ព័ត៌មានជាតិ
កម្ពុជាប្តេជ្ញាដោះស្រាយបញ្ហាប្រឈមរួម នៅពេលខ្លួនធ្វើជាប្រធានអាស៊ាននៅឆ្នាំក្រោយ
ក្នុងសារលិខិតកម្រាស់៤ទំព័រ កាលពីថ្ងៃទី០៦សីហា២០២១ សម្រាប់អបអរខួប៥៤ឆ្នាំនៃការបង្កើតសមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន ដែលបង្កើតឡើងនៅថ្ងៃទី០៨សីហាឆ្នាំ១៩៦៧ សម្តេចតេជោប្រមុខរដ្ឋាភិបាលកម្ពុជា បានរំលេចឡើងនូវសមិទ្ធផលជាច្រើនដែលអាស៊ានសម្រេចបានក្នុងរយៈពេលកន្លះសតវត្សរ៍កន្លងមកនេះ។ ប៉ុន្តែជាមួយគ្នានេះ សម្តេច ហ៊ុន សែន ក៏បានកត់សម្គាល់ផងដែរ ពីបញ្ហាប្រឈមមុខរបស់អាស៊ាននាពេលបច្ចុប្បន្ន។
ឧបសគ្គដែលអាស៊ានកំពុងប្រឈមនៅពេលនេះ គឺការផ្ទុះឡើងនូវមេរោគកូវីដ១៩ ចាប់ពីឆ្នាំ២០២០មក ដែលបានទាញទម្លាក់សេដ្ឋកិច្ចតំបន់ និងសកលលោកឲ្យធ្លាក់ចូលក្នុងវិបត្តិធ្ងន់ធ្ងរ ហើយប៉ះពាល់ខ្លាំងដល់ការរស់នៅរបស់ប្រជាជន។
ក្រៅពីមេរោគដែលឆ្លងរាលដាលនេះ កំណើននៃការប្រកួតប្រជែងផ្នែកភូមិសាស្ត្រនយោបាយ និងការប្រឈមមុខដាក់គ្នារវាងមហាអំណាច ដែលរាលដាលទៅជាសង្គ្រាមពាណិជ្ជកម្ម និងបច្ចេកវិទ្យា ក៏កំពុងដាក់សម្ពាធកាន់តែធ្ងន់ធ្ងរដល់សន្តិសុខតំបន់។ បន្ថែមពីលើនេះ ក៏មានដែរ បញ្ហាប្រឈមជាប្រពៃណីរបស់អាស៊ាន គឺការប្រែប្រួលអាកាសធាតុ ឧក្រិដ្ឋកម្មឆ្លងដែន គ្រឿងញៀន ការជួញដូរមនុស្ស និងភេរវកម្ម។នេះបើតាមប្រមុខរដ្ឋាភិបាលកម្ពុជា។
នៅចំពោះមុខបញ្ហាប្រឈមទាំងអស់នេះ សម្តេចនាយករដ្ឋមន្ត្រី ហ៊ុន សែន បានអះអាងថា នៅពេលកម្ពុជាក្លាយជាប្រធានអាស៊ាននៅឆ្នាំ២០២២ កម្ពុជាប្តេជ្ញាបន្តខិតខំប្រឹងប្រែងលើកកម្ពស់យន្តការពង្រឹងសកម្មភាពរួមគ្នា ដើម្បីដោះស្រាយនូវបញ្ហាប្រឈមរួមដែលតំបន់នេះកំពុងជួបប្រទះ។
សម្រាប់លោកបណ្ឌិត ឈាង វណ្ណារិទ្ធ ប្រធានវិទ្យាស្ថានចក្ខុវិស័យអាស៊ី ឱកាសនិងបញ្ហាប្រឈម នឹងដើរទន្ទឹមគ្នា នៅពេលកម្ពុជាធ្វើជាប្រធានអាស៊ាននាឆ្នាំក្រោយនេះ ខណៈអាស៊ានកំពុងប្រឈមនឹងបញ្ហាធំៗមួយចំនួន គឺកូវីដ១៩ និងវិបត្តិផ្ទៃក្នុងនៅភូមាជាដើម៕ដកស្រង់ទាំងស្រុងពីវិទ្យុបារាំងអន្តរជាតិ
