កីឡា
ក្បួនដង្ហែជ័យលាភីមេដាយមាសពីកីឡាអាស៊ី គ្រោងនឹងប្រព្រឹត្តទៅនៅល្ងាចថ្ងៃទី៣ ខែកញ្ញា
សម្តេចនាយករដ្ឋមន្ត្រី ហ៊ុន សែន គ្រោងនឹងត្រៀមទទួលម្ចាស់ជ័យលាភី និងប្រតិភូកីឡាកម្ពុជា នៅវិមានសន្តិភាពនាល្ងាចថ្ងៃទី៣ ខែកញ្ញា ឆ្នាំ២០១៨ ពោលគឺមួយថ្ងៃក្រោយការបិទបញ្ចប់ព្រឹត្តិការណ៍ Asian Games លើកទី១៨ ។ បើតាមការអះអាងរបស់លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) ក្បួនដង្ហែនឹងចេញពីអាកាសយានដ្ឋានអន្តរជាតិភ្នំពេញ ម៉ោង១៧ និង៣៥នាទី ឆ្ពោះទៅវិមានសន្តិភាព ជាមួយនឹងម៉ូតូកិត្តិយសអមចំនួន៦គ្រឿង។
សូមបញ្ជាក់ថា សម្រាប់ព្រឹត្តិការណ៍ Asian Games លើកទី១៨ ដែលប្រព្រឹត្តធ្វើនៅប្រទេសឥណ្ឌូនេស៊ី បច្ចុប្បន្នកម្ពុជាបានឈ្នះមេដាយមាសចំនួន២ និងសំរិតចំនួន១។ ក្នុងនោះ កីឡាការិនីខ្មែរ-អាមេរិក ខាន់ ចេសា បានឈ្នះមេដាយមាសលើវិញ្ញាសា Newaza ទម្ងន់ក្រោម៤៩គីឡូក្រាមនៃប្រភេទកីឡាជឺជិតស៊ី (Jiu-Jitsu) មុនពេលដែលកីឡាករម៉ូតូទឹក (JetSki) សាលី អ៊ូមើត ឈ្នះមេដាយមាសលើវិញ្ញាសា Ski Modified និងមេដាយសំរឹទ្ធលើវិញ្ញាសា Runabout 1100 Stock។
យោងតាមអនុក្រឹត្យរបស់រដ្ឋាភិបាលចុះកាលពីឆ្នាំ២០១៣ ជ័យលាភីមេដាយមាស ខាន់ ចេសា និង សាលី អ៊ូមើត នឹងទទួលបានប្រាក់រង្វាន់ម្នាក់ៗចំនួន៨០លានរៀល ហើយ អ៊ូមើត ទទួលបាន២៤លានរៀលបន្ថែមទៀតសម្រាប់មេដាយសំរឹទ្ធ។ គ្រូបង្វឹករបស់អត្តពលិកទាំង២ទទួលម្នាក់ៗ៨០លានរៀល រីឯគ្រូជំនួយបាន៧០ភាគរយ៕
