សេដ្ឋកិច្ច
ជប៉ុនរកឃើញរ៉ែស័ង្កសី និងទង់ដែងក្នុងទឹកដីខេត្តស្ទឹងត្រែង
ក្រុមហ៊ុនរុករករ៉ែរបស់ប្រទេសជប៉ុនប្រកាសថា ខ្លួនបានរកឃើញខ្សែក្រវាត់រ៉ែទង់ដែង និងស័ង្កសី នៅក្នុងខេត្តស្ទឹងត្រែងនៃប្រទេសកម្ពុជា ដោយគ្រោងនឹងធ្វើការរុករកបន្ថែមទៀតជាមួយដៃគូរបស់ខ្លួនដើម្បីទាញយក។
យោងតាមការចុះផ្សាយរបស់សារព័ត៌មានជប៉ុន NNA បានឲ្យដឹងថា ក្រុមហ៊ុនរុករករ៉ែរបស់ប្រទេសនេះឈ្មោះ JOGMEC និង Nittetsu Mining Co. គ្រោងនឹងធ្វើរួមគ្នាដើម្បីរុករក និងទាញយករ៉ែទាំងនេះ បន្ទាប់ពីក្រុមហ៊ុននេះទទួលបានការអនុញ្ញាតពីរដ្ឋាភិបាលកាលពីខែមេសាកន្លងមក។
អគ្គនាយកធនធានរ៉ែ នៃក្រសួងរ៉ែ លោក យស់ មុន្នីរ៉ាត់ មានប្រសាសន៍ថា រដ្ឋាភិបាលពិតជាផ្ដល់អាជ្ញាប័ណ្ណក្នុងការរុករករ៉ែឲ្យក្រុមហ៊ុនជប៉ុនមែន តែមិនទាន់អនុញ្ញាតឲ្យទាញយកនៅឡើយទេ។ លោកបន្ថែមថា បច្ចុប្បន្ន តំបន់ដែលក្រុមហ៊ុនទាំងនោះទទួលអាជ្ញាប័ណ្ណ និងរកឃើញនោះគឺស្ថិតក្នុងស្រុកថាឡាបរិវ៉ាត់ នៃខេត្តស្ទឹងត្រែង។
លោក មានប្រសាសន៍ថា៖ «មិនទាន់ដឹងទំហំប៉ុន្មានទេ គ្រាន់តែថា រកឃើញពីសន្ទុះរ៉ែទង់ដែង ស័ង្កសី ដែលថាអាចមានសក្ដានុពល តែចំនួនប៉ុន្មានគឺអត់ដឹងទេ។ យើងប្រគល់អាជ្ញាប័ណ្ណអីឲ្យគាត់ហ្នឹងដើម្បីធ្វើការស្វែងរក ខួងលំអិតសិន បានហ៊ានវាយតម្លៃបានប៉ុណ្ណាអីប៉ុណ្ណានោះណា»។
បើតាមលោក យស់ មុន្នីរ៉ាត់ បច្ចុប្បន្ន រដ្ឋាភិបាលបានផ្ដល់សិទ្ធិឲ្យក្រុមហ៊ុនជប៉ុននេះក្នុងរយៈពេល ៣ឆ្នាំដើម្បីរុករក តែថា ក្រុមហ៊ុនអាចសុំបន្តបានរហូតដល់៧ឆ្នាំ ប្រសិនជានៅតែចង់ស្វែងរក៕
