ព័ត៌មានជាតិ
ដោយខ្លាចក្រែងផ្ទុះការឆ្លងមេរោគកាចសាហាវថ្មីទៀត OMS/WHO សំណូមពរឲ្យផ្អាកការលក់ដូរសត្វព្រៃ
អង្គការសុខភាពពិភពលោក រួមជាមួយអង្គការសុខភាពសត្វពិភពលោក និងកម្មវិធីបរិស្ថានអង្គការសហប្រជាជាតិ បានរួមគ្នាអំពាវនាវ សំណូមពរឲ្យអាជ្ញាធរប្រទេសទាំងអស់ ចាត់វិធានការ ផ្អាកការលក់ដូរសត្វព្រៃនៅរស់ នៅតាមទីផ្សារនានា។ យោងតាមស្ថាប័នទាំង៣នេះ សត្វព្រៃនៅរស់ ជាពិសេសសត្វចិញ្ចឹមកូនដោយទឹកដោះ គឺជាប្រភពនៃការចំលងមេរោគចម្លែកៗ បង្កជំងឺកាចសាហាវទៅកាន់មនុស្ស។ ជាក់ស្តែង មេរោគជំងឺកូវីដ១៩ ដែលគេសង្ស័យថា មានប្រភពចេញ ពីសត្វប្រចៀវ។
អង្គការសុខភាពពិភពលោក រួមជាមួយអង្គការសុខភាពសត្វពិភពលោក និងកម្មវិធីបរិស្ថានអង្គការសហប្រជាជាតិ បានចេញលិខិតអំពាវនាវមួយ នៅថ្ងៃអង្គារទី១៣មេសា ដោយបានសំណូមពរ ឲ្យគ្រប់ប្រទេសទាំងអស់ ផ្អាកការជួញដូរ លក់សត្វព្រៃនៅរស់ នៅតាមទីផ្សារនានា។ យោងតាមស្ថានប័នទាំង៣នេះ សត្វព្រៃគឺជាប្រភពនៃចម្លងមេរោគថ្មីៗ ប្រមាណ៧០% ទៅកាន់មនុស្សយើង។
ក្រៅពីអំពាវនាវ ឲ្យផ្អាកការលក់ដូរសត្វព្រៃនៅរស់ នៅតាមទីផ្សារ ស្ថាប័នសុខភាព និងបរិស្ថានទាំង៣នេះ បានអំពាវនាវផងដែរ ឲ្យរដ្ឋាភិបាលប្រទេសទាំងអស់ ត្រូវតែប្រញ៉ាប់រៀបចំវិធានការ និងក្រិត្យក្រមសុវត្ថិភាពអនាម័យនៅតាមទីផ្សារ ដែលមានលក់សាច់សត្វ។ វិធានការអនាម័យខ្ពស់ គឺមិនត្រឹមតែការពារ ការឆ្លងជំងឺផ្សេងពីសត្វទៅមនុស្សនោះទេ គឺអាចបង្កាការចម្លងមេរោគ រវាងអ្នកលក់និងអ្នកទិញផងដែរ។ អ្នកជំនាញអះអាងថា សត្វព្រៃដែលនៅរស់ ហើយមានផ្ទុកមេរោគ គឺវាអាចចម្លងទៅកាន់សត្វផ្សេង និងមនុស្សបាន នៅពេលណាប៉ះពាល់ជាមួយសំណាក ទឹកមាត់ ទឹកនោម លាមក ឬក៏ឈាមរបស់សត្វព្រៃនោះ។
បន្ថែមពីវិធានការអនាម័យ វាជារឿងចាំបាច់ ដែលប្រទេសទាំងអស់ ត្រូវតែមានយន្តការត្រួតពិនិត្យសុខភាពសត្វចិញ្ចឹម និងសត្វព្រៃ មុននឹងដាក់លក់នៅលើទីផ្សារឲ្យមនុស្សទិញបរិភោគ។ ស្ថាប័នទាំង៣ បានអំពាវនាវផងដែរ ឲ្យមានការបណ្តុះបណ្តាល មន្ត្រីជំនាញពេទ្យសត្វ ដែលមានតួនាទី តាមដានការអនុវត្ត និងគោរពវិធានការសុខភាពអនាម័យទាំងនេះ ឲ្យមានប្រសិទ្ធភាពខ្ពស់។ បន្ថែមពីនេះ មន្ត្រីជំនាញក៏មានតួនាទីផងដែរ តាមដាន និងស្រាវជ្រាវ ព្រមទាំងជូនដំណឹងឲ្យទាន់ពេលវេលា ក្នុងករណីមានការផុសឡើង នូវមេរោគថ្មីចម្លែកណាមួយ។
សូមបញ្ជាក់ថា យោងតាមអ្នកជំនាញ មេរោគកាចសាហាវជាច្រើន មានប្រភពដំបូងចេញពីសត្វ ជាក់ស្តែង ដូចជាមេរោគអេដស៍ និងមេរោគអេបូឡាជាដើម។ ដោយឡែក មេរោគកូរ៉ូណាវីរុសថ្មី ដែលបង្កជំងឺកូវីដ១៩នេះ ត្រូវបានអ្នកជំនាញភាគច្រើន សង្ស័យថា មានប្រភពចេញពីសត្វប្រចៀវ មុននឹងឆ្លងមកដល់មនុស្ស។ យ៉ាងណាមិញ ផ្សារលក់សាច់សត្វដ៏ធំនៅទីក្រុងវូហាន ប្រទេសចិន គឺជាទីតាំងដែលមានការផ្ទុះការឆ្លងរាលដាលកូវីដ១៩ មុនដំបូងគេបង្អស់។ ក្រុមអ្នកជំនាញអង្គការសុខភាពពិភពលោក ជឿថា វាអាចទៅរួច ដែលកូរ៉ូណាវីរុសប្រភេទថ្មីបានឆ្លងចេញពីសត្វប្រចៀវ ទៅកាន់សត្វចិញ្ចឹមណាមួយទៀត ដែលគេយកមកលក់នៅផ្សារក្នុងក្រុងវូហាន ហើយបានចម្លងទៅកាន់មនុស្ស ដែលចេញចូលទីផ្សារនេះ៕(ដកស្រង់ពីវិទ្យុបារាំង)