ព័ត៌មានជាតិ
អាជ្ញាធរខណ្ឌពោធិ៍សែនជ័យ ចង់ទុកឲ្យលោក ស ថេត ស្នងការនគរបាល ចេញមុខបង្ក្រាបសង្វៀនមាន់ជលអាប៉ោង នៅភូមិថ្មគោល ដោយផ្ទាល់ឬយ៉ាងណា?
ទំនាក់ទំនងការផ្សាយៈ 012 676 885
(ភ្នំពេញ)៖ សង្វៀនជល់មាន់ និងអាប៉ោងដ៏ធំមួយកន្លែងបច្ចុប្បន្នកំពុងដំណើរការលេងយ៉ាងសប្បាយនៅចំនុចក្រោមដើមស្វាយក្នុងដីឡូត៍ ស្ថិតនៅភូមិថ្មគោល សង្កាត់ចោមចៅ2ខណ្ឌពោធិ៍សែនជ័យមិនមានអាជ្ញាធរ ឬសមត្ថកិច្ចណាហ៊ានចេញមុខបង្ក្រាបឡើយ។
ប្រជាពលរដ្ឋដែលរស់នៅជិតកន្លែងសង្វៀន អាងប៉ោងនោះបានឲ្យដឹងថា រាល់ថ្ងៃឃើញក្រុមអ្នកញៀនល្បែងជាច្រើនបានកាន់មាន់ចូលទៅដីឡូត៍ក្រោមដើមស្វាយ ដើម្បីយកទៅជល់ភ្នាល់ចាក់លុយក្នុងសង្វៀនមាន់ អាប៉ោងព្រមទាំងស្រែកហ៊ោរកញ្រ្ជៀវឡូឡាពេញក្នុងក្រោមដើមស្វាយនៅពេលគេចាញ់ឈ្នះម្តងៗ។
បើយោងតាមមន្ត្រីម្នាក់បង្ហើបថា សង្វៀនអាប៉ោង មួយនេះបើកលេងបានយ៉ាងរលូន។ ក្នុងករណីនេះដែរមានមេការម្នាក់របស់មេសង្វៀនដ៍ធំនេះជាអ្នករត់ការចែកចាយលុយដល់សមត្ថកិច្ចតាំងពីថ្នាក់ក្រោមរហូតដល់ថ្នាក់លើក្នុងក្រុង ដេីម្បីបិទមាត់ មិនឲ្យមានការចាប់ចងឬបង្រ្កាបឡេីយ ។មន្រ្តីនោះបន្តថា ក្នុងទឹកដីខណ្ឌពោធិ៍សែនជ័យនេះ ល្បែងខុសច្បាប់គ្រប់ប្រភេទជាពិសេសល្បែងជល់មាន់អាប៉ោង បើលោកម៉ន វុធី អធិការ និងចៅហ្វាយខណ្ឌមិនបើកដៃឲ្យលេងគឺក៍មិនអាចលេងបានដែរ?។
សូមបញ្ជាក់ថា ក្នុងការភ្នាល់ជល់មាន់អាប៉ោង ម្ដងៗមានអ្នកឈ្នះចាញ់អស់លុយរាប់ពាន់រាប់ម៉ឺនដុល្លារ ហើយមិនទាន់ឃើញមានមន្ត្រីអាជ្ញាធរនិងសមត្ថកិច្ចមូលដ្ឋានចាត់វិធានការបង្ក្រាបល្បែងស៊ីសងខុសច្បាប់មួយនេះទេ។ គេសង្ស័យថាល្បែងភ្នាល់ស៊ីសាច់ហុតឈាមគ្នាយ៉ាងត្រជាក់នេះ ជាឆ្នាំងបាយលោកម៉ន វុធី និងចៅហ្វាយខណ្ឌហើយ ទើបរក្សាភាពស្ងៀមស្ងាត់បើកដៃទុកឲ្យល្បែងភ្នាល់មួយនេះកើតឡើងយ៉ាងអនាធិបតេយ្យបែបនេះ។
ដូច្នេះប្រជាពលរដ្ឋក៏ដូចជាមហាជន បានអំពាវនាវយ៉ាងទទូចឲ្យ លោក ស ថេត ស្នងការរាជធានីជាពិសេស លោក ឃួង ស្រេងអភិបាលនៃគណៈអភិបាលក្រុងភ្នំពេញ គួរចាត់វិធានការលើ លោក ម៉ន វុធី អធិការនិងលោក ហែម ដារិទ្ធ ចៅហ្វាយខណ្ឌ ដែលកំពង់បើកដៃឲ្យមានសង្វៀនជល់មាន់ អាប៉ោង ចំណុចក្រោមដើមស្វាយ ភូមិថ្មគោល សង្កាត់ចោមចៅ2 ខណ្ឌពោធិ៍សែនជ័យនេះផង។
ប្រសិនបើជាលោកអធិការ ចៅហ្វាយខណ្ឌពិតជាមិនបានជាប់ពាក់ព័ន្ធនឹងផលប្រយោជន៍ផ្ទាល់ខ្លួនទេនោះ គឺត្រូវតែហ៊ានបង្ហាញជំហរដឹកនាំដោយភាពស្មោះត្រង់ បម្រើប្រជាពលរដ្ឋស្របតាមគោលនយោបាយភូមិ ឃុំ មានសុវត្ថិភាពរបស់រាជរដ្ឋាភិបាល ដោយមិនគួរបណ្តោយឲ្យមានល្បែងដូច្នេះទេ? ឬមួយចង់ទុកឲ្យលោកស ថេត ចេញមុខមកបង្ក្រាបដោយផ្ទាល់នោះ? ៕