ព័ត៌មានជាតិ
លោក យន្ត មីន គួរពិនិត្យករណីលើកដាក់ខ្សាច់បែបអនាធិបតេយ្យ នៅកំពង់ផែទំនប់រលក ដែលកំពុងរាំងស្ទះដល់ការលើកដាក់ទំនិញចេញចូលគ្រប់ប្រភេទ
ដោយ៖ ខេមរា ទំនាក់ទំនងការផ្សាយលេខ ០៧១ ៨៦១ ២២២២
រយៈពេលជាង០១ខែកន្លងទៅនេះ សកម្មភាពលើកដាក់ ចរាចរណ៍ទំនិញគ្រប់ប្រភេទនៅកំពង់ផែទំនប់រលកមានការថយចុះយ៉ាងគំហុក ធ្វើឲ្យការប្រមូលចំណូលពន្ធរដ្ឋមានការធ្លាក់ចុះគួរឲ្យព្រួយបារម្ភ ដែលបណ្តាលមកពី សកម្មភាព កើបខ្សាច់យ៉ាងអនាធិបតេយ្យចេញពីសាឡាងធំៗ ដោយមានមន្ត្រីយោធាដ៏មានអំណាចម្នាក់ មានតួនាទីជានាយឧត្តមសេនីយ៍នៅពីក្រោយខ្នង។
បើកតាមមន្ត្រីគយនិងរដ្ឋាករច្រកទ្វារកំពង់ផែទំនប់រលកមួយរូបសុំមិនបញ្ចេញឈ្មោះបានឲ្យដឹងថា រយៈពេលជាងមួយខែមកហើយ លោកឧកញ៉ា សូ ជុងហ៊ួ ដែលជាម្ចាស់កំពង់ផែទំនប់រលក បានចុះកុងត្រាជាមួយក្រុមហ៊ុនរកស៊ីខ្សាច់ដ៏មានអំណាច ដោយអនុញ្ញាតិឲ្យមានការចេញចូល ចតសាឡាងដឹកខ្សាច់ធំៗ និងធ្វើសកម្មភាពយ៉ាងអនាធិបតេយ្យកើបខ្សាច់ដាក់គរដូចភ្នំលើកំពង់ផែ និងកើបដាក់រថយន្តធំៗ ដឹកទៅបម្រើការលើវិស័យសំណង់ដែលកំពុងមានតម្រូវការកើនឡើងខ្លាំងនៅក្នុងខេត្តនេះ។
មន្ត្រីរូបនោះបន្តថា មួយថ្ងៃៗសកម្មភាពចេញចូលសាឡាងដឹកខ្សាច់ធំៗនិងសកម្ម កើបខ្សាច់ដាក់រថយន្តតូចធំបន្តកន្ទុយគ្នាឥតដាច់។សកម្មភាពបែបនេះ បានធ្វើឲ្យរាំងស្ទះដល់ការចូលចតកប៉ាល់ដឹកទំនិញផ្សេងៗទៀត និងការលើកដាក់ទំនិញ ក៏ដូចជាចរាចរណ៍ទំនិញចេញចូលក្នុងកំពង់ផែទំនប់រលកដ៏តូចចង្អៀតមួយនេះយ៉ាងខ្លាំង។ ដោយសារតែមានការរាំស្ទះដល់ការលើកដាក់ទំនិញគ្រប់ប្រភេទដែលធ្លាប់ធ្វើជាប្រក្រតីពីពេលកន្លងមកបែបនេះ មន្ត្រីគយនិងរដ្ឋាករខាងលើ បានសម្តែងការព្រួយបារម្ភថា ចំណូលពន្ធដែលប្រមូលបានពីចរាចរទំនិញនឹងមានការធ្លាក់ចុះមិនតិចជាង៣០ភាគរយនោះទេសម្រាប់ខែសីហាឆ្នាំ២០១៨នេះ។
មន្ត្រីដដែលរូបនេះបន្ថែមថា ដោយសារតែខ្លាចអំណាចឧកញ៉ា សូ ជុងហ៊ួ ជាម្ចាស់កំពង់ផែ ក៏ដូចជាខ្លាចអំណាចនាយឧត្តមសេនីយ៍យោធាដែលឈរកាងពីក្រោយក្រុមហ៊ុនរកស៊ីខ្សាច់ និងទោះបីដឹងថាចំណូលពីការប្រមូលពន្ធមានការធ្លាក់ចុះគួរឲ្យបារម្ភដូចបានរៀបរាប់ខាងលើក្តី ក៏ពួកគាត់ដែលមានតួនាទីជាមន្ត្រីតូចតាច បានត្រឹមតែនិយាយមិនចេញ ដោយសង្ឃឹមថាអាជ្ញាធរដែនដីដែលដឹកនាំដោយលោក យន្ត មីន ជាគណៈអភិបាលខេត្ត លោកនឹងបានដឹងនិងមានវិធានការយ៉ាងណាជួយសម្រួលដោះស្រាយ ឲ្យកប៉ាល់ចូលចត លើកដាក់ទំនិញគ្រប់ប្រភេទ វិលទៅរកប្រកតីភាពឡើងវិញ ដើម្បីសម្រេចឲ្យបានតាមផែនការប្រមូលពន្ធ ដែលអគ្គនាយកដ្ឋានគយនិងរដ្ឋាករបានកណត់។
ប្រជាពលរដ្ឋដែលរស់នៅក្នុងតំបន់កំពង់ផែទំនប់រលកបានរអ៊ូរទាំថា ចាប់ពីពេលដែលសាឡាងដឹកខ្សាច់ធំៗ ចេញចូលកើបខ្សាច់ជាង០១ខែមកនេះ សម្លេងគ្រឿង ចក្រនិងរថយន្តដឹកខ្សាច់ចេញចូល បានបង្កការរំខានដល់បរិស្ថាននិងជីវភាពប្រចាំរបស់ពួកគាត់យ៉ាងខ្លាំង។ពួកគាត់លើកឡើងថា ផ្លូវថ្នល់ក្នុងក្រុងព្រះសីហនុដែលកំពុងរងការខូចខាត មួយភាគធំគឺបណ្តាលមកពីរថយន្តធំៗដឹកខ្សាច់លើសទម្ងន់ចេញពីកំពង់ផែនេះ ហើយមួយផ្នែកទៀតទឹកធូលីខ្សាច់ដែលស្រក់ចេញពីរថយន្តធ្លាក់លើថ្នល់ បានបង្កភាពហុយទ្រលោមនិងបរិស្ថានកខ្វក់ដល់អ្នកទេសចរដែលមកកម្សាន្តក្នុងខេត្តព្រះសីហនុផងដែរ។
ប្រជាពលរដ្ឋទាំងនោះលើកឡើងថា លោក យន្ត មី គួរចាត់វិធានការបង្វែរសាឡាងដឹកខ្សាច់ទាំងនោះ ឲ្យទៅចូលចតកើបខ្សាច់នៅក្នុងកំពង់ផែស្ទឹងហាវវិញទៅ ព្រោះកំពង់ផែនោះធំទូលាយ និងមានផលប៉ះពាល់បរិស្ថានក៏តិច ជាពិសេសគឺជួយបញ្ចៀស បញ្ហាកកស្ទះចរាចរណ៍និងសុវត្ថិភាពធ្វើដំណើរ៕
