អន្តរជាតិ
សម្ដេច ហ៊ុន សែន ប្រាប់ឲ្យដោះលែងជនសង្ស័យពាក់ព័ន្ធនឹងលោក សម រង្ស៊ី ឱ្យនៅក្រៅឃុំ
ភ្នំពេញ៖ សម្ដេចនាយករដ្ឋមន្ត្រី ហ៊ុន សែន បញ្ជាឱ្យដោះលែងជនសង្ស័យទាំងអស់ ដែលត្រូវបានសមត្ថកិច្ចចាប់ខ្លួន ពាក់ព័ន្ធករណីលោក សម រង្ស៊ី កាលពីពេលថ្មីៗនេះ ឱ្យនៅក្រៅឃុំ ប៉ុន្តែស្ថិតនៅក្រោមការត្រួតពិនិត្យរបស់តុលាការ។ ប្រមុខរដ្ឋាភិបាល ថ្លែងបែបនេះ នៅក្នុងពិធីសម្ពោធរោងចក្រផលិតស៊ីម៉ង់តិ៍ «ថៃប៊ុនរ៉ុង» នៅព្រឹកថ្ងៃទី ១៤ វិច្ឆិកា ។
«ក្រសួងយុត្តិធម៌ ធ្វើការជាមួយព្រះរាជអាជ្ញារ ដើម្បីធ្វើការដោះលែងអ្នកដែលត្រូវបានចាប់ខ្លួន ឱ្យនៅក្រៅឃុំ តាមសំណើរមេធាវី សាមីខ្លួន តាមក្រុមគ្រួសារ»។ នេះជាការបញ្ជារបស់សម្ដេច ហ៊ុន សែន ដែលបានសង្គត់ធ្ងន់ថា ជនសង្ស័យទាំងនោះ មិនថាទោសទាប ឬទោសខ្ពស់នោះទេ គឺត្រូវដោះលែងឱ្យនៅក្រៅឃុំទាំងអស់។
ជនសង្ស័យដែលលោកនាយករដ្ឋមន្ត្រី ហ៊ុន សែន លើកឡើងនេះ គឺចង់សំដៅទៅលើអ្នកដែលត្រូវបានសមត្ថកិច្ចចាប់ខ្លួនជាបន្តបន្ទាប់ ពាក់ព័ន្ធករណីលោក សម រង្ស៊ី ដែលប្រកាសវិលចូលប្រទេសកម្ពុជា នៅថ្ងៃទី៩ វិច្ឆិកា ដោយអមជាមួយការអំពាវនាវឱ្យពលរដ្ឋចូលរួមសកម្មភាពនយោបាយខ្លួន។ រដ្ឋាភិបាល ចាត់ទុកការអំពាវនាវនេះ ជាសកម្មភាពធ្វើរដ្ឋប្រហារ ទើបឈានទៅដល់ចាប់ពលរដ្ឋ ដែលសង្ស័យរួមគំនិតជាមួយលោក សម រង្ស៊ី ឥតស្រាកស្រាន្ត រហូតដល់មានការរិះគន់ទៅលើរដ្ឋាភិបាលជាបន្តបន្ទាប់។
បើតាមសម្ដេច ហ៊ុន សែន ជនសង្ស័យដែលសមត្ថកិច្ចចាប់ខ្លួននៅទូទាំងប្រទេសនេះ មានប្រមាណជាង៧០នាក់ ហើយពួកគេភាគច្រើនត្រូវបានព្រះរាជអាជ្ញា ចោទពីបទ «រួមគំនិតក្បត់ជាតិ» ជាមួយលោក សម រង្ស៊ី។ សម្រាប់សម្ដេច ហ៊ុន សែន ជនសង្ស័យទាំងនេះ គឺជាជនរងគ្រោះ ដែលជឿលើការឃោសនានយោបាយប៉ុណ្ណោះ។
ប្រមុខរដ្ឋាភិបាល ដែលបានបញ្ជាឱ្យដោះលែងជនសង្ស័យនៅក្រៅឃុំ ស្ថិតនៅក្រោមការត្រួតពិនិត្យរបស់តុលាការនេះ បាននិយាយដូច្នេះថា៖«នៅកំពតអាចខិតខំដោះស្រាយ(ដោះលែងជនសង្ស័យ)មុនគេ តាមខ្ញុំចាំដូចជាមានតែពីរនាក់(ជនសង្ស័យ)ប៉ុណ្ណឹងទេ ។ ពីរនាក់ហ្នឹង បើអាចធ្វើទាន់ ឱ្យចេញក្រៅឃុំនៅថ្ងៃហ្នឹងទៅ ដើម្បីឱ្យឃើញប្រសិទ្ធភាពនៃសម្តីរបស់ ហ៊ុន សែន »។
មូលហេតុដែលសម្ដេច ហ៊ុន សែន ហ៊ានចេញមុខបញ្ជាបែបនេះ ដោយសម្អាងថា ប្រព័ន្ធតុលាការកម្ពុជា អាចឱ្យនីតិប្រតិបត្តិ ក្ដាប់នយោបាយព្រហ្មទណ្ឌ តាមរយៈការដាក់ព្រះរាជអាជ្ញាឱ្យនៅក្រោមក្រសួងយុត្តិធម៌ ដែលស្ថាប័នចំណុះឱ្យរដ្ឋាភិបាល។ ត្រង់ចំណុចនេះសម្ដេច ហ៊ុន សែន បានអះអាងថា រដ្ឋាភិបាល មានសិទ្ធិនិយាយ និងបញ្ជាឱ្យដោះលែងក្នុងដំណាក់បទចោទនេះ៕
