ព័ត៌មានជាតិ
បទល្មើសទន្ទ្រានយកដីរដ្ឋចំនួន៣ទីតាំង ត្រូវបានរកឃើញនៅស្រុកស្រែអំបិល ខណៈប្រជានេសាទថា វាជាផ្នែកតូចមួយនៃការកាប់បំផ្លាញព្រៃកោងកាងនៅក្នុងខេត្តកោះកុងតែប៉ុណ្ណោះ
កោះកុងៈ អាជ្ញាធរខេត្តកោះកុង អះអាងថា ខ្លួនបានរកឃើញបទល្មើស រំលោភដីរដ្ឋ ចំនួន ៣ ទីតាំងផ្សេងៗគ្នា នៅមូលដ្ឋានស្រុកស្រែអំបិលក្រោយមានការ រាយការណ៍ព័ត៌មាន ពីប្រជាពលរដ្ឋ ជាច្រើនលើកច្រើនសារ ប៉ុន្តែប្រជានេសាទក្នុងខេត្តកោះកុង លើកឡើងថា ការរកឃើញនេះ វាជាផ្នែកតូចមួយនៃការកាប់បំផ្លាញព្រៃកោងលិចទឹក ពីក្រុមជនទុច្ចរឹតខិលខូចតែប៉ុណ្ណោះ។
លោក សុខ សុទ្ធី អភិបាលរងខេត្តកោះកុង បានឱ្យដឹងនៅព្រឹកថ្ងៃទី៥ ខែមេសានេះថា រូបលោក បានសហការជាមួយតំណាង អយ្យការអមសាលាដំបូងខេត្ត កងកម្លាំងសមត្ថកិច្ចចម្រុះ និងមន្ត្រីជំនាញបរិស្ថាន មន្ត្រីដែនដី ចុះធ្វើដំណើរ តាមផ្លូវគោកផង និងផ្លូវទឹកផង ក្នុងគោលបំណងដើម្បីពិនិត្យទិដ្ឋភាពជាក់ស្តែង លើបទល្មើសទន្ទ្រាន កាន់កាប់ដីរដ្ឋចំនួន៣ទីតាំង នៅស្រុកស្រែអំបិល កាលពីថ្ងៃទី៣ មេសាកន្លងទៅ។
បើតាមលោកអភិបាលរង ខេត្តកោះកុង អាជ្ញាធរ បានរកឃើញថា ពិតជាមានការកាប់ទន្ទ្រាន យកដីព្រៃលិចទឹក និងតំបន់ការពារធនធានធម្មជាតិប្រាកដមែន។ ដោយទីតាំងទី១.ស្ថិតនៅ ភូមិជ្រោយស្វាយខាងលិច ឃុំជ្រោយស្វាយ ស្រុកស្រែអំបិលដែលស្ថិតនៅតំបន់ប្រើប្រាស់ ច្រើនយ៉ាងដងពែង។ ទីតាំងទី២. ដីស្ថិតនៅឃុំជ្រោយស្វាយ (តំបន់សហគមន៍ត្រពាំងព្រិះ) និងទីតាំងទី៣.នោះ គឺដីព្រៃលិចទឹកស្ថិតនៅភូមិទឹកប៉ោ ឃុំបឹងព្រាវ ។
ក្រោយពិនិត្យ និងចុចនិយាមការលក្ខណៈបច្ចេកទេស លើទីតាំងដីរដ្ឋ ដែលរងការកាប់ ទន្ទ្រាន ធ្វើជាសម្បត្តិឯកជនទាំង ៣ ទីតាំង ខាងលើនេះ លោក សុខ សុទ្ធី អភិបាលរងខេត្ត ណែនាំឱ្យអាជ្ញាធរដែនដី ស្រាវជ្រាវរកឱ្យឃើញ អ្នកទន្ទ្រានកាន់កាប់ដីរដ្ឋយកផ្តន្ទាទោស តាមច្បាប់ ព្រមទាំងធ្វើរបាយការណ៍ លម្អិតមួយ សុំចំណាត់ការរដ្ឋបាល ពីលោកស្រី មិថុនា ភូថង អភិបាលខេត្ត។
