ព័ត៌មានជាតិ
កូរ៉េខាងត្បូង ជាប្រទេសមុនគេនៅអាស៊ី ដែលអនុញ្ញាតឱ្យប្រើវ៉ាក់សាំងចាក់តែ១ដូស Johnson & Johnson
កូរ៉េខាងត្បូង បានក្លាយជាប្រទេសមុនគេនៅអាស៊ីដែលអនុញ្ញាតឱ្យប្រើវ៉ាក់សាំងកូវីដ១៩ Johnson & Johnson របស់ក្រុមហ៊ុន Janssen បន្ទាប់ភ្នាក់ងារសុវត្ថិភាពឱសថរបស់ប្រទេសនេះ អនុម័តនៅថ្ងៃទី៧ ខែមេសា ឆ្នាំ២០២១។
អាជ្ញាធរកូរ៉េខាងត្បូង បានវាយតម្លៃឃើញពីសុវត្ថិភាព និងប្រសិទ្ធភាពរបស់វ៉ាក់សាំងចាក់តែមួយដូសនេះ ថាអាចបង្ការជំងឺកូវីដ១៩នេះបាន និងអាចចាក់ទៅលើមនុស្សចាប់ពីអាយុ ១៨ឆ្នាំឡើងទៅ។
កូរ៉េខាងត្បូង បានចុះកិច្ចព្រមព្រៀងទិញវ៉ាក់សាំងពីក្រុមហ៊ុន Janssen ចំនួន ៦លានដូស ដែលតាមគ្រោងទុកនឹងបញ្ជូនទៅដល់អំឡុងត្រីមាសទី៣។
វ៉ាក់សាំង Johnson & Johnson បានក្លាយជាវ៉ាក់សាំងកូវីដ១៩ ទី៣ ដែលត្រូវអនុញ្ញាតឱ្យប្រើប្រាស់នៅកូរ៉េខាងត្បូងបន្ទាប់ពី AstraZeneca និង Pfizer។ ប្រទេសនេះបានចាប់ផ្តើមបើកយុទ្ធនាការចាក់វ៉ាក់សាំងកាលពីថ្ងៃទី២៦ ខែកុម្ភៈ ឆ្នាំ២០២១ ដោយមានមនុស្សប្រមាណ ១,០៣លាននាក់ ឬស្មើនឹង ១,៩៩% នៃប្រជាជន ៥២លាននាក់ បានចាក់វ៉ាក់សាំងដូសទីមួយ៕ប្រភពខ្លីៗ
