ព័ត៌មានជាតិ
សាលារាជធានីភ្នំពេញគ្រោងនឹងកាប់ដើមឈើទាំងអស់នៅតាមដងផ្លូវម៉ៅសេទុង ហើយដាំថ្មីឡើងវិញ
អាជ្ញាធររាជធានីភ្នំពេញគ្រោងនឹងកាប់ដើមឈើទាំងអស់នៅតាមដងផ្លូវម៉ៅសេទុងហើយដាំដើមធ្នង់ជំនួសវិញ ខណៈដែលគម្រោងកែលម្អផ្លូវថ្មើរ ជើងនៅលើផ្លូវម៉ៅសេទុងនេះចាប់ផ្តើមដំណើរការដោយចាប់ពីចំណុចស្តុបចំការមនមកដល់ស្ពានអាកាស៥មករាដែលមានប្រវែងជាង៥គីឡូម៉ែត្រ។
អភិបាលរាជធានីភ្នំពេញ ឯកឧត្ដម ឃួង ស្រេង បានបញ្ជាក់ឱ្យដឹងនៅក្នុងកិច្ចប្រជុំមួយ កាលពីរសៀលថ្ងៃទី២១ខែកុម្ភៈឆ្នាំ២០២០នៅសាលារាជធានីភ្នំពេញថា នេះជាលើកទី៣ហើយដែលអាជ្ញាធររាជធានីភ្នំពេញបានធ្វើការប្រជុំដើម្បីពិភាក្សាឆ្លងគម្រោងកែលម្អផ្លូវថ្មើរជើងនៅលើមហាវិថីម៉ៅសេទុង។
ចំពោះគម្រោងថ្មីនេះ ឯកឧត្ដម អភិបាលរាជធានីបានបញ្ជាក់ថា និងកាត់ដើមឈើចាស់ៗទាំងអស់ចោលហើយដាំជំនួសឡើងវិញ ដោយឈើធ្នង់ដែលមានទំហំប៉ុនកជើងឡើងទៅ ដើម្បីឱ្យផ្លូវនេះជាផ្លូវដ៏ល្អមានទាំងចំណតរថយន្ត មានទាំងផ្លូវថ្មើរជើង មានទាំងសួនច្បាររួមនិងផ្លូវសម្រាប់ជិះកង់ផងដែរ។
ឯកឧត្ដម ឃួង ស្រេង ក៏បានបញ្ជាក់ផងដែរថា ការកាប់ដើមឈើចាស់ៗចោលនេះដោយសារតែដើមឈើខាងលើមានអាយុកាលយូរឆ្នាំហើយ ដើមឈើខ្លះមានប្រហោងក្នុង ហើយតែងបង្កផលប៉ះពាល់ដល់អ្នកដំណើរដោយពេលខ្លះ បានបាក់ធ្លាក់សង្កត់ទៅលើរថយន្តបង្កឱ្យមានគ្រោះថ្នាក់ដល់ប្រជាពលរដ្ឋផងដែរ។ទន្ទឹមនិងការងារកែលម្អផ្លូវថ្មើរជើងនៅលើបណ្តោយផ្លូវនេះយើងក៏សម្រេចឱ្យមានការកាត់ដើមឈើចាស់ៗទាំងអស់នេះ ចេញជាមួយនឹងការដាំដើមឈើ ប្រភេទធ្នង់នៅសងខាងផ្លូវនេះឡើងវិញ។
ឯកឧត្ដម ឃួង ស្រេង បានបញ្ជាក់ផងដែរថា បើគម្រោងអនុវត្តផ្លូវថ្មើរជើងនៅលើបណ្ដោយផ្លូវនេះទទួលបានជោគជ័យនោះវាគឺជាគំរូល្អសម្រាប់យើងយកទៅអនុវត្តនៅតាមមហាវិថីធំៗមួយចំនួននៅក្នុងរាជធានីភ្នំពេញ។ ដោយសារតែផ្លូវមួយចំនួនត្រូវបានប្រជាពលរដ្ឋធ្វើការរំលោភយកចិញ្ចើមផ្លូវ រហូតដល់ទូកផ្លូវថែមទៀតដែលធ្វើឱ្យបាត់បង់សណ្ដាប់ធ្នាប់យ៉ាងខ្លាំង។ចំពោះ មហាវិថីម៉ៅសេទុងខាងលើនេះ ឯកឧត្ដម ឃួង ស្រេងក៏បានជំរុញរៀបចំផ្លូវអាទិភាពសម្រាប់រថយន្តក្រុងសាធារណៈក្រុងផងដែរ៕
