លៃបំផុតរបស់ហូលីវូដប្រចាំឆ្នាំ ២០១៨ បន្ទាប់ពីរកប្រាក់បាន ២៣៩ លានដុល្លារក្នុងរយៈពេល ១២ ខែមកនេះ។
តារាសម្តែងក្នុងរឿង Oceans 11 រូបនេះបានដណ្តើមយកចំណាត់ថ្នាក់លេខ ១ ក្នុងបញ្ជីប្រចាំឆ្នាំរបស់ទស្សនាវដ្តី Forbes ពីលោក ម៉ាក វ៉ាល់បឺក បន្ទាប់ពីមិនបានជាប់សូម្បីចំណាត់ថ្នាក់កំពូលទាំង ១០ កាលពីឆ្នាំមុន។
ភាគច្រើននៃប្រាក់ចំណូលកប់ពពករបស់គាត់មិនមែនបានមកពីប្រាក់ខែទេ ប៉ុន្តែបានមកពីការលក់ស្រារបស់ក្រុមហ៊ុន Casamigos Tequila ដែលគាត់បានសហការបង្កើតឡើងកាលពីឆ្នាំ ២០១៣ ដោយជួយឱ្យគាត់រកប្រាក់ចំណេញបាន ២៣៣ លានដុល្លារ។
តារាសម្តែងអាយុ ៥៧ ឆ្នាំរូបនេះមិនបានបង្ហាញខ្លួននៅក្នុងខ្សែភាពយន្តណាមួយនោះទេនៅចន្លោះថ្ងៃទី ១ ខែមិថុនាឆ្នាំ ២០១៧ ដល់ខែមិថុនាឆ្នាំនេះ ប៉ុន្តែបានទទួលកម្រៃពីការថតផ្សាយពាណិជ្ជកម្មឱ្យក្រុមហ៊ុន Nespresso។
តារាសម្តែងផ្សេងទៀតនៅក្នុងបញ្ជីក៏បានរកប្រាក់ចំណូលពីប្រភពខាងក្រៅ ឬ កើបលុយពីការសម្តែងក្នុងរឿងដែលចំណាយថវិកាធំៗផងដែរ។
តារាសម្តែងប្រុសទាំង ១០ ដែលរកចំណូលខ្ពស់បំផុតនៅលើពិភពលោក៖
១. ចច គ្លូនី ២៣៩ លានដុល្លារ
២. ដ្វេន ចនសុន ១២៤ លានដុល្លារ
៣. រ៉ូបឺត ដោនី ជេអា ៨១ លានដុល្លារ
៤. គ្រីស ហេមស្វត ៦៤,៥ លានដុល្លារ
៥. ជែកគី ចាន់ ៤៥,៥ លានដុល្លារ
៦. វីល ស្មីត ៤២ លានដុល្លារ
៧. អាក់សាយ កុមារ ៤០,៥ លានដុល្លារ
៨. អាដាំ សាន់ឌ្ល័រ ៣៩,៥ លានដុល្លារ
៩. សាល់ម៉ាន់ ខាន់ ៣៧,៧ លានដុល្លារ
១០. គ្រីស អ៊ីវ៉ាន់ ៣៤ លានដុល្លារ៕