លោក សុខ សុទ្ធី ក្រើនរម្លឹកដល់ប្រធានមន្ទីរបរិស្ថានដែនដី ព្រមទាំងមន្ត្រីអាជ្ញាធរមូលដ្ឋាន ពាក់ព័ន្ធទាំងអស់ ចាំបាច់បង្កើនការទប់ស្កាត់ តាមដានត្រួតពិនិត្យ និងចាត់វិធានការ ឱ្យបានម៉ឺងម៉ាត់ ចំពោះសកម្មភាពទន្ទ្រានដីរដ្ឋ ដោយឈរលើស្មារតី គោលការណ៍ខុសច្បាប់ កុំឲ្យកើតមានឡើងបន្តទៀត។
រីឯលោក អេង ច័ន្ទភារ៉ា ព្រះរាជអាជ្ញារង អមសាលាដំបូងខេត្តកោះកុង បង្ហាញការសន្និដ្ឋាន បឋមថា បទល្មើសទន្ទ្រានកាន់កាប់ដីរដ្ឋ ចំនួន ៣ ទីតាំងខាងលើ រកឃើញកើតមាន ត្រង់ចំណុចទីតាំងទឹកប៉ោង ពិតជាមានការឈូសឆាយជាក់ស្តែងប្រមាណជា៥ហិកតា ចូលក្នុងតំបន់ប្រើប្រាស់ ច្រើនយ៉ាងដងពែង។
លោកព្រះរាជអាជ្ញារង កត់សម្គាល់ដែរថា ដោយឡែក ២ ទីតាំងផ្សេងទៀតលោកនៅ ពុំអាចទាន់ វាយតម្លៃបាននៅឡើយទេ ពោលគឺរង់ចាំខាងរដ្ឋបាលស្រុក និងមន្ត្រីការិយាល័យ ជំនាញ វាស់វែង ចុចនិយាមការ ចេញរបាយការណ៍ បញ្ជូនមកសិន ទើបអាចចាត់វិធានការ តាមនីតិវិធីច្បាប់ ទៅបាន។
ប្រជាពលរដ្ឋក្នុងខេត្តកោះកុង ជាពិសេសប្រជានេសាទ បានគាំទ្រចំពោះចំណាត់ការរបស់រដ្ឋបាលខេត្តកោះកុង ដែលបានចុះស្រាវជ្រាវ ដើម្បីដកហូតដីព្រៃកោងកាងលិចទឹក ទុកជាសម្បត្តិរដ្ឋវិញយ៉ាងដូច្នេះ។
ពលរដ្ឋបន្តថា ការរកឃើញខាងលើវាជាផ្នែកតូចមួយនៃការកាប់បំផ្លាញព្រៃលិចទឹកប៉ុណ្ណោះ ព្រោះនៅមានច្រើនករណីណាស់ពាក់ព័ន្ធនឹងការកាប់ព្រៃកោងកាងលិចទឹកនេះ ជាពិសេសគឺនៅក្នុងភូមិសាស្ត្រឃុំព្រែកខ្សាច់ ស្រុកគិរីសាគរ ចំណុចព្រែករូងលាតសន្ធឹងដល់ភ្នំអគ្គីនេត្រដែលដីព្រៃកោងកាងលិចទឹកប្រមាណជិត៣០០ហិកតា ត្រូវបានជនខិលខូច លួចកាប់បំផ្លាញកាលពីឆ្នាំមុន នឹងបានលក់ទៅឲ្យក្រុមឈ្មួញដី អ្នកមានលុយ មានអំណាចអស់ទៅហើយ ដែលចាំបាច់រដ្ឋបាលខេត្តត្រូវចុះទៅសិក្សាស្រាវជ្រាវជាបន្ទាន់ ដើម្បីដកហូតទុកជាសម្បត្តិរដ្ឋវិញផង៕